148
Osobo Bagade amola Muagado Liligi Huluane, Godema Nodone Wele Sia:ma:mu
1 Hina Godema nodoma!
Dilia Hebenega esalebe fi! Hina Godema nodoma!
2 Hina Gode Ea a:igele dunu huluane
amola Ea Hebene ganodini dadi gagui wa:i dunu huluane!
Ema nodoma!
3 Eso, oubi amola gasumuni nenanebe!
Ema nodoma!
4 Muagadodafa amola hano muagadodili diala!
Ema nodoma!
5 Ilia huluane da Hina Gode Ea Dio amoma nodone sia:mu da defea!
E da ili hamoma:ne sia:beba:le, ilia huluane hahamoi dagoi ba:i.
6 Ea hamoma:ne sia:beba:le, ilia ilegei sogebiga mae muguluma:ne,
eso huluane dialoma:ne, bugi dagoi ba:sa.
Ilia Gode Ea sia: gua:mu hamedei.
7 Osobo bagade fi huluane, hano wayabo bagade ohe fi liligi bagadedafa
amola hano wayabo bagade lugudu fi!
Dilia huluane Hina Godema nodoma!
8 Ha:ha:na, mugene, anegagi ofo, mu mobi amola fo
ilia da Ea hamoma:ne sia:i nabawane hamosa!
Dilia huluane Hina Godema nodoma!
9-10 Agolo, goumi, fage legesu ifa, iwila,
ohe fi fofoi amola sigua, sugi labe fi amola sio fi!
Dilia huluane Hina Godema nodoma!
11-12 Hina bagade dunu, fifi asi gala huluane, hina bagade ilia egefelali,
ouligisu dunu huluane, uda a:fini, goi ayeligi, da:i hamoi dunu amola uda,
amola mano huluane!
Dilia huluane Hina Godema nodoma!
13 Ilia huluane da Hina Gode Ea Dio amoma nodomu da defea.
Bai Ea Dio da bagadedafa amola dunu huluane ilia dio baligisa.
Ea hadigi hou da liligi huluane osobo bagade amola Hebene ganodini esala,
amo ilia hou bagadewane baligisa.
14 E da Ea fi ilima gasa bagade hamobeba:le, Ea fi dunu da Ema nodosa.
E da Ea fi Isala:ili dunu ilima bagadedafa asigisa.
Ilia da Ema nodosa.