5
God jipapa eira awa, Iesu da embomaida gisijijiegarimi ainda embomai sima orote.
1 Na, Iesu da embomaida gisijiari, ami Iesu da embomaida gisijijiegari itomane doda awamanede atega ena. Na ainmi Keriso da memesi jiwae jisimi gositena, edo iji ainde Keriso da taogari kaenato yai arapa ari garo, na daedo ainda taogari tegerida awa bana, nane ge eiwa tena. 2 Dá ango wo sima ari embobomi awamaneda sipumane sima edo era, imomane, sima ari embobo ango, God da embomai jisi da (1) itomane yaida sima ewo. Embomaimi wataro imomane buro awa ainyae, ata imomane jipapa eite, buro awa ewo. Imomane ganu beono ari buro ainyae, ata imomane dobémi awamane sima ain, buro awa ewo. 3 Edo embomai awa God mi itomane yaida piedo sima awate sisina, dá babadegarimi awamaneda awara tarimi embomai gisijido era ango ainyae, ata inemane kariwa dave embomaida jisida awa piedo ewo awamane ambo ambo ore. 4 Edo iji ainde Wo Sima Ari Embo Bajina idegaina, imomane taogarida gobe bawa, edo ainda jitari duroka awa mana manaina.
5 Dá ango imomane embomai teteka ami Iesu da embomaida gisijijiegari kera ewo. Edo imomane berari kera mina ara eite tataimbarimi buro ewo. Kaena gari,
“God mi dariga embomai gitopo edo eira,
ata ainda dave arimi tataimbari embomai kondade edo eira.” Proverbs 3:34
6 Awatedo imomane akuta God da goroba bajinabéda tuda isite tataimbewo, edo iji da (1) ami avigesisina ainde imomane jiari vitave. 7 God mi itomane wasiri awa kotembedo eira, awaembo itomane dubo vevera kotembari berari ainda yai piewo.
God jipapa eira awa kaenato gebé ari ainda yai jidogogo eite Binei engiregorote.
8 Kotembari dave jigamo ewo, edo simagewo. Binei,* Binei awa Satan da dao nei. gitopo embo itomane, dá wo lion aorogasite ango ainto edo maundo eira, ami embo inaintedo kakowa edo eira. 9 Itomane gebé ari God da yai jidogogo eite embo awa engiregewo. Imomane gari, itomane gebé ari nanonameji butu dededa memesi dá inemane budo ewa ango budo era.
10 Ata God mi iji berari ainda dave arimi imomane kondade edo eira, ami imondemane dao sisina ainda taogari natopo itari Keriso Iesu da toda bawate. Edo na God da yai benunu tena, amboda imomane memesi iji riboribé ae awa bawa, God mi imomane ari kaviegave, edo itomane gebé ari okain are, edo itomane goroba badare, edo itomane tumonda ari ainda yai matawa itare. 11 Ainda yai taogari de gisijiarida goroba de natopobé natopo itare. Awara.
Peter mi ategari beaoda pipisisina.
12 Silvanus awa gebé ari nameji da (1) nanemi gari edo tumonda edo ena. Embo ami na kondade esiri ove tupo eiwa gaietena. Edo nane imondemane kondade ari ge edo gebé karigetena awa, dave ari eiwa inemane ainda doda petetewa itewa awawa God da dave ari gebé.
13 Eutu ainmi Babylon doda isira ami imomane ategeteira. God mi eutu ae imondemane daedo ainda embomai ango itawate gerisina.† Eutu ainmi Babylon doda isira...gerisina. Ove Kotopuda atopapasigari kotembedo era, Peter mi kariwa ge einda gagurisina Iesu da embomai dedegarate. Awatedo geda moka einda awa: Iesu da embomai ainkain Babylon doda itera ami imomane ategetera. God mi awamane ae imondemane daedo ainda embomai ango itawate gerisina. Edo nato mai Mark‡ nato mai Mark. Ove Kotopuda atopapasigari kotembedo era, Peter mi Mark Iesu da yai kundo gupusina, awatedo Mark awa Peter da gebé arida mai ango. imomane daedo ategeteira. 14 Dubobarida munegarimi ategari mina ara edo ewo.
Béga imomane berarida yai ainkain Keriso Iesu dada ari itewa. Awara.
5:5 Proverbs 3:34
*5:8 Binei awa Satan da dao nei.
†5:13 Eutu ainmi Babylon doda isira...gerisina. Ove Kotopuda atopapasigari kotembedo era, Peter mi kariwa ge einda gagurisina Iesu da embomai dedegarate. Awatedo geda moka einda awa: Iesu da embomai ainkain Babylon doda itera ami imomane ategetera. God mi awamane ae imondemane daedo ainda embomai ango itawate gerisina.
‡5:13 nato mai Mark. Ove Kotopuda atopapasigari kotembedo era, Peter mi Mark Iesu da yai kundo gupusina, awatedo Mark awa Peter da gebé arida mai ango.