5
Ananias ae Sapphira demi ge pitawa sitera.
1 Ata embo da (1) dao Ananias, edo ainda aro Sapphira de, awamaneda butu awa embode piedo ganu buritera. 2 Ango edo ganu budo katambedo kupo nei awa jijieite edo kupo nei awa ainda aro daedo goteiri kundo gundo Yesu da piari aimbari emboboda taida pipisisina.
3 Ata Peter mi sisina, “Ananias, nongaintedo Satan*Satan awa God da anela da (1) da dao. Anela awa God da ge jindesiri God mi imo utuda kundo augesiri idegedo wowosisina. Edo Satan da dao mokabé Hiburu geda awa ‘gitopo embo’. Satan awa God da gitopo edo embo enemboda gitopo. mi ito doda torido gisijiri Asisi Kotopu de ge pitawa tedo butuda ganu kupo nei awa imo embo jiesi? 4 Butu piae gisida, butu awawa ito topobé rita? Gebé, butu awawa ito topobé. Edo ainda amboda awa embode piedo ganu awa beta, ganu ikaito awawa sima ae etesita? Gebé, ganu ikaito sima ae eteta. Ro awa embo ito doda kotembari beyae eiwa sirigetesi? Inemi embo enemboda yai akuta ge pitawa tae, atako God da yai daedo teteta.”
5-6 Edo Ananias ge awa ingite butuda durudo besisina. Edo singabangami ainda tamo gongomi doiedo kundo idegedo ainda goiari yaida pipisitera. Ango etero embomai ainkaimi bino awa ingero adu bajinabé esitera.
7 Ainda amboda, ora tamonde (3) itae esiri embo ainda aro totorisina. Edo iwata ro idegesiri, awa gae. 8 Edo Peter mi ainde tedogosisina, “Teyo gane! Inemane itomane butu embode piedo ganu mina tega engo bevita?”
“Gebé,” ami sisina, “ganu mina tega dá awara.”
9 Peter mi eutu ainde sisina, “Ro awa embo imomane kotembari dá angomi Badari da Asisi bavedogain ge katetevi? Giyo! Embobo ito iu awa matu goietera ami gupera. Awamaneda tai yavi manguro beda goteta, edo awamane imo daedo kundo idegedo mambara.”
10 Edo burigibé eutu awa butuda durudo ainda taida besisina. Ango esiri singabanga torido gundo eutu betari awa gositera. Ango edo awamanemi eutu awa kundo idegedo maundo goitera, ainda iuda demonda.
11 Awatedo, Yesu gebé ari embomainda doregari berarimi adu bajinabé esitera, edo embomai ainkain berarimi bino awa goteite daedo.
Yesu da piari aimbari embobomi kariwa ae wasiri babain de jiwae edo esitera.
12 Edo Yesu da piari aimbari embobomi kariwa ae wasiri babain de jiwae embomainda yai edo esitera. Daedo, gebé ari embomai berari kotembari da (1)mi Solomon da Boriri da dada edo esitera.†Solomon da Boriri awa Judah embomainda oro kotopu bajina ainda dodabé ae, ata demo arapa kena iji vitarida. 13 Awarata, gebé ae ari embomaimi gebé ari embomainda doregari gido dobibi eite awamanede umojiae, ata awamane tou bajinabé edo esitera. 14 Ata embo de eutu de neneimi Badari gebé eite awamaneda yai jiwaebé gundo dada edo esitera. 15 Ango edo embomaimi awamaneda karu egeregari kundo gundo begata beda besida edo kakateda pisido esitera awa, Peter pepeta eiari tepoko ainda dugami awamane nenei tujiarate. 16 Dá ango embo jisijisi nasi demodamodami Jerusalem da dada eite awamaneda karu embo de embo asisi bebegaeda‡asisi bebegae awa embo bebetegarida asisi ae. Awamane awa Satan da anelamane. Iji matu God mi anelamane berari esisina (Kolosi 1:16). Ainda amboda, anela bajina dao Satan mi God da ge jinjisina (Isaiah 14:12-15). Iji ainde imo God da ge jindesiri anelamane nenei Satan ambo ambo esitera (Amboda Idegaina 12:3-4). Iji boroko, Satan ae ainda anelamane demi embomai udumboro God da ge jindedo Satan da jipapa ambo ambo edo era. bundari de kundo gumboro berari kaviyegedo esitera.
Yesu da piari aimbari embobo bundarida udegari buritera.
17 Edo pirisida gisijiari bajina erido ainda buro otatawo Sadusi mane daedo jitedo sinigambari bajinabé esitera. 18 Ango edo awamanemi Yesu da piari aimbari embobo jido nasida bundari oroda kundo maundo pipisitera 19 Ata muyae ainde, Badari da anelami§anela awa asisi daveda dao. Iji tuturoda God mi awamane esisina, edo ainda amboda imo embo enembo esisina. Awamane awa asisi dave God da ge kera edo era. Awamanemi God da bino kundo aundo embo enemboda yai pisido era. Awamanemi God tumondebain edo era, edo God da gebé ari embomai kondade edo era. bundari oroda manguro pipiregedo awamane kundo arapada idegedo awamanede ge sisina, 20 “Mambuwo! Judah embomainda oro kotopu bajinada do arapada maundo petedo embomainde nongo nongo edo God mi awamaneda yai wasiri natopo itari piari borote ge berari eiwa tawo gore!”
21 Ango tesiri ingido, sipobéde, awamane oro kotopu bajinada torido embomainde atopatari tuturo esitera.
Yesu da piari aimbari embobo tekago kasitera.
Ata pirisida gisijiari bajina ae ainda buro otatawo de gundo dada esitera. Ango edo Sanhedrin edo Israel embomainda orobeda kopuru mamai berari daedo, gumborote dao sitera. Ainda amboda oro kotopuda sima ari embobo pietero bundari oroda maunsitera, piari aimbari embobo kundo gumborote site. 22 Ata iji angode sima ari embobo bundari oroda maundo awamane tambae esitera. Ango edo overegedo gundo tetero gositera. 23 “Imondemane gebé tera! Nanekare bundari oro awa bé engiregedogogo bé ari tambera. Edo bundari oro sima ari embobo awa manguro beraribéda petari itero gera. Ata nakare manguro pirigetera, edo embo doda da ji tambae!” 24 Ango edo iji angode ge eiwa ingido, pirisida gisijiari bajina ae oro kotopuda gisijiari bajina de pirisi babain de awamanemi anana eite kotembesitera, “Einda amboda ro gumaini?”
25 Edo embo neimi gundo awamanede sisina, “Giwo! Embobo avekave inemane bundari oroda pipitawa, awamane oro kotopu bajinada doda petetera, edo embomai atopapotera.” 26 Ainda amboda, oro kotopuda gisijiari ae sima ari embobo de adu esitera, embomai demonda ami ganumami augedo deorekae. Awatedo, awamane aundo piari aimbari embobo kundo guputera, ikanade ikanade ae.
27 Edo kundo gundo Sanhedrin da doda pietero pepositera. Etero gido pirisida gisijiari bajinami awamanede ge eiwa sisina.
28 “Nanekare imondemane aodari okain pipitara awa, embo einda daoda atopatainyae!” ami sisina. “Awarata, inemane atopatari emimi embomai atopatewo Jerusalem da umbugo berarida arapu esira, edo embo einda betarida ororo ami nakare bekumba ain ewa!”
29 Ango edo Peter ae Yesu da piari aimbari embo nenei demi awamanede mina sitera, “Nakare God da aodari kera ara. Edo embomi ge evekara taro gido nakare awamane kera ainyae. 30 Mamono kaenatoda God mi Yesu, inemane detewo oregada besitara awa, jiri erorara. 31 Aindabé, embo ami Israel embomainda do ainda yai jiari wareregara, edo awamaneda jimbo bebegae dowaro ainda kotembedo dowari awamaneda yai piarate, awatedo, God mi imo awa jiri ikanebé visido ainda ipabeda anumbada anumbatara, Daotari da Mai edo Toregari Embo arate. 32 Edo nanekare iwata eiwa Yesu da yai edo idegatara awa embomainde karigedo era, edo God da Asisi Kotopu daedo ami ge eiwa gebé embomainde karigedo eira. God mi ainda Asisi awa, embomai imo kera edo era, awamaneda yai pipitara.”
Gamaliel kondade ari ge dave sisina.
33 Iji angode Sanhedrin mi ge eiwa ingido sinigambari beyaebé esitera, edo awamane daro betorote jipapa esitera. 34 Ata doregari ainda doda, embo da (1), ainda dao Gamaliel, ami erido peposisina. Embo awa Parasi maneda*Parasi mane awa Judah embomainda gebé ari jisi bajina Israel doda itora. Awamanemi God da Aodari gisi Moses da yai pipisisina awa dave edo gido ambo ambo edo esitera. Ata, awamane aribari neneinde ge okain neneinde daedo ainda tamonda pisido embomainde atopasido esitera. embo da (1) edo Aodarida atopatari. Imo awa embomai berarimi tou eora. Edo ami ge okain tedo Yesu da piari aimbari embobo awa piaro idegedo aundo arapada sima saka orote sisina. 35 Ango edo katari emboboda yai ge sisina: “Israel embomai, gidogogo ewo, inemane embobo einde ro ain kotembetewa awa. 36 Aindabé, duberi indewae gisida, embo da (1), ainda dao Theudas,†Theudas awa Rome da gisijijiegari jipapa ae ari embo. Awatedo, iji ainde ami Rome da gisijiari dari sitarate jipapa esisina. Ata Rome da itoro embobomi embo awa detero besisina. erido sisina, ‘Na awa embo dariga!’ edo embobo ajijigari 400 ango embo ainde dada esitera. Ata embo awa detero besisina, edo embobo ainkain imo kera eiretera, awa bodembetero bé itae esisina. 37 Ainda amboda, Rome da dao ajijigari iji ainde,‡Iji ainde, Caesar mi ainda tax inono bain kotembesisina, awatedo, imo embomai berari ajijigain jipapa esisina. Judas yai Galili embo§Judas einda awa yai Galili embo. Judas Iscariot awa embo evekara (Iwata Ari 1:16, 18). Judas Galili embo mi tax Caesar da yai piari jipapa ae esisina. erido embomai jiwae gisijido kundo maunsisina. Ata embo awa daedo detero betesiri ainda kera ari embomai evekara esitera. 38 Awatedo, nanemi imondemane tena, embobo eiwamaneda yai iove edo dowo aimbore! Aindabé, edo kotembari ko wasiri eiwa awa embo enemboda yai edo gupeira gido, awa wotedo itae aina. 39 Ata wasiri eiwa God da yai edo gupeira gido, inemane engiregari tao ae. Edo engiregain jipapa ewa, awa giwo! Imomane sinigambarimi God da yai duduno ae etewa, awa gawate.”
40 Edo ainda ge ingido awara esitera. Edo Yesu da piari aimbari embobo tetero torero vededo ge okain awamanede sitera, “Yesu da daoda ge nei tekago tainyae!” Ango tedo awamane dotero maunsitera.
41 Aindabé, Yesu awa embo vedari edo mengari buritera, awamane gebé ero God mi ainda tou ari awamaneda yai pipisisina. Awatedo, awamane yawa eite Sanhedrin da yai dodo maunsitera.*Yesu da piari aimbari embobo matu gositera, Yesu awamane embo mengari de memesi de bajina bé bajina burara (I Peter 2:24). Awatedo, awamane daedo Yesu da memesi bain jipapa esitera (I Peter 4:12-14). Ata iji ainde awamane Yesu da memesi bureiworo, God mi ainda dubodave ari awamane yaida piedo esisina (Matthew 5:10-12). 42 Edo deguta da (1) dowae, awamanemi Judah embomainda oro kotopu bajinada edo mando da da, ainda bino dave atopasido karigedo esitera, “Yesu awa Keriso.”
*5:3 Satan awa God da anela da (1) da dao. Anela awa God da ge jindesiri God mi imo utuda kundo augesiri idegedo wowosisina. Edo Satan da dao mokabé Hiburu geda awa ‘gitopo embo’. Satan awa God da gitopo edo embo enemboda gitopo.
†5:12 Solomon da Boriri awa Judah embomainda oro kotopu bajina ainda dodabé ae, ata demo arapa kena iji vitarida.
‡5:16 asisi bebegae awa embo bebetegarida asisi ae. Awamane awa Satan da anelamane. Iji matu God mi anelamane berari esisina (Kolosi 1:16). Ainda amboda, anela bajina dao Satan mi God da ge jinjisina (Isaiah 14:12-15). Iji ainde imo God da ge jindesiri anelamane nenei Satan ambo ambo esitera (Amboda Idegaina 12:3-4). Iji boroko, Satan ae ainda anelamane demi embomai udumboro God da ge jindedo Satan da jipapa ambo ambo edo era.
§5:19 anela awa asisi daveda dao. Iji tuturoda God mi awamane esisina, edo ainda amboda imo embo enembo esisina. Awamane awa asisi dave God da ge kera edo era. Awamanemi God da bino kundo aundo embo enemboda yai pisido era. Awamanemi God tumondebain edo era, edo God da gebé ari embomai kondade edo era.
*5:34 Parasi mane awa Judah embomainda gebé ari jisi bajina Israel doda itora. Awamanemi God da Aodari gisi Moses da yai pipisisina awa dave edo gido ambo ambo edo esitera. Ata, awamane aribari neneinde ge okain neneinde daedo ainda tamonda pisido embomainde atopasido esitera.
†5:36 Theudas awa Rome da gisijijiegari jipapa ae ari embo. Awatedo, iji ainde ami Rome da gisijiari dari sitarate jipapa esisina. Ata Rome da itoro embobomi embo awa detero besisina.
‡5:37 Iji ainde, Caesar mi ainda tax inono bain kotembesisina, awatedo, imo embomai berari ajijigain jipapa esisina.
§5:37 Judas einda awa yai Galili embo. Judas Iscariot awa embo evekara (Iwata Ari 1:16, 18). Judas Galili embo mi tax Caesar da yai piari jipapa ae esisina.
*5:41 Yesu da piari aimbari embobo matu gositera, Yesu awamane embo mengari de memesi de bajina bé bajina burara (I Peter 2:24). Awatedo, awamane daedo Yesu da memesi bain jipapa esitera (I Peter 4:12-14). Ata iji ainde awamane Yesu da memesi bureiworo, God mi ainda dubodave ari awamane yaida piedo esisina (Matthew 5:10-12).