8
1 Edo Saul mi awamane embo awa daro betarate era awa gido awara esisina.
Embomaimi tuturo edo Yesu gebé ari embomainda doregarida yai memesi neindekainde pipisitera.
Iji angode embomaimi tuturo edo Yesu gebé ari embomainda doregarida yai nasi Jerusalem ainda memesi neindekainde pietero awamane berari idegedo yai Judea edo yai Samaria ainda bodembesitera. Awarata, Yesu da piari aimbari embobo 12 Jerusalem nasida isiretera. 2 Edo God tou ari embobomi Stephen da tamo kundo maundo goiedo ji ikanade bé embo awa embo sitera. 3 Ata Saul mi Yesu gebé ari embomainda doregari usibesi eite mando tegerida torido embo de eutu de jido dumundo bundari oroda kundo maundo piedo esisina.
Philip mi, “Yesu awa Keriso,” yai Samaria embomainde*Samaria embomai awa ororo baige ari edo god evekara dasiga edo esitera. Awatedo, Judah embomai jiwae Samaria embomai jipapa ae edo esitera. Awarata, God mi embomai eiwamane daedo tonemain jipapa esisina (Matthew 28:19-20; Mark 16:15). karigedo esisina.
4 Awatedo, Yesu gebé ari embomai evekara esitera, edo awamanemi bino dave karigeteite yai berarida aunsitera. 5 Ango edo Philip yai Samaria da nasi bajinada wotedo “Yesu awa Keriso” awamanede karigedo esisina. 6 Iji ainde embomai jiwaemi Philip da ge ingido edo kariwa neindekainde embo ami eiri awa gido awamane berari ge ro awa Philip mi siri awa gaintedo watake esitera. 7 Philip mi asisi bebegae embomai jiwaeda doda itari awa ge siuri aoro ikanadebé gasite dodo idegedo maundo esitera. Daedo embomai jiwae ipatai ambari edo baoro bundari awa embo ami gao esiri kaviyegesitera. 8 Ango esiri embomai jiwaebé nasi ainda awa yawa bajinabé esitera.
9 Ata embo da (1) dao Simon mi iji riboribé nasi ainda doda donewode eite isima edo esisina. Ango eiuri yai Samaria embomaimi gido bé korebakore eora. Edo embo awa iji matawa site tedo esisina awa, “Na awa Embo Bajina!”
10 Ango teuri babadegari ae buro embobo demi ainda ge gain eite mina tara esitera, “Embo eiwawa Embo Bajina, edo God da goroba ainda yai isira!” 11 Embo ami ainda donewodemi matu euri awamane gido korebakore eora. Awatedo, ainda ge ambo ambo edo esitera. 12 Ata iji angode Philip mi God da gisijiari edo Yesu Keriso da bino dave embomainde karigesiri awamane ainda ge ingido gebé esitera. Ango etero Philip mi embo ae eutu de daedo bapataito edo esisina. 13 Edo Simon mi akuta Philip da ge daedo gebé esiri bapataito esisina. Ango esiri Simon mi Philip de daedo imapuma edo eiri buro babain edo kariwa neindekainde eiuri goteite bé korebakore edo esisina.
14 Edo iji nonde Yesu da piari aimbari embobo Jerusalem doda ami yai Samaria embomaimi God da ge burara awa ingido, awamanemi Peter ae John de awa Samaria embomainda yai pietero maunsitera. 15-16 Awamane gumbae gisida, Philip mi gebé ari embomai teteka Yesu Keriso da daoda bapataito esisina, ata God mi ainda Asisi Kotopu awamaneda yai piae. Ango edo Peter ae John de yai Samaria da wotedo gundo awamane tote (2)mi gebé ari embomai teteka awa embo God da yai benunu sitera, ainda Asisi Kotopu awamaneda yai piari borote. 17 Edo Peter ae John demi awamaneda ipa embo da da ainda tamonda pipiteiworo awamane Asisi Kotopu budo esitera.
18 Edo iji ainde Simon mi Yesu da piari aimbari emboboda ipami Asisi Kotopu embomainda yai pipitero gosisina, awatedo, ine ganu kundo gundo Peter ae John deda yai piain, 19 sisina, “Nato yai daedo goroba eiwa piewo! Ango awo embo nenei berari nanemi ipa tamonda piano Asisi Kotopu kumbore.”
20 Ata Peter mi ge mina sisina, “Aindabé God da kando ganumi ori ae eteta kotembeteta, awatedo, imo ae ito ganu de daedo yai beyae niyao matawa itari aveira ainda mambata! 21 God mi goteira awa, ito do awa dambu darae, awatedo, imo awa buro eiwa namondekare daedo eotekae. 22 Aindabé awa, ito jimbo bebegaeda dodo wareregedo gumbuyo! Edo God da yai benunu teyo! Ango ato ito doda kotembari bebegae awa God mi kotembedo doware. 23 Na gotena, imo awa embo neneinda rorae bain jipapa edo jitari embo. Awatedo, Satan mi ito jimbo beyaeda toda imo bundesiri iteta.
24 Ango tesiri Simon mi ainde mina sisina, “Imomane na embo Badari da yai benunu tewo! Ango awo ro awa inemane tetewo gena, awa nato yai piari gumbure.”
25 Awatedo, Peter ae John demi Yesu awa embo averi gositera awa arapada embomainde sitera edo Badari da ge embomainde jijiritera. Ainda amboda, embo tote (2)mi egenembedo Jerusalem da tuturo edo maunsite bino dave yai Samaria nasi jiwaebé da da ainda karigesimene, ango maunsitera.
Philip mi Yesu Keriso da bino dave awa Iteopia badararida yai karigesisina.
26 Edo Badari da anelami Philip de sisina, “Erido south†south. Edo ito dombu iji vitari kena pisido wareregedo ipabe kena peposite yai south inono jisimi gata. kena mambuyo! Ango eite begata Jerusalem da edo nasi Gaza kena wotari ainda pepeta ate. Begata eiwa yai abu damodamoda isira.” 27 Ango tesiri gido Philip erido maunsisina. Maunsiunte, boite, yai Iteopia embo tapusina. Embo awa badarari bajina.‡badarari bajina awa daotarida buro embo bajina edo debure kaparide. Iji matu ounde daotegeregari neneimi awamaneda buro embo bajinada debure kapedo esitera. Daotarimi awamaneda asinimai ae maingagara de dedegain jipapa eora, awatedo, ango edo esitera. Ainda amboda, awamaneda buro embo babain mi daotarida asinimai ae maingagara de ipuda ari o kombo ari tao ae. Buro embo bajina Iteopia edo gumbari eiwa Judah embo ae. Awarata, God mi embo eiwa daedo toregain jipapa esisina (Isaiah 56:3-5; Matthew 19:12; 28:19-20). Imo awa Iteopia da daotari eutu, dao Candace,§Candace awa Iteopia da daotarida ai. Awarata, eutu emi ainda daotari mainda buro babaingae bibaingae sima edo esisina. Aindabé Iteopia emboda gebé ari awa eutu ainda mai awa awamaneda god da mai, awatedo, ainda mai embo enemboda buro ainyae tedo esitera. da buro embo. Edo Candace da ganu berari awa ami sima edo esisina. Badarari ami God tumondebain aintedo Jerusalem da gupusina. 28 Ainda maundo tumondebain itae edo ainda nasida tenda overegeteite embo awa ombo mada*ombo ma ango wo hosi mi dumundo esitera. anumbedo isite ove gaiari matu peroveta Isaiah da awa ajijigesisina. 29 Edo Asisi Kotopu mi Philip de sisina, “Imo maundo ombo ma ounda atutumbedo ainde daedo mambuyo!”
30 Ango tesiri Philip mi ombo mada ongo kena tumundo maundo atutumbesiri embo ami peroveta Isaiah da ove gaiari awa ajijigeteiri ingisina. Awa ingido Philip embo ainde tedogosisina, “Ge ine ajijigeteta awa ito yai arapa eirita?”
31 Edo embo ami mina sisina, “Na ge eiwa nongo edo gano arapa aini da bé awa embo neimi udugedo tari nato yai arapa aina ami?” Ango edo Philip visido ainde daedo anumbarate sisina.
32 God da Ge Gaiari badararimi ajijigesisina awa engo:
“Embo awa wo sipu†wo sipu awa wo embomi iji matuda edo gundo boroko sima edo era. Embomai wo sipuda tu gongo edo era edo pisi injido era, awatedo, embo jiwae wo sipu jipapa edo era. Aindabé wo sipuda goroba awa bajinabé ae, edo awamaneda gitopo wo isima edo era awa, wo sima ari embo dave awa ainda sipumane iji berari sima davebé eite dedegedo eira. ango embomaimi gisijido kundo maundo gaiaro betaina,
edo dá ango, wo sipu mai iji angode embomaimi ainda tu kapedo era, ge da ji itae,
embo awa ainda be pirigae.
33 Awamane embo awa tedojijireite kundo maundo katari embode ge pitawa ainda daoda tara.
Awamane ainda wasiri butuda awa kaparo itae aina.
Awatedo, embo da ji aimi ainda mamainda ge jirari tao ae.”Isaiah 53:7-8
34 Edo Badarari ami Philip de tedo sisina, “Na imonde tedogotena, peroveta ge eiwa embo bé ande sisini? Imo akuta awa embo sisinita ko embo nei awa embo sisini?” 35 Edo Philip tuturo edo God da Ge Gaiari da ge eiwa edo embo ainde Yesu da bino dave awa karigesiri gosisina.
36 Ango edo awamane begatada auntero jiriri gundo unda esitera. Edo badararimi sisina, “Un isira eire. Gi! Na bapataito ae etesita?”
37 Edo Philip ainde mina sisina, “Imo edo gido dogomo berarimi bino dave eiwa gebé ata gido, na imo bapataito ana.”
Ango tesiri mina sisina, “Na gebé ena, Yesu Keriso awa God da Mai.”‡Gano einda ge awa davebé, ata Guriki da ove gaiari matu nenei ge eiwa piae doturitera.
38 Awatedo, ombo ma petarate ainda ma jiari embode ge okain sisina. Tesiri petesiri gido Philip ae badarari de daedo wotedo unda aimbero Philip embo awa bapataito esisina. 39 Edo awamane unda edo vitero Badari da Asisi mi burigibé Philip kundo yai neinda maunsisina. Edo badarari embo awa tekago gae esisina. Ata iji ainde, aindabé God imo tonembesisina, badarari doyawa bajinabé eite dodo aunsisina. 40 Awarata, Philip Azotasi nasida idegesisina. Edo nasi ainda tuturo edo aundo nasi babain berarida torido idegedo eite bino dave awa simene maundo Seseria nasida gupusina.
*8:3 Samaria embomai awa ororo baige ari edo god evekara dasiga edo esitera. Awatedo, Judah embomai jiwae Samaria embomai jipapa ae edo esitera. Awarata, God mi embomai eiwamane daedo tonemain jipapa esisina (Matthew 28:19-20; Mark 16:15).
†8:26 south. Edo ito dombu iji vitari kena pisido wareregedo ipabe kena peposite yai south inono jisimi gata.
‡8:27 badarari bajina awa daotarida buro embo bajina edo debure kaparide. Iji matu ounde daotegeregari neneimi awamaneda buro embo bajinada debure kapedo esitera. Daotarimi awamaneda asinimai ae maingagara de dedegain jipapa eora, awatedo, ango edo esitera. Ainda amboda, awamaneda buro embo babain mi daotarida asinimai ae maingagara de ipuda ari o kombo ari tao ae. Buro embo bajina Iteopia edo gumbari eiwa Judah embo ae. Awarata, God mi embo eiwa daedo toregain jipapa esisina (Isaiah 56:3-5; Matthew 19:12; 28:19-20).
§8:27 Candace awa Iteopia da daotarida ai. Awarata, eutu emi ainda daotari mainda buro babaingae bibaingae sima edo esisina. Aindabé Iteopia emboda gebé ari awa eutu ainda mai awa awamaneda god da mai, awatedo, ainda mai embo enemboda buro ainyae tedo esitera.
*8:28 ombo ma ango wo hosi mi dumundo esitera.
†8:32 wo sipu awa wo embomi iji matuda edo gundo boroko sima edo era. Embomai wo sipuda tu gongo edo era edo pisi injido era, awatedo, embo jiwae wo sipu jipapa edo era. Aindabé wo sipuda goroba awa bajinabé ae, edo awamaneda gitopo wo isima edo era awa, wo sima ari embo dave awa ainda sipumane iji berari sima davebé eite dedegedo eira.
8:33 Isaiah 53:7-8
‡8:37 Gano einda ge awa davebé, ata Guriki da ove gaiari matu nenei ge eiwa piae doturitera.