22
“Nanonameji ae mamono de, na torari ge eiwa ingiwo!” Edo iji ainde Paul mi Hiburu gemi tesiri ingido, awamane bé ge tokain takain etero Paul ge tedo sisina:
“Na awa bé Judah embo. Nasi Tasus awa nato engari nasi yai Silisia ainda doda. Ata Jerusalem einda gundo ginuma eite babojitena. Edo Gamaliel nato yai ewowo gawowo kaenatoda aodari berari awa kera anate atopaposisina. Edo na awa dá imomane berari boroko God da aodari udugedo kera edo ewa ango. Edo na God dave edo kera ain jipapa bajinabé esitena. Ango edo nanemi Badari da Begata ambo ambo ari embomai, awamaneda yai memesi neindekainde piono betora. Edo embo de eutu de bundedo kundo maundo bundari oroda piedo esitena. Edo pirisida gisijiari bajina ae Judah embomainda orobeda kopuru mamai berari demi na awa embo ge tari tao ari, ge ro nane tetena awa gebé. Awamanemi ove nenei awamaneda Judah otatawode Damasikas nasi ounda itera awa gaiedo pietero na buritena. Edo na ove awa kundo Damasikas nasida maunsitena. Ango edo Badari da Begata ambo ambo ari embomai ounda asi okain aurimi ari ami bundedo kundo Jerusalem einda gundo awamaneda rirowa borote sitena.
“Ango edo na pepeta edo gundo Damasikas nasi ainda aikae eno iji toropu eiri, burigibé pararabé parara utuda edo wotedo nato yai datembesisina. Edo na butuda durudo ge siri yavi ingitena, ‘Saul, Saul! Ro awa embo memesi neindekainde namonde pisido esi?’
“ ‘Imo averi Badari?’ nanemi mina sitena.
“ ‘Na awa Yesu Nasaret Embo, ande inemi memesi neindekainde pisido eta,’ ami mina sisina. Edo embobo namonde daedo pepeta edo maunsite parara awa gido adu esitera. Ata awamanemi embo namonde ge sira ainda ge yavi dave edo gae.
10 “Nane tedogositena, ‘Na nongo ani Badari?’
“Edo Badari mi mina sisina, ‘Imo erido Damasikas maundo toriyo! Yai ainda imonde buro ro berari atate God mi avigesisina awa, tari gata.’ 11 Edo pararabé pararami esiri jisi nato guba esisina. Ango esiri embobo na daedo pepeta esitera ami na ipada jido kundo maundo Damasikas totoritera.
12 “Ango edo nasi ainda embo dao Ananias isinesina. Edo embo awa God tou eite ainda aodari ambo ambo edo esisina. Awatedo, Judah embomai yai ainda imo tou ikanebé edo esitera. 13 Edo embo awa gundo nato demonda petedo namonde sisina, ‘Nameji Saul, ito jisi dave ari tenda bu!’ Edo iji dá ainde na pangedo embo awa gositena.
14 “Ango edo embo ami sisina, ‘Ingenato ewowo gawowoda God mi imo avigesisina awa ainda udojipapa gatate. Edo daedo ami imo avigesisina awa ainda Embo Wasiri Dambu Darari gido, edo ainda beda ge yavi ingatate. 15 Edo ainda yai ro jisimi gido dengoromi ingeta imo embo berarida yai karigato gara. 16 Edo boroko, imo ro sima esi? Eriyo bapataito ari ito bate. Badari da daoda gebé eite benunu teyo. Edo Badari mi ito jimbo bebegae kotembedo dowari itae are.’
17 “Ainda amboda, na egenembedo Jerusalem maundo Judah embomainda oro kotopu bajinada torido benunu site awa garago girago gositena. 18 Edo yai ainda na Badari goteno ami namonde sisina, ‘Embomai yai einda na awa averi inemi awamanede karigata awa, gebé ae ara. Awatedo, burigibé Jerusalem ainda idegedo mambuyo!’
19 “ ‘Badari,’ nane sitena, ‘awamane awa garibé nane Judah embomainda benunu oro jiwaeda torido maundo awamane ainkaimi imo gebé eiworo awa bundedo vededo esitena. 20 Edo iji angode ito bino karigari embo Stephen detero besisina, na daedo yai ainda petedo isite awara ari pipisitena. Edo embomaimi Stephen detero beteiri awamaneda dademo ombari nato yaida pietero sima esitena.’
21 “Edo Badari mi namonde sisina, ‘Nanemi imo yai aikamanabéda piano Judah embomai aeda yai mambata. Awatedo, mambuyo!’ ”
Paul mi “Na Rome ainda engari,” karigesisina.
22 Edo embomai Paul da ge matawa ingite itero embo ami ge ango sisina. Ata iji angode ge eiwa gido awamanemi tuturo edo ge yavi ikanebé tedo esitera, “De betare! Embo eiwa butu einda itari tao ae!”* Aindabé Paul mi, imo Judah embomai aeda yai maundo God da ge karigaina sisina awa, Judah embomai ge awa ingido sinigambari bajinabé esitera. Awamane kotembesitera awa Paul mi site sisina, Judah embomai edo Judah embomai ae awa tega dá awara God da jisida. Ata Judah embomai gebé edo esitera, awamane akuta awa God da avigari embomai. Awatedo, awamanemi Paul de sinigambari bajinabé esitera.
23 Ango edo awamanemi sinigambari eite aorogatedo awamaneda dademo ombari kokumbedo Paul dari iwata eite konipo kundo ikane agaugesitera. 24 Aindabé, Judah embomai aoro bajinabé gateite embo ainde sinigambaribé era, awatedo, Rome da itoroda badarimi ainda embobode ge okain sisina, Paul kundo gundo awamaneda oroda piorote. Edo awamanede sisina, Paul awa bajinabé vededo ge okain taro embo ainda buriyabé rori awa tari gain. 25 Ango edo awamanemi embo awa ipatai ududugedo bundedo vedain esitera. Ata Paul mi itoroda gisijiari demonda petedo isiri ainde sisina, “Imo Rome da aodari dato erigari na vedain esita? Na awa Rome embo. Rome embo. Iji ounde, edo imo ‘Rome embo’ da dao bain jipapa esiteta, begata tamonde (3) akuta imo inono ambo ambo edo bata: 1) Edo gido imo buro davebé dave Caesar awa embo ata, ami dao ‘Rome embo’ ito yaida piae esira; 2) Edo ganu ito awa jiwaebé, inemi Rome da gisijijiegarida yaida maundo ‘Rome embo’ da dao oriae eteta; 3) Edo ito aimamo awa Rome embomai bé, imo inono ‘Rome embo’ da dao daedo bata. Edo embo da aimi nato buriya awa gisi katae.”
26 Ango edo itoroda gisijiarimi ge eiwa ingido itoroda badarida yai maundo embo ainde tedogosisina, “Imo ro esi? Embo eiwa Rome embo.”
27 Edo itoroda badarimi Paul da yai gundo ainde sisina, “Namonde te! Imo awa Rome embo ta?”
Ami mina sisina, “Gebé.”
28 Edo itoroda badarimi sisina, “Nato Rome emboda dero eiwa ganu bajinabémi oriesitena!”
“Ata nato mamo ae ai de awa Rome embobo,” Paul mi mina sisina.
29 Iji dá ainde, embobo ainkain Paul da yai gundo imo buriya rori awa taro tari gain eite, burigibé awamane Paul dodo yai eve idegesitera. Edo aindabé itoroda badarimi Paul matu bundedo ainda amboda gidogogo edo Paul awa Rome embo, imo daedo adu esisina. imo daedo adu esisina. Iji ainde Paul isinesina, Caesar mi yai jiwaebé sima edo esisina. Daedo, embomai avekave Caesar da sima ari doda isima edo esitera, Rome da aodari neindekaindemi awamane dave edo dedegedo esitera. Rome da aodari da (1) awa, edo embo neimi imo bekumba aina, embo awa imo katari yai mambae gisida mana vedaina. Ata gisibé imo ae embo neinde katari yaida mambawa. Ainda amboda, katari embomi ge katedo itae edo imo udegaina ko vedaina. Awarata, bekumba embo aimi imo katae dodo imo boraebé vedaina, Rome da itoro embomi rirowa bajinabé ainda yai piara.
Paul mi Sanhedrin kundo evekara esisina.
30 Edo itoroda badarimi ro embo Judah embomaimi Paul bekumba eteri awa gain esisina. Awatedo, sipo neinde, ami ge tesiri ainda embobomi Paul da asi okain aurimi ari awa kundo teugesitera. Edo daedo itoroda badarimi pirisi babain ae awamaneda Sanhedrin embobo berari de ge okain tedo gumborote sisina. Edo awamane gundo doregetero itoroda badarimi Paul kundo wotedo awamaneda dombuda piesiri peposisina.

*22:22 Aindabé Paul mi, imo Judah embomai aeda yai maundo God da ge karigaina sisina awa, Judah embomai ge awa ingido sinigambari bajinabé esitera. Awamane kotembesitera awa Paul mi site sisina, Judah embomai edo Judah embomai ae awa tega dá awara God da jisida. Ata Judah embomai gebé edo esitera, awamane akuta awa God da avigari embomai. Awatedo, awamanemi Paul de sinigambari bajinabé esitera.

22:25 Rome embo. Iji ounde, edo imo ‘Rome embo’ da dao bain jipapa esiteta, begata tamonde (3) akuta imo inono ambo ambo edo bata: 1) Edo gido imo buro davebé dave Caesar awa embo ata, ami dao ‘Rome embo’ ito yaida piae esira; 2) Edo ganu ito awa jiwaebé, inemi Rome da gisijijiegarida yaida maundo ‘Rome embo’ da dao oriae eteta; 3) Edo ito aimamo awa Rome embomai bé, imo inono ‘Rome embo’ da dao daedo bata.

22:29 imo daedo adu esisina. Iji ainde Paul isinesina, Caesar mi yai jiwaebé sima edo esisina. Daedo, embomai avekave Caesar da sima ari doda isima edo esitera, Rome da aodari neindekaindemi awamane dave edo dedegedo esitera. Rome da aodari da (1) awa, edo embo neimi imo bekumba aina, embo awa imo katari yai mambae gisida mana vedaina. Ata gisibé imo ae embo neinde katari yaida mambawa. Ainda amboda, katari embomi ge katedo itae edo imo udegaina ko vedaina. Awarata, bekumba embo aimi imo katae dodo imo boraebé vedaina, Rome da itoro embomi rirowa bajinabé ainda yai piara.