1 Kaena bundarida isima edo esitera, ata Keriso mi kaena udegesiri udegari buritera. Awatedo ainda petedogogo ewo, edo amboka*amboka awa kariwa ge. Ainda moka einda awa aodari berari God mi ainda embomai awaembo Moses de pipisisina. da bundarida tenda wareregainyae. 2 Giwo! Na Paul mi ge eiwa imondemane tena. Edo imomane tamo jiugari†tamo jiugari awa mai jianda ko embobéda tamo kotopuda ainto kapari. God mi Abraham de ango arate atopaposisina (Genesis 17:9-14). Tamo jiugarida kariwa ami Abraham da orobe kondade edo esisina awamane awa God da embomai kotembu kotembu orote (Genesis 12:1-3; 15:1-6). bawa gido awa, buro ro Keriso mi imomane embo matu esisina ami imomane kondade ari tao ae. 3 Edo nane tenda imondemane karigetena awa, embo berari ainmi tamo jiugari baina awa, imo aodari‡aodari da moka awa aodari berari God mi ainda embomai awaembo Moses de pipisisina. berari awa kera arateyo, da ji dowainyae. 4 Imomane ainkain aodari kera arimi wasiri dambu darari God da jisida bain edo ewa, imomane Keriso ajiregedo God da dave ari awa gunjindewa. 5 Ata kaenato gebé ari Keriso da yai piedo era. Awatedo God da Asisi mi kaena kondade euri kaenanemi God da wasiri dambu darari berari ainda yai awa bain tumonda eite sima edo era. 6 Nakaena awa Keriso Iesu da doda, awatedo kaenato tamo jiugari ko jiugae awa tepobé God da jisida. Ata rorae bajinabé bajina awa kaenato gebé ari God da yai. Edo gebé ari ami ari kaena embomai nenei dubobudo ara.

7 Itomane gebé ari Iesu da yai pisido embo awa tuturo edo davebé ambo ambo edo esitewa. Embo ainmi gundo itomane yai ge pitawa tesiri God da gebé awa doturitevi? 8 God mi imomane dao sisina. Ata embo ainmi itomane do ge pitawami jido wareregain jipapa eira, God da yai edo gumbae. 9 Edo kotembewo! “Bread badari siwo saka palawa doda pioro ami palawa berari awa kumburi bajido eira.”§Kariwa geda moka einda awa atopatari pitawa saka ami inono Iesu da embomai berarida gebé ari yai Galesia ainda usibesi aina. 10 Nato gebé ari awa Badarida yai edo itomane yaida. Awatedo kotembari nato awa inemane ajiregedo embo neida ge ambo ambo ainyae awa. Edo embo ainmi ge pitawa imondemane tedo eira na gae, ata God mi embo ainda yai rirowa piaina. 11 Nato nanonameji, edo na awa tamo jiugari boroteda ge embomaide matawa karigedo ena, ro awaembo awamanemi memesi neide kainde nato yaida piedo eri? Awarata, nane ge eiwa karigedo ena: aindabé Keriso oregada kaena embo besisina akuta awa, God mi ainda wasiri dambu darari kaenato yai piari tao. Nane ge awawa karigedo ena, awatedo awamanemi namonde sinigambari edo era. 12 Na jipapa ena awa embomai ainkain buriya itomane yai pisido era ami awamane akuta kautugara.*awamane akuta kautugara. Ove Kotopuda atopapasigari jiwaemi kotembedo era awa, Paul mi ge pitawa tari embobode sinigambari eite kariwa ge eiwa sisina. Edo geda moka awa Paul jipapa esisina awa ge pitawa tari embobo ami akuta awamaneda debure kautugara.

13 Nato nanonameji, God imomane dao sisina aodarida tuda udegari bawate. Awatedo God da jipapa awa itomane udegari awa tamopisida jipapa bebegae awaembo jigamo ainyae, ata inemane dubobarimi kondade mina ara edo ewo. 14 Edo aodari berari awa ge okain da (1)mi apuregesisina: “Nembu ito awa dubobudo eyo dá imo akuta dubobudo eta ango.”Leviticus 19:18 15 Awarata, edo imomane abu wo angomi mina gamba eite, edo mina inda eite edo ewa awa, gidogogo ewo ko imomane akuta awa usibesi awa!

16 Edo nanemi imondemane eiwa tena, God da Asisi da gisijiarida begatada pepeta ewo. Ango eite tamopisida jipapa bebegae awa da ji mana awa. 17 Edo tamopisida jipapa bebegaemi God da Asisi de duduno edo eira, edo God da Asisi mi tamopisida jipapa bebegae de awa duduno edo eira. Edo eiwamane tote (2) awa gitopo embo, awatedo buro dave imomane jipapabé edo ewa awa, iji berari edo ae. 18 Ata edo God da Asisi mi imomane gisijido eira, imomane awa aodarida sima arida tuda itae.

19 Edo embomaida tamopisida jipapa bebegaeda jimbo awawa kaenane arapada gido era awa: ipuda ari, jimbae gisida kombo ari, iwata ari donode God da jisida, kombo tepotapo bebegae ari, 20 god ove kewarida tumondebain ari, kae jijieite begá piari, sinigambari ari, ge baiarida jipapa ari, embo neida dero goteite dumo ari, sinigambari tepotapo ari, nana tari, embo neneida béga usibesi ari, embo da (1)mi embo nenei ge pitawami kundo dada edo gisijiari, 21 embo neida rorae bain jipapa ari, embo nei dari betari, un okain jiwaebé injido dutari, ondo bondo eite kombo tepotapo ari, edo iwata kawata ango ari. Edo boroko imondemane tena, dá ango imondemane matu sitena, embomai ainkainmi iwata kawata ango edo era awa, God mi ainda gisijiari yaida bari tao ae.

22 Ata God da Asisi mi ni be engogo emboda yai pisido eira: dubobari, yawa ari, béga, tataimbari, kondade ari do, buro dave ari, gebé ari, 23 netegari edo akuta dedegari. Edo embomai kotembari edo iwata kawata ari ango edo era ami aodari da ji dari erigari tao ae. 24 Edo Keriso da embomai awa ango berari ainkain awamaneda wasiri bebegae awa oregada detero besitera, edo awamaneda tamopisida udojipapa bebegaemi awamane gisijiari tao ae. 25 Ainda edo God da Asisi mi wasiri teka kaenato yai pipisisina, awatedo kaena God da Asisi da gisijiarida begatada ainto ore. 26 Kaenato dao akuta jiaro visiure. Kaena mina isimba eore, edo embo neneida rorae bain jipapa eore.