2
Edo embo nei gido, “Imo awa embo dave,” o “Imo awa beyae,” engo kotembove.
Nato nanonameji,* Nato nanonameji. Kondade ari ge James 1:2da tuda giwo. itomane gebé ari kaenato Badari Iesu Keriso, Badari taogaride, da yai matu pipisitewa edo matawa pipitewa. Awatedo tou ari evekara embo kariwa davede o kariwa beyaede eovekae. Gebé, edo embo da (1) ombarijiari davebéde itomane doregarida toraina, edo daedo mapa embo ombarijiari bebegae donode awa toraina, edo imomane embo ombarijiari davebéde jisimi udugedo gido ainde tawa, “Gumbu! Anumba dave einda anumbate,” ata mapa embo ombarijiari donode ainde tawa, “Umbugo dá ounda pete” o “Butu dá tai nato demonda anumbe,” inemane itomane doregari akuta kapetewo evekara esira, edo kotembari bebegaemi embomai katetewa.
Nato dubobari nanonameji ingiwo! Embomai avekave God mi gerisina awa, embomaimi “embo rorae isisigae” dao tedo era. Ata aindabé awamaneda gebé ari God da yai pipisitera, God mi awamaneda yai ao ari jiwaebé piaina. Edo awamanemi God dubobudo era, awatedo God mi awamanede tarigari sisina, ainda gisijiari ainda gisijiari da moka awa tote (2): (1) Iji boroko einde awa rorae davegave God mi ainda embomaida yai pisido eira. (2) Iji amboda awa wasiri beyamanabé God mi ainda embomaida yai piaina iji ainde utuda maundo awamaneda Daotari God de daedo itara. awa bara. Ata imomane embo rorae isisigae awa tou ae edo ewa. Eiwa kotembewo! Embo gaiapademi itomane yai memesi neide kainde pipiteite imomane jido dumundo kundo maundo katari emboda doda pisido era. Edo awamanemi ge bebegae Iesu Keriso, embo dave da yai, tedo era, edo imomane awa ainda topo.
God da gisijiarida aodari God da gisijiarida aodari da moka awa God, Gisijiari Bajina, ami ainda embomaide aodari eiwa pipisisina, edo aodari eiwa awa bajinabé bajina. da Ove Gaiari tari isira awa, “Nembu ito awa dubobudo eyo dá imo akuta dubobudo eta ango.” Leviticus 19:18; Matthew 22:39 Edo imomane ge awa kerabé edo awa gido, imomane dave edo awa. Ata inemanemi embo nenei tou edo awa, edo nenei tou ae edo awa gido, imomane jimbo edo awa. Ango awo aodarimi imomane awa aodari dari erigari embomai ango arapa aina. 10 Berari ainmi aodari berari awa kera edo eira, edo aodari da bé dari erigaina awa ango embo ami aodari berari awa desiri erigesira. 11 God mi sisina awa, “Ipuda eote,” Exodus 20:14; Deuteronomy 5:18 edo daedo, “Dato beteure.” Exodus 20:13; Deuteronomy 5:17 Awatedo imo ipuda ae, ata embo dato betaina awa, imo aodari dari erigari embo ata.
12 God da aodarimi kaena jimbo beyaeda bundarida edo udegedo eira, edo God mi aodari ami kaena kataina. Awatedo inemane embo neneide ge dave tedo ewo, edo iwata dave edo ewo. 13 Embo da ainmi embo nenei do ari itae aina gido awa, katari iji ainde, God embo awa do ainyae. Ata embo da ainmi do ari embo neneida yai edo aina, katari ijide God mi embo ainde bekumba ge tainyae.
Embo da ainmi ainda iwata kawata dave embo neneida yai awa itae, ainda gebé ari awa betari.
14 Nato nanonameji, embo da ainmi taina, “Na God gebé ena,” ata ainda iwata kawata dave embo neneida yai awa itae, gebé ari awa inono imo toregainita?§ gebé ari awa inono imo toregainita? Ge einda moka awa imo gebé ari angomi God da rirowa daginegari tao ae. Ango ae! 15 Edo itomane nameji o ru,* nameji o ru. Aindabé James awa daedo Iesu gebé ari Jew embo, ami Iesu gebé ari Jew embomai dao engo awamanede tari tao esisina. Kondade ari ge nei James 1:1da tuda giwo. awamaneda ombarijiari itae, edo awamaneda indari rorae deguta da da indara awa itae, 16 edo itomane doda embo da (1)mi awamanede taina, “Dave edo mambuwo! God mi dademo ombari ae indari rorae de imondemane piaina,” ata inemane rorae ro awamane jipapa era awa piae, itomane kondade ari awamaneda yai awa itae. 17 Awatedo dá ango, embo ainmi embo neneide iwata kawata dave ae edo eira, ainda gebé ari God da yai awa itae, edo ainda gebé ari awa betari.
18 Ata embo neimi taina, “Ito gebé ari isira, edo nato iwata kawata dave isira.”
Gebé ari ito iwata kawata dave itae awa eyo gido mina nanemi iwata kawata davemi gebé ari nato awa ano gate. 19 Imo God dakaima akuta isira awa gebé edo eta. Awa dave. Bibinei dá ango gebé edo era, edo awamane adumi ipatai jipedo era!
20 Ata jiro kotembari itae embo, inemi jipapa eta nane ano gate awa, embo ainmi iwata kawata dave embo neneide ae edo eira, ainda gebé ari awa betarita? 21 Ewowo kaenato Abraham awa giyo! Imo ainda mai Isaac awa kundo maundo God de rorou dungari tenembada pipisisina. Genesis 22:1-18 Awatedo ainda iwata kawatami imo awa embo wasiri dambu darari arapa esisina. 22 Abraham da gebé ari God da yai ae ainda iwata kawata de daedo buro dada edo era ami imo kondade esiri ainda gebé ari inono bé esisina. 23 Edo God da Ove Gaiarida ge awa esiri bé arapa esisina, “Abraham da gebé ari God da yai pipisisina, awatedo God mi ainda wasiri dambu darari awa Abraham de pipisisina.” Genesis 15:6 Edo God mi Abraham awa ainda otawo sisina. 2 Chronicles 20:7; Isaiah 41:8 24 Awatedo imomane gotewa awa, emboda gebé arimi akuta ainda wasiri dambu darari arapa ari tao ae, ata ainda iwata kawata ari daedo ami ainda wasiri dambu darari arapa edo eira.
25 Edo kariwa dá ango awa ipuda ari eutu Rahab. Iji ainde ine Israel embomaida simagari embo tote (2) budo begata neida piesiri idegedo maunsitera, ainda iwata kawata ami ainda wasiri dambu darari awa arapa esisina. Joshua 2:1-21; Hiburu 11:31 26 Awatedo, dá ango tamo asisi itaede awa betari, gebé ari iwata kawata dave itaede awa betari.

*2:1 Nato nanonameji. Kondade ari ge James 1:2da tuda giwo.

2:5 ainda gisijiari da moka awa tote (2): (1) Iji boroko einde awa rorae davegave God mi ainda embomaida yai pisido eira. (2) Iji amboda awa wasiri beyamanabé God mi ainda embomaida yai piaina iji ainde utuda maundo awamaneda Daotari God de daedo itara.

2:8 God da gisijiarida aodari da moka awa God, Gisijiari Bajina, ami ainda embomaide aodari eiwa pipisisina, edo aodari eiwa awa bajinabé bajina.

2:8 Leviticus 19:18; Matthew 22:39

2:11 Exodus 20:14; Deuteronomy 5:18

2:11 Exodus 20:13; Deuteronomy 5:17

§2:14 gebé ari awa inono imo toregainita? Ge einda moka awa imo gebé ari angomi God da rirowa daginegari tao ae.

*2:15 nameji o ru. Aindabé James awa daedo Iesu gebé ari Jew embo, ami Iesu gebé ari Jew embomai dao engo awamanede tari tao esisina. Kondade ari ge nei James 1:1da tuda giwo.

2:21 Genesis 22:1-18

2:23 Genesis 15:6

2:23 2 Chronicles 20:7; Isaiah 41:8

2:25 Joshua 2:1-21; Hiburu 11:31