12
Mary mi Iesu da taida gama muno davede dasisina.
(Matthew 26:6-13; Mark 14:3-9)
1 Edo deguta 6 Darutegari Bondo gisida, Iesu Betani nasida gupusina. Yai ainda Lazarus isinesina. Embo awa gisi betari ata Iesu mi betarida jiri erorisina. 2 Edo yai ainda awamane turo indari Iesu awaembo siya esitera. Edo Martha indari jipusina, ata Lazarus ae embo neneide daedo Iesu de tenembada anumbesisina. 3 Edo Iji ainde Mary gama muno daveda sigi tega litre kupo da (1) ango kundo gupusina. Gama berari awawa nya dao ‘nard’ akutami siya ari edo awa mina bajinabé piedo bari rorae. Edo Mary gama ami Iesu da taida dasisina, edo ainda kopuru tumi Iesu da tai gaigesisina. Edo embomai berari mando doda isite ainda muno dave awa miputera.
4 Ata ainda ambodani da (1), Simon da mai Judas Iscariot (Amboda embo awa Iesu budo ainda gitopo emboboda ipada piaina.) ami sisina, 5 “Ro awaembo gama muno dave eiwa embo neide piedo ganu*ganu. Ganu da da da tega awa emboda tau edo gido imo deguta da (1) ganu buro aina. 300 budo awa embomai rorae isisigaede piae dosiri?” 6 Edo embo ami ge eiwa tesira, aindabé embomai rorae isisigae awa sima ain jipapa ae, ata aindabé embo awa beono embo. Embo awa ganu mauwada sima ari embo, edo ganu ro embomaimi pioro imo kundo beono evina.
7 Ata Iesu mi sisina, “Eutu awa do. Eutu ami nato goiari deguta awaembo muno rorae eiwa budo sima edo esira. 8 Imomane iji matawa embomai rorae isisigae de daedo isima edo ewa, ata imomane iji matawa namonde daedo itari tao ae.”
Pirisi babain mi Lazarus daro betarate ge jijiritera.
9 Edo iji ainde Jew embomai jisi bajinami Iesu yai ainda isira ge awa ingido guputera. Awamanemi imo akuta gain gumbae, ata daedo Lazarus awa ami betarida jiri erorara awa gain. 10-11 Ata Jew embomai jiwaemi embo awa gido pirisi babain dodo maundo awamaneda gebé ari Iesu da yai pisido esitera, awatedo pirisi babainmi daedo Lazarus daro betarate ge jijiritera.
Iesu taogaride Jerusalem totorisina.
(Matthew 21:1-11; Mark 11:1-11; Luke 19:28-40)
12 Edo aveunte embo jisi bajina matu bondoda guputera, ami Iesu awa Jerusalem gupeira awa ingitera. 13 Edo awamanemi mutari igi angogo budo idegedo embo awa tamain aunteite tenda tenda aorogatedo sitera,
“Hosanna!†Hosanna awa Hiburu ge edo ainda moka iji matuda awa “Nakare toregewasi!” Ata ainda amboda embomaimi moka teka “Nakare imo dasiga era!” ainda yai piedo esitera. ‘God da ao ari embo einda yai itare!
Embo eiwa Badari‡Badari awa God da dao da (1). Ainda moka awa ‘Na awa Natopo Itari’ (Exodus 3:14-15). Ge Moka Teteka, ove gaiari einda gunda awa daedo giwo. da daoda gupeira!’Psalm 118:25-26
Israel embomaida Daotariǃ”
14 Edo Iesu wo donki§wo donki awa hosi [English: horse] ango, ata awa saka. Edo embomaimi wo awa rorae bouga kundo mambarida buro awaembo jigamo edo era. vete tamundo ainda gunda anumbesisina, dá Ove da Gaiarida isira engo,
15 “Adu eove, nasi Zion da gagara,*nasi Zion da gagara. Zion awa Jerusalem da dao nei. Edo nasi Zion da gagarada moka einda awa Israel embomai.
Giwo, itomane Daotari awa
wo donkida mai gunda anumbedo gupeira.”Zechariah 9:9
16 Edo iji gisi ainda ambodani God da ge eiwa kotembae arapa ae. Ata ainda amboda God mi Iesu utuda jiri visido ainda taogari burisina. Edo iji ainde, awamanemi Ove Gaiarida ge imo embo engo tari isira awa kotembesitera, edo awamanemi buro dá engo imo embo esitera.
17 Edo iji ainde Iesu mi Lazarus dao tesiri ainda ude dodo betarida erorisina, embomai jisi da (1) Iesu de daedo itero ainda buro gositera. Edo awamanemi embomai neneida yai ge awa karigedo esitera. 18 Edo embomaimi ingido awa, embo ami kariwa eiwa esisina, awatedo awamane daedo maundo embo awa taputera. 19 Ango edo Parasi manemi ge mina tara esitera, “Kaena embo awa engiregari tao ae. Giwo, embomai butu berarida ami imo ambo ambo eteraǃ”
Iesu ainda betari karigesisina.
20 Edo iji ainde embomai tumondebain ain bondoda gupero Guriki embo nenei awamaneda toropuda daedo guputera. 21 Ango edo awamane Philip da yai guputera. (Embo awa yai Galili da, Besaida nasi embo.) Edo awamanemi ainde tedogosite sitera, “Embo bajina, nakare Iesu gain jipapa era.” 22 Edo Philip gundo Andrew de awamaneda jipapa awa sisina. Edo Philip ae Andrew demi ge dá awa Iesu de sitera.
23 Ata Iesu mi awamanede mina sisina, “Ora awa gumbira awa God mi Embo da Mai da taogari awa arapa aina. 24 Eiwa awa gebé bajina imondemane tena. Edo wheat vero da (1) butuda durudo betae aina awa, vero da (1) akuta itaina. Ata betaina gido awa, tenda erido vero jiwae ekaina. 25 Embo ainmi ainda wasiri jiain jipapa aina gido awa dadoegaina, edo ainmi ainda wasiri butu einda jiain jipapa ae gido awa wasiri natopo itari baina. 26 Embo ainmi na awaembo buro aina, embo awa na ambo ambo arate tena. Edo yai nonda na itena awa, nato buro embo daedo itaina. Embo da ainmi na awaembo buro aina awa, embo awa Mamo natomi tou aina.
27 “Boroko nato do buriya eira, edo nongo tani? Mamo na torege ora einde ta? Ango ae. Na eiwa embo ora einda guputena. 28 Mamo ito dao taogiyo!”
Edo ge yavi utuda edo gupusina, “Na matu taogena, edo tekago taogana.” 29 Awatedo embo jisi da (1) ainda petedo isite ge yavi awa ingitera. Edo awamanemi mina tara edo esitera, “Dudu jipeira.” Edo neneimi tedo esitera, “Anelami embo ainde ge sira.”
30 Edo Iesu mi mina sisina, “Ge yavi eiwa na awaembo gumbae, ata imomane embo. 31 Boroko awa embomai butu einda katari iji. Boroko butu einda gisijiari awa ondari idegaina. 32 Edo iji ainde na awa awamanemi butuda edo jiaro vitana, nane embomai butu dededa do dumano nato yaida gumbara.” 33 Ge eiwa sisina ami imo betari ango betaina awa karigesisina.
34 Edo embo jisi da (1)mi ainde mina sitera, “Nakare Aodarida edo ingitera, Keriso awa natopo itaina. Nongo nongoda edo Embo da Mai awa jiaro vitarate tesi? Embo da Mai eiwa averi?”
35 Edo Iesu mi awamanede sisina, “Iji riboribé ae parara itomane yai itaina. Iji ainde parara itomane yai isiari pepeta ewo, muyae imomane apuregeurekae. Embo ain muyaeda pepeta edo eira awa, yai nonda aunteiri awa imo gae. 36 Dá parara itomane yaida isira angode awa, itomane gebé ari pararada yai piewo, imomane pararada mamai ave.” Ge eiwa Iesu mi tedo awa dodo awamanemi giworekae yai eve aundo onjigesisina.
Jew embomaida babadegari jiwaebémi awamaneda gebé ari Iesu da yai piae.
37 Edo Iesu mi kariwa jiwae awamaneda dombuda esisina, awarata awamaneda gebé ari ainda yai piae. 38 Ango edo ge eiwa peroveta Isaiah mi amboda gumaina sisina, awa gundo bé esira:
“Badari, embo ainmi bino kaenato eiwa gebé esiri?
Edo embo anda yaida Badari mi ainda goroba ari arapa esiri?”Isaiah 53:1
39 Awatedo awamanemi Iesu da ge ingido gebé ari tao ae, aindabé God mi Isaiah da toda ge nei daedo sisina:
40 “Nanemi awamaneda jisi awa eteno akeimbesisina,
edo awamaneda do eteno okain esisina.
Awatedo awamaneda jisimi nato buro awa gae arapa ae esitera,
edo awamaneda do pirigedo geda mokabé arapa gae esitera.
Na ango esitena awa, awamaneda jimbo dodo nato yai wareregaro nanemi awamane gao ano kaviegeorekae.”Isaiah 6:10
41 Isaiah ge eiwa sisina iji ainde Iesu da taogari†Iesu da taogari. Guriki ge einda awa ‘ainda taogari’, ata Ove Kotopuda atopapasigari jiwae kotembedo era, ainda moka awa ‘Iesu da taogari’. gosisina, edo ainda daoda ge sisina.
Iesu mi gebé ari embomai pararada itorote jipapa eira.
42 Awarata, iji ainde Jew embomaida babadegari jiwae awamaneda gebé ari ainda yai pipisitera. Ata Parasi manemi embo ainkain awamaneda gebé ari Iesu da yai piara gido, awamane benunu oroda torari awa engiregara tedo esitera. Ango edo embo jiwae adu edo awamaneda gebé ari arapada karigae doturitera. 43 Awamanemi dasiga ari embomaimi awamaneda yai piorote awa jipapa esitera, ata God da dasiga ari borote jipapa ae.
44 Edo Iesu aorogatedo sisina, “Embo ainmi ainda gebé ari nato yai pipiteira awa, embo awa nato yai akuta ainda gebé ari piae, ata ainda gebé ari embo ainmi na piesiri guputena ainda yai pipiteira. 45 Edo embo ainmi ainda jisimi na goteira awa, embo na piesiri guputena awa goteira. 46 Na parara ango embomai butu dededa yai guputena awa, berari ainmi gebé ari nato yai pipiteira awa muyaeda itainyae.
47 “Edo embo ainmi ge nato ingido gebé ae aina, nane embo awa katainyae. Na embomai butuda katain gumbae, ata embomai butuda toregain guputena. 48 Embo da ainmi na ajiregeteite, edo ge nato awa bainyae, ainda katari embo isira. Ge nanemi tetena awa ainda katari embo, edo ami deguta beao arida embo awa kataina. 49 Edo ge nane tetena awa ge nato akuta ae, ata Mamo na piesiri guputena, ami ge ro tani edo nongo nongo tani awa ge okain namonde sisina. 50 Edo na gari, ge ro awa ami ge okain namonde sisina awa, embomaida yai wasiri natopo itari piedo eira. Awatedo ge ro awa nanemi tedo ena awa, dá ango Mamo mi namonde sisina awa tedo ena.”
*12:5 ganu. Ganu da da da tega awa emboda tau edo gido imo deguta da (1) ganu buro aina.
†12:13 Hosanna awa Hiburu ge edo ainda moka iji matuda awa “Nakare toregewasi!” Ata ainda amboda embomaimi moka teka “Nakare imo dasiga era!” ainda yai piedo esitera.
‡12:13 Badari awa God da dao da (1). Ainda moka awa ‘Na awa Natopo Itari’ (Exodus 3:14-15). Ge Moka Teteka, ove gaiari einda gunda awa daedo giwo.
12:13 Psalm 118:25-26
§12:14 wo donki awa hosi [English: horse] ango, ata awa saka. Edo embomaimi wo awa rorae bouga kundo mambarida buro awaembo jigamo edo era.
*12:15 nasi Zion da gagara. Zion awa Jerusalem da dao nei. Edo nasi Zion da gagarada moka einda awa Israel embomai.
12:15 Zechariah 9:9
12:38 Isaiah 53:1
12:40 Isaiah 6:10
†12:41 Iesu da taogari. Guriki ge einda awa ‘ainda taogari’, ata Ove Kotopuda atopapasigari jiwae kotembedo era, ainda moka awa ‘Iesu da taogari’.