12
1 Nakunum kumel kunum waneng yutaka! Kame, yu nem Sunbin-Finik em bamki kitil eisneng em kukuyemin weng kale kilele kiliko, kal kelina! 2 Yu kal keliwete: Yom suaem Sunbin-Got elo “Fein!”, danginba kebomi, bisiliw ding dim kabalak e, yom ibolow fukunin e dolo dolo kuw keyemeko, aneng matil im weng kuw gelewsomi, weng bakaminba kekabiliw dasuw-got im mit mewso yemde unemaliw te.*Abakuk 2:18-19 3 Yu kilele ibolow fukunina! Sunbin-Finik im mutuk tem ka kel alakabe kunum waneng i ki keko, “Yesus e sakoke te!”, angeko, yakok weng be nam angiw te. Kate, ki keko, “Yesus e fein Kamok Fian ete te!”, angbiliw kunum waneng biim ibolow tem ka kel Sunbin-Finik be fein alakabe te.*1 Sion 4:2-3
4 Kame yu kililina!
Sunbin-Finik e akalem bamki kitil eisneng banban mak nulo duyemkabe kate, makmak Sunbin-Finik ete kuw be te.*Ulom 12:6
5 Beemdiw, Kamok Fian em aluwbamin e banban kebe kate, makmak Kamok Fian ete kuw be te.
6 Feinka! Sunbin-Got em auk so kitil em dem e banban kekabe kate, makmak Sunbin-Got ete kuw be te.
Sunbin-Got be akalem kitil e kunum waneng nulo amen kuw amen kuw duyemkabe kasike, nu ki keko, em nulo duyemkabe aluwbamin be fein aluwkabuluw te.
7 Feinka! Sios kunum waneng num dokolew dokolew kemin beem mongom ete Sunbin-Finik be kunum waneng alik alik nulo akalem bamki kitil eisneng amen kuw amen kuw duyemkabe te. 8 Sunbin-Finik em bamki kitil eisneng be kanekote:
Mak e ibolow fukunin kal fian e,
mak e ibolow ilum e fitew dim dako, kilele keyemin ete te.
9 Makmak Sunbin-Finik ete kuw num dim kel kanebe eisneng be fein aluwbabete:
Mak e, fein ibolow fian kulamin em aluwbamin e,
mak e, wakamin kawtiw kileleyemin em aluwbamin e,
10 mak e, kitil so auk so eisneng kawtiw im kiin dim kel kemin em aluwbamin e,
mak e, Sunbin-Got em bontem dim bakamin em aluwbamin e,
mak e, “Sunbin-Finik em aluwbamin sako? Bani, aneng matil im aluwbamin sako?”, angeko, diwyemin em aluwbamin e,
mak e, mongom amen amen bakayemin em aluwbamin e,
mak e, mongom amen amen em weng famdakamin em aluwbamin ete te.
11 Alik alik bamki so kitil kulukabuluw aluwbamin be Sunbin-Finik makmak kuw nulo duyemkabe te. Ete kuw akalem ibolow fukunin geleweko, kunum waneng nulo akalem bamki so kitil eisneng be amen kuw amen kuw duyemkabe te.*1 Kolin 7:7
Kal Anggil Dim em Fakam Weng te.
12 Yu kilele ibolow fukunina! Nukalem kal anggil dim e makmak kekabe kate, anggil beem anung anung banso mak kekabe te. Beemdiw, anggil mak em anung anung banban be kal anggil makmak kuw kekabe te. Weng sang be, Kulais em kal anggil dim em fakam weng ete te. Keko beli, em kal anggil e akalem sios kunum waneng ite te.*1 Kolin 10:17
13 Yu kililina!
Suda kawtiw yukati,
Suda kawtiw num ibik biliw kawtiw yukati,
mali kawtiw im weng afak kebiliw kunum waneng yukati,
mali wiin so kebiliw kawtiw yukati,
alik alik yu Sunbin-Finik makmak elo kuw ok atew wansomi, Sunbin-Finik beso ok da koyemin emdiw keyembiliw kasike, fein ibolow so kunum waneng yu kal anggil makmak kekabiliw te.*Galesia 3:28
14 Alik nu kal keluwete: Kal anggil dim e anung makmak kuw ba kate, anung anung tulun banban kuw kebe te. 15 Kaneko kasike, kal dim beem yan mali mak bokolomele: “Ne teing ba kasike, ne kal anggil dim beem anung ba te!”, ange tewe, angoke weng beem dulum elote e ki keko, alwol kelinba kesomi, kal anggil dim anung akate keboke te. 16 Beemdiw, kal anggil dim beem kalun mali mak bokolomele: “Ne kiin ba kasike, ne kal anggil dim beem anung ba te!”, ange tewe, angoke weng beem dulum elote e ki keko, alwol kelinba kesomi, kal anggil dim anung akate keboke te.
17 Yu kilele ibolow fukunina! Yom kal anggil dim alik alik kiin kuw kele tewe, yu nono keko, weng mak kililokoliw e? Beemdiw, yom kal anggil dim e alik alik kalun kuw kele tewe, yu nono keko, kimilewokoliw e? 18 Kate, Sunbin-Got e akalem ibolow fukunin kuw geleweko, nukalem kal anggil dim em anung anung akalem be dim kuw amen amen kuw duku koyemse te. 19 Kal anggil dim alik be kal anggil anung makmak kele tewe, kal anggil dim be nono keloke ye? 20 Feinka! Kal anggil angom be beemdiw ba kate, kal anggil anung anung banban alik alik angom bi bonggusomi, fein kal anggil dim makmak kebiliw te.
21 Kiin e ki keko, teing elo bokolewomele: “Kukal amen, nakal amen kebuluw te!”, dangeko, nam dange te. Beemdiw, kak e ki keko, yan elo bokolewomele: “Kukal amen, nakal amen kebuluw te!”, dangeko, nam dange te.
22 Kate, num atemeko, desi kelewkabuluw kal anggil anung mali mak kal anggil anung banban mak ilo fein bakiyemkabe te. 23 Feinka! Num atemeko, finganeko, “Eke! Inkal kulomin eisneng ete te!”, angbuluw kal anggil anung beem dulum elote nu wangweng kasi kasi kilele kilele kelewkabuluw te. 24 Kekabuluw kate, mali kal anggil dim em anung anung be sak ikalem kuw ken kebiliw kasike, nu aimge koyeminba kekabuluw te. Yu kilele diwomliwka! Sunbin-Got e kal anggil dim anung anung alik alik bonggu makmak kelewko, anung anung wiin banim so be mali kal anggil dim anung biim imisik keyemse te. 25 Keyemsomi, kal anggil anung angom biim mutuk be amen amen keyemomin kukuw mak kelinba kebomi, mali ilo dokolew dokolew kukuw kuw fitewoke te.
26 Kaneko kasike, kal anggil anung mak betbet kule tewe, kal anggil anung mali alik alik ikati eso makuw betbet kulukabiliw te. Beemdiw, kal anggil anung mak wiin fian kule tewe, kal anggil anung mali alik alik ikati eso makuw kalfong fian kekabiliw te.
27 Keko kasike, alik alik yu kal anggil anung amen amen em kiskiw kebiliw kate, yu alik alik yu bongguko, Kulais em kal anggil makmak ke alakabiliw te.*Ulom 12:5 28 Feinka! Sunbin-Got akalem ete sios kunum waneng nulo em aluwbamin amen kuw amen kuw duyemei, kaneko aluwbamin beem kunum waneng keyemsete:
Emisik e, kalan kawtiw i,
imteben e, Sunbin-Got em bontem dim bakabiliw kawtiw i,
imteben e, sios kunum waneng ilo kukuyemkabiliw kawtiw i,
mali mak e, auk so kitil so eisneng aluwkabiliw kawtiw i,
mali mak e, wakamin kebiliw kawtiw ilo okmino koyem kemin kawtiw i,
mali mak e, mali im kal ilum dokolew dokolew kemin kawtiw i,
mali mak e, sios kunum waneng im kak yetebin kawtiw i,
mali maki e, mongom amen amen im weng bakabiliw kawtiw ite te.*Efesus 4:11-12
29 Nakunum kumel kunum waneng yu kilele ibolow fukunemoliwka!
Alik alik angom nu kalan kawtiw nute sako?
Alik alik angom nu Sunbin-Got em bontem dim bakamin kawtiw nute sako?
Alik alik angom nu kunum waneng ilo kaleyemin kawtiw nute sako?
Alik alik angom nu auk so kitil so eisneng aluwkabuluw kawtiw nute sako?
30 Alik alik angom nu ki keko, mali im wakamin okmino koyemkemin kawtiw nute sako?
Alik alik angom nu mali mongom amen amen im weng bakamin kawtiw nute sako?
Alik alik angom nu mali mongom amen amen im weng bakamin weng famdakamin kawtiw nute sako?
Babo! Alik alik num aluwbamin be amen kuw amen kuw kebe te. 31 Kate, yu ibolow danong danong keko, kitil kebomi, “Sunbin-Finik em emisik bamki kitil eisneng be kuluma!”, angboliwka! Imisik bamki kitil eisneng be kanekote: Kalan kawtiw im aluwbamin so, Sunbin-Got em bontem dim bakamin em aluwbamin so, sios kunum waneng ilo kukuyemin em aluwbamin ete te.
Kate kame, ne yulo mali deiw bakiyemeko, sios kunum waneng im ibolow kitil keyemomin deiw ati deiw mak kukuyemoki te.*1 Kolin 14:1