1 Beli, Abalam em itol e 99 kele ding dim bakate, Yawe e teleko, Abalam elo weng mak bokolewomele: “Nem wiin e Elsadai*17:1 Wiin be em mongom ete “Auk so Kitil so Sunbin-Got”. te! Ku nem weng afak keko, kakabomelewi, nem kiin dim kel kiol kuw kukuw gelewemolewka! 2 Gelewsomelewi, kuso kitakamin weng fian mak dukuko, kom muluwel dow ilo banso tulun tulun kuw keyemoki te.”, dangse kale. 3 Dangei, Abalam e katin bukbuk angeko, gatak wakas kese kale. Kelei, Sunbin-Got e iti weng makso bokolewomele: 4 “Kuso dukukabi kitakamin weng be kanekote: Kawtiw banban im kunum mongom kekemi 5 kasike, kom wiin e Abalam be koleweko, wiin kikis Abalakam†17:5 Emisik wiin Abalam em mongom ete “Wiin so Kunum Mongom”. Wiin kikis em mongom ete “Kunum Mongom Banso im Alew”. kangi te. Nimtew angom? Kulo kunum mongom angom banso im alew kekemi kasike.*Ulom 4:17 6 Ne kulo bamki fian so kekemii, kom muluwel dow i banso tulun tulun kuw keko, fokokoliw te. Fokosomeliwi, im dim e emisik kamok fian mali mak ikal molokoliw te. 7 Kuso amkoko, duku kemi sunsun kitakamin weng be nam banime te. Kom muluwel dow so, im dukudak dukudak kelokoliw kawtiw biso, kitakamin weng be kait diwkuw diwkuw belei, awet keko, nam banime te. Feinka! Nakalem ete kuso, kom muluwel dow iso, alik alik yom Sunbin-Got nete te.*Iluk 1:55 8 Kame kilele kilila! Ku kakow kunum keko, Kenan kawtiw im aneng kakabelew kate, aneng kale ku so, kukalem muluwel dow iso, alik alik yulo diwkuw diwkuw fein kuw yukalem duyemoki te. Duyemsomi, alik yom Sunbin-Got kebi te.”, dangse kale.*Kalan Kunum 7:5

9 Dangeko, iti weng makso bokolewomele: “Ku so, kom muluwel dow iso, alik alik yom dulum akati kitakamin weng beem anung mak duyembi te. Yu elo wangweng keleweko, kilele gelewemoliwka! 10-11 Yom dulum duyembi kitakamin weng beem anung e kanekote: Yu kunum alik alik im kal e okiloliwka‡17:11 Moyow kal okilew keyemaliw kale.! Okilew kemin beem mongom ete neso yuso alik alik nu kilele kal keluwete: Neso yuso tele tele beem dim e kitakamin weng be kait diwkuw diwkuw boke te.*Kalan Kunum 7:8; Ulom 4:11 12-13 Kitil weng be kunum angom alik alik im dulum bakayembi te. Kunum aul dukului, em duan kel ding kele ding dim bakate, yu im kal okiyem kemoliwka! Kom muluwel dow dukudak dukudak kebomi, bokoliw ding dim bakate, alik alik biilo kaneko kukuw kuw keyemboliwka! Yukalem weng afak kunum ikal, weyembiliw kunum ikal, yukalem weng afak waneng im kunum aul ikal, alik alik yom dim biliw kunum angom biim kal bakal okilew keyemboliwka! Kebiliw kawtiw bi fein nem sunsun kuw boke kitakamin weng beem afak kawtiw kebiliw ite te. 14 Kate, nimin kunum ite mak kal okilinba keliw tewe, kunum bi nem kitakamin weng beelo sakalaw keko, weng bo bo keliw kasike, yu ilo takala deng ibiku koyem kemina! Nimtew angom? I nem kitakamin weng ayem beelo gelewinba kebiliw kasike.”, dangse kale.

15 Dangeko, Sunbin-Got e Abalakam elo weng makso mak bokolewomele: “Kom kalel um wiin Salai kame koleko, um wiin kikis e Sala§17:15 Wiin beem mongom ete “Wiin so Waneng”. wanga! 16 Nimtew angom? Ne ulo bamki so keumi kasike. Feinka! U kunum aul mak dukului, e kawtiw fian mak em kunum mongom keloke te. Em mulkis mali mak i wiin so emisik kamok fian kelokoliw te.”, dangse kale. 17 Dangeko, Abalakam e kawin dim dak katin bukbuk gatak wakas angese kate, abenggise kale. Nimtew angom? E ibolow fukunomele: “Nem itol e 100 kese kasike, aul mak nam kaili te! Sala ukal fasel kesomi, um itol e 90 kese kasike, u ki keko, aul mak nam dukuloku kai!”, angse kasike. 18 Angeko, Sunbin-Got elo yan weng bokolewomele: “Kom nangew weng be ken kate, ku Ismael elo kuw ken ati kukuw kelewbolewka!”, dangse kale. 19 Dangse kate, Sunbin-Got e yan weng bokolewomele: “Bayo! ‘Sala u kunum aul mak duku kemoku te.’, kangi weng be fein weng te. Kunum aul beem wiin e Aisak**17:19 Wiin beem mongom ete “Abenggile Kunum”. dangolewka! Feinka! Eso, akalem muluwel dow iso, kangsi kitakamin weng be dukusomi, diwkuw diwkuw ibolow fukunboki te. 20 Kate Ismael beem dulum elote nangew weng bakati kiliko, ibolow fukunbi te. Ne elo bamki kelewii, em muluwel dow banban keyemko, elo kamok kalun kel kunum mongom im kunum mongom kelewoki te. 21 Kate, nem kitakamin weng be Sala um min Aisak em dim elo kuw dulewoki te. Makmak itol banime ding dim kabalak, u Aisak beelo fein dukuloku te.”, dangse kale. 22 Dangei, Sunbin-Got e Abalakam elo koleweko, iti katiw elo unse kale.

23 Katiw unse ding dim e, Abalam e Sunbin-Got em dangse weng be kiliko, geleweko, em min Ismael em kal okilewse kale. Okileweko, akalem weng afak kunum bikal, ilo weyemse kunum bikal, em weng afak waneng im kunum aul bikal, alik alik biim kal bikati okiyemse kale.

24-26 Makmak ding mak, Abalakam em itol e 99 kelei, em min Ismael em itol e kiin kel kele ding kelei, beem ding bakate min yelim bi ikalem kal okilewsiliw kale. 27 Yelim ikalem so, Abalakam em weng afak kunum so, ilo weyemsiliw kunum iso, em weng afak waneng im kunum aul iso, alik alik bikalem kal okiyemsiliw kale.