13
Ibolow Femdelinba Keliw Kawtiw im Kaneloke em Weng te.
1 Yangei, mali kawtiw i Yesus em weng be kiliko, em mit mewso uneko, kanele sang be bokolewomeliw: “Yetebin kamok Failat em wonuk so kunum i mali Galili aneng fian kolew talsiliw kawtiw mak yeniwi, i kuaniw te. Kawtiw bi samal asomi, Sunbin-Got elo dulewomin ibolow kebiliw kate, beem ding dim bakate, wonuk so kunum bi teleko, kawtiw bi yensiliw te.”, dangsiliw kale. 2 Dangiwi, Yesus e ilo yan weng bokoyemomele: “Yu ibolow fukunomeliw: ‘Kuansiliw kawtiw biim ibolow sili sili be mali Galili aneng fian kasel alik alik im sili sili be bakiyemkabe kasike!’, ange ange kebiliw sako?*Sion 9:2 3 Kate itel bate! Yu kilelbiko, boliwka! Yukalem ibolow sili sili nam be koleweko, ibolow famdelinba keliw tew, alik alik yu kuansiliw kawtiw biimdiw akati atin kuw banimokoliw te.
4 Beemdiw, yu ibolow fukunomeliw: ‘Siloam abiw em am aliam tiakim sel be kangeko, mitse ding dim kabalak e, beem mongom ete kuansiliw mali em king kel kawtiw biim sili sili ibolow e mali Selusalem abiw mutuk fian kasel biim ibolow sili sili be atin kuw bakiyemkabe kai!’, angbiliw sako? 5 Kate, itel bate! Yu kilelbiko, boliwka! Yukalem ibolow sili sili nam be koleweko, ibolow famdelinba keliw tew, alik alik yu kuansiliw kawtiw biimdiw akati atin kuw banimokoliw te.”, yangse kale.
Dem Banim Kekabe Ais em Fakam Weng te.
6 Yangeko, iti fakam weng mak bokoyemomele: “Kunum mak fik ais mak akalem musun tem ka kel kaise te. Kate, dem gilalakabe ding dim bakate, kunum be teleko, dem wanomin ibolow keko, atemete: ‘Ai, ais kale dem banim kele kai! Kale nose a?’, angese te. 7 Angeko, akalem musun atebe kunum elo bokolewomele: ‘Kame, itol alemsal kelei, ne iti dem fenem toloki kate, dem gel mak banim keko, wei kekabe kasike, elo sek so gu kolewolewka! Mesik esik ais be sak kawin ken beem kitil e sak banim kolewkabe kasike!’, dangse te.*Iluk 3:9 8 Dangei, musun atebe kunum be elo yan weng bokolewomele: ‘Kamok kutaka! Ne kukun a man a ais mit elo duku kebilii, itol mak ete ‘Dem so gilabe ye?’, angeko, atemoki te.*2 Fita 3:9,15 9 Fein dem gilalinba kele tewe, ne elo sek so guko, ful fomdoloki te!’, dangse te.”, yangse kale.
Mulsukun Waneng mak um Sang te.
10 Sabat finengdakamin ding mak kese ding dim bakate, Yesus e Suda im wensankabiliw am mak kawtem uneko, Sunbin-Got em weng be kukuyemse kale. 11 Beem ding dim bakate, am auk nam kebu waneng mak ka kel bisu kale. Mali em king kel itol kelei, aneng matil mak waneng buum dim bomelei, ulo mulsukun keumeko, bise kale. 12 Kaneko beli, Yesus e ulo watemeko, gaaneko, bokoumomele: “Waneng kutaka! Ku kale kel tala o!”, wangei, u telui, e ulo bokoumomele: “Kame itel kom wakamin be kuluko, kokemi te!”, wangse kale. 13 Wangei, akalem teing e deeko, um dim meleumei, waneng bu ken kesomi, kiol kuw fitutuko, mosomi, Sunbin-Got em wiin fian be daolewsu kale.
14 Beem ding bakate, Sabat finengdakamin ding dim kese kasike, wensankabiliw am beem kak kunum e Yesus elo kaisuw fian keleweko, ka biliw kawtiw ilo bokoyemomele: “Sabat finengdakamin ding dim kabalak e, yu kanelom wakamin so kawtiw mak yemde teleko, ‘Kilelyemoka!’, dangbokoliw te! Mali gung kel sak aulamin ding dim beem ding ete kuw ilo yemde telemoliwka!”, yangse kale.*Aneng Kolew 20:9-10; Sawa Weng 5:13-14 15 Yangei, Kamok Fian e yan weng bokolewomele: “Fimdi famde kawtiw yutaka! Sabat finengdakamin ding dim kabalak e, yukati diwkuw diwkuw bulmakao so, donki so, yom am samal alik alik biilo ok wanin beem dulum elo yemde unakabiliw kasike!*Iluk 14:5 16 Kate Seten-Ataanim e mali em king kel itol mak Abalakam em mulkon kalu sok so net keumse te. Keko kasike, ne ki keko, ulo Sabat em finengdakamin ding bakate nam wokmino kilelumoki sako?”, yangse kale. 17 Yangse kasike, elo maka kelewsiliw kunum i inkal fian mak kulusiliw kate, Yesus em kitil so auk so alik alik be atemsiliw kawtiw alik alik bi em kanese beem dulum elote kalfong fian mak kelewsiliw kale.
Sunbin-Got em Gawman em Fakam Weng te.
18 Beli, Yesus e iti weng makso bokoyemomele: “Sunbin-Got em gawman em sang e nono eisneng atew a? E nomin fakam sang atew a? 19 E ais dem fong gel atew te. Mak kunum mak ais dem be kuluko, akalem musun dim kailei, ais be tebeko, fian kelei, awon i em teing dim e ikalem aim gekabiliw te.”, yangse kale.
20 Yangeko, iti weng bokoyemomele: “Sunbin-Got em gawman em sang e nono fakam weng atew a? 21 E belet wanin fasu kolew kemin is atew te. Mak waneng mak is fong gel be kuluko, falaua so fangsingelui, falaua alik alik be fasuko, fian sel kekabe te.”, yangse kale.
Sunbin-Got em Am Dim elo Unomin em Weng te.
22 Beli, Yesus em Selusalem abiw mutuk fian kalo unse ding dim bakate, e abiw mutuk fian so fong so biliw im kasel ilo Sunbin-Got em weng kukuyem unse kale. 23 Unse ding dim bakate, mak kunum mak elo dakalalomele: “Kamok Fian kutaka! Sunbin-Got e fong gel kawtiw ite kuw sunsun finik so bin duyemoke sako?”, dangse kale. Dangei, Yesus e alik alik ilo bokoyemomele: 24 “Yu kilele kililina! Kawtiw banso mak abisom fong gel beem dulum elote ‘Kawtem unuma!’, angokoliw kate, i ki keko, nam uniw te. Kasike, yusik kitil keko, bukesomi, fein kawtem unoliwka! 25 Nimtew angom? Am sen kayak em am ailoke ding dim kabalak e, yu teleko, kut kel moko, bokolewomeliw, ‘Kamok Fian kutaka! Am yal busuyema!’, angeko, gogo angiw tewe, e yan weng bokoyemomele: ‘Yu nalem kawtiw a? Ne yulo akokow te!’, yangoke kasike.*Matyu 25:10-12 26 Beem ding dim bakate, yu bokolewomeliw: ‘Kamok kutaka! Nu kuso makuw ok a wanin a wanakabuluw kawtiw nute te. Ku nukalem abiw dim kel Sunbin-Got em weng bokoyemkabelew te.’, dangokoliw kate, 27 e yan weng bokoyemomele: ‘Ne yulo akokow te! Yu nalem kawtiw a? Yu kukuw wa kemin min kasike, nem mit kale fongate akate asinina!’, yangoke te.*Sim Fut 6:8 28 Yangei, Suda kawtiw yu Abalakam so, Aisak so, Sekow so, Sunbin-Got em bontem dim bakamin kunum alik alik angom iso, kunum alik alik biilo Sunbin-Got em gawman ding dim kel teinbiliwi, yetemokoliw te. Kate, mali i yulo biim biliw dim be kut elo yenbakalalokoliw kasike, yu kut kel bomi, amebomi, yukalem kal wakal dukuko, teing feiwbomi, teing bulung gilkabomi, bokoliw te.*Matyu 8:11-12 29 Ka biliwi, kawtiw ataan talbe dulum so, ataan unbe dulum so, beem beleng beleng aneng aneng so, aneng alik alik biim kawtiw i Sunbin-Got em gawman ding dim ka kel wanin wanbokoliw te.*Sim Fut 107:3
30 Yu kilelbiko, kililoliwka! Mali ibik biliw kawtiw i imisik kelokoliw te! Beemdiw, mali imisik biliw kawtiw i ibik elo kelokoliw te.”, yangse kale.*Matyu 19:30
Selusalem elo Ibolow Fukuneko, Amese em Sang te.
31 Beem ding dim bakate, mali Falisi kunum mak teleko, Yesus elo bokolewomeliw: “Ku fongate akate abiw kale koleweko, unolewka! Emisik kamok fian Kelot e kenomin ibolow kebe kasike.”, dangsiliw kale. 32 Dangiwi, Yesus e ilo bokoyemomele: “Yu uneko, weng fasu kolew kekabe kunum beelo bokolewomeliw: ‘Kame akal, sow kutim akal, ne aneng matil kawtiw im dim biliw kawtiw so, wakamin so kebiliw kawtiw iso, alik alik ilo kilele keyemkabi kate, yemamas ding kel kelei, nem aluwbamin be banimoke te.’, dangoliwka! 33 Kasike kame so, sow kutim so, danom so, ne uneko, Selusalem abiw mutuk fian elo unbi te. Nimtew angom? Kawtiw i Sunbin-Got em bontem dim bakamin kunum alik alik ilo abiw mutuk fian ka kel kuw yenkabiliw kasike.
34 Selusalem abiw mutuk fian kasel yutaka! Sunbin-Got e akalem bontem dim bakamin kunum ilo yom dim elo yamdalei, i yom abiw teliwi, yu ilo tum so mutum fakal yeniwi, i kuan kemaliw te. Ne yulo yemdeko, ‘Nem yesum afak kel tebil koyemo yo!’, yangbi kate, yu diwkuw diwkuw nelo ‘Bayo!’, nangeko, sakalaw keko, weng bo bo kenemkabiliw te. 35 Kasike kame, yu kilele kililoliwka! Yom abiw kalakati wako, wiin banimoke te. Keko kasike, yu nelo kiin so iti nam netemiw te. Kate, bi e, nem iti toloki ding dim kabalak e, yu kalfongso kenemko, nem dulum elo bokonemomeliw:
‘Kamok Fian e akalem wiin fian so em wiin talbe kunum beelo bamki so kelewse kai!’,
nangeko, kilele kal kenemokoliw te.” yangse kale.