2
Kal Kunum Talsiliw im Sang te.
1 Beli, yemkal biim Sudia aneng fian em abiw mutuk fian Betelekem ka biliw ding kabalak e, Malia u Yesus elo dukusu kale. Beem ding dim kabalak e, Kelot e aneng fian beem emisik kamok fian kebele ete kale.
Keko beli, ataan telbe dulum elote, kal kunum min mak teleko, Selusalem abiw mutuk fian kalo teleko, kawtiw mali ilo dakalalomeliw: 2 “Suda kawtiw im aul beliw kamok fian e nal kel be ye? Akalem ailbin ataan talbe dulum kel fitewei, nu atemeko, elo gelew teleko, akalem wiin fian daolew kem talbuluw te.”, angeko, dakalasiliw kale.*Teing Bakamin 24:17 3 Dakalaliwi, emisik kamok fian Kelot so, Selusalem abiw mutuk fian kasel iso, alik alik i biim dakalaliw weng be kiliko, yol yol angeko, ibolow fukunin tiaktiak kesiliw kale. 4 Keliwi, emisik kamok fian be Sunbin-Got em kukuyemin weng kalem aulewko, kukuyemkabiliw kunum iso, Sunbin-Got em am yol em kunum ayem sel eso, akalem angin iso, alik alik ilo gaayemei, i teliwi, e ilo dakalomele: “Mesaya beelo nal kel duku kembu a?”, yangeko, dakalase kale. 5 Dakalalei, isik yan weng bokolewomeliw: “Waneng mak Mesaya beelo Sudia aneng fian em Betelekem abiw mutuk fian ka kel duku kembu te. Nimtew angom? Sunbin-Got em bontem dim bakamin kunum Maika e fut mak boko, bokolomele:
6 ‘Sudia aneng fian em Betelekem abiw mutuk fian kasel yu ibolow fukuniwete:
‘Ibo! Num abiw mutuk kale sak wiin banim kebe kai!’, angeko, bokoliw te.
Kate babo! Yu kilele kililina!
Yom abiw mutuk fian kel kunum kamok fian mak fitewsomelei,
e Isalael kawtiw nulo fein yeteboke te.’,
yangse kale.”, dangsiliw kale.*Maika 5:2; Sion 7:42 7 Dangiwi, emisik kamok Kelot be biim dangsiliw weng be kilisomi, yawal deiw kel kal kunum min biilo awkol kuw gaayemei, i teliwi, e ilo dakalalomele: “Nalem ding ete fial be ailei, yu elo atemsiliw a?”, yangeko, dakalase kale. Dakalalei, i yan weng bokolewsiliw kale. 8 Bokolewiwi, e kitil weng mak bokoyemomele: “Yu kitil keko, ‘Aul be nal kel be ya?’, yangeko, elo fenoliwka! Fensomi, elo atemiw tewe, yu iti teleko, nelo bokonemoliwka! Bokonemiwi, nakati uneko, em wiin daolewoki te.”, yangeko, ilo Betelekem abiw mutuk fian kalo yemdase kale. 9-10 Yemdalei, i em bokoyemse weng be kiliko, fein unsiliw kale. Im unomin kesiliw ding kabalak e, fial fian be iti ailbelei, i elo atemeko, kalfong fian mak kesomi, fial beelo iti gelewsomi, “Fial be aul beliw beem am be dim moko, am gong dim fung ange be kai!”, angeko, atemsiliw kale. 11 Atemsomi, am tem uneko, aul beliw so, auk Malia uso yat biliwi, yetemsiliw kale. Yetemeko, katin bukbuk angeko, aul beem wiin daolew kesomi, ikalem mesesem de talsiliw men be busuko, gol so, kual so, kamge so ais gom so, alik alik be matem dako, elo dulewsiliw kale. *Sim Fut 72:10-15; Aisaya 60:6
12 Keko beli, Sunbin-Got e ilo kiin dem dim kel bokoyemomele: “Yutaka! Yu kanelom iti emisik kamok fian Kelot em fukun unokoliw te!”, yangse kasike, i nanew deiw elote feneko, iti ikalem aneng elo unsiliw kale.
Yosew Yelimel i Fon Unsiliw em Sang te.
13 Keko beli, Kamok Fian em dabalakamin finik mak fiteweko, Yosew elo kiin dem sin bokolewomele: “Ku aul beliw so auk so bi kuluko, Isiw aneng fian kalo fon unolewka! Ka kel nem ‘Kame yu iti kaleelo telina!’, kangoki weng fenolewka! Nimtew angom? Kelot e aul beliw beem alomin deiw feneme kasike.”, dangse kale. 14 Dangei, e fein aul beliw yat biilo kuluko, kutiliw kebele akate, fongate akate ilo Isiw aneng fian kalo yemde unse kale. 15 Yemde unei, i ka kel Kamok Fian em weng kal ding fensiliw kale. Beem deiw e, i Sunbin-Got em bontem dim bakamin kunum mak em sua kel bokoyemse weng be ki kelewsiliw kale. E fut tem boko, bokolomele:
“Nakalem aul elo Isiw aneng fian kalote gaaloki te.”,
angse kale.
Beli, i Isiw aneng fian ka kel bomeliwi, emisik kamok Kelot em “Kuanok!”, angomi, ding fensiliw kale.*Osea 11:1
Kunum Aul Beliw ilo Yemaliw em Sang te.
16 Beli, emisik kamok fian Kelot beem kuaninba bise ding dim kabalak e, e atemomete: “Kal kunum min bi dasuw kenemeko, telinba keliw kai!”, angomi, kaisuw fian kesomi, wonuk so kunum ilo bokoyemomele: “Yu uneko, Betelekem abiw mutuk fian beem kunum aul beliw so, abiw mutuk fian beem mewso biliw kunum aul beliw biso, aul biim itol e alew mak kelinba biliw kunum aul beliw alik alik ilo yeniwi, i kuanoliwka!”, yangse kale. Nimtew angom? E kal kunum min biim dangsiliw weng be ibolow fukunete: “Kanese ding kabalak e, fial be fitewe kai.”, dangiwi, e kilise kasike. 17 Kanele beem dulum elote sua kel akate, Sunbin-Got em bontem dim bakamin kunum Selemaya e weng mak bokosomelei, kame em ding dim e em bokose weng be dem gilako, fein ki kelewse kale. E fut tem boko, bokolomele:
18 “Alama*2:18 Sua kel e, Sekow e akalem kalel Elesel um fom e Alama abiw ka kel womkuko, amemin fian mak kese kale. (Talfut Kese 35:19). Alama e Betelekem abiw mutuk fian em mewso keko, alenale kale. aneng ka kel, kunum waneng i amemin fian mak kilisiliw te.
Nimtew angom? Elesel um dow wanggel ikalem aul im delim amebiliwi, im ibolow menew so keyemomin deiw banim kese kasike.
Feinka! Ikalem aul isik alik alik yeniwi, kuansiliw kasike.”,
angse kale.*Talfut Kese 35:19; Selemaya 31:15
Yosew Yelimel i iti Isiw aneng fian kolewsiliw em Sang te.
19 Keko beli, Yosew em Isiw aneng fian ka kel alenale ding kabalak e, Kelot e kuanse kale. Kuanei, Kamok Fian em dabalakamin finik mak iti fiteweko, Yosew elo kiin dem sin weng mak bokolewomele: 20 “Kame, aul beliw yat yemdeko, Isalael aneng fian kalo unolewka! Aul beem maka kelewbiliw kunum bikati kuansiliw kasike.”, dangse kale. 21 Dangeko, unei, Yosew e aul beliw yat kuluko, iti Isalael aneng fian kalo unsiliw kale. 22 Uneko, ka teleko, kililiwete: “Alkelaus e akalem alew Kelot em abin kuluko, kame emisik kamok fian keembe te.”, yangsiliw kale. Yangiwi, yelimel bi Sudia aneng fian elo unomin fingansiliw kale. Finganemiwi, Sunbin-Got e akalem dabalakamin finik mak dabalei, e Yosew em dim fiteweko, kiin dem sin “Ku kanelolewka!”, dange weng mak bokolewomele: “Yelimel yu Galili aneng fian kalo uneko, ka biliw etaka!”, dangse kale. 23 Dangei, yelimel i fein uneko, Galili aneng em abiw mutuk fian Nasalet kalo uneko, ka kel alenaliw kale. Keko kasike, ibik ete, kunum waneng i Yesus elo atemeko, bokolewomeliw: “Ku Nasalet kayak kute te!”, dangenaliw kale. Beem dulum elote Sunbin-Got em bontem dim bakamin kunum im angsiliw weng bakati fein ki kese kale.*Aisaya 11:1; 53:2; Iluk 2:39; Sion 1:45
*2:2: Teing Bakamin 24:17
*2:11: Sim Fut 72:10-15; Aisaya 60:6
*2:15: Osea 11:1
*2:18: 2:18 Sua kel e, Sekow e akalem kalel Elesel um fom e Alama abiw ka kel womkuko, amemin fian mak kese kale. (Talfut Kese 35:19). Alama e Betelekem abiw mutuk fian em mewso keko, alenale kale.
*2:18: Talfut Kese 35:19; Selemaya 31:15
*2:23: Aisaya 11:1; 53:2; Iluk 2:39; Sion 1:45