1 Pulaga wok nakke Yisugu ngezebokko waligeleyi meleyau keya pongo inge nazikka neyau puwili piyegi wiriyiweki yeiya. Logo puwili weik kanda logo pugu puwili kerewawili yongkambanuwiliyaga wezayeli, keya yongkambanu kemegeme nak nalangaimek keya ngangangyeng kilingwili yombiyangai wazayiweki pangkara keya kozang pugura yana logo yawe pugura mizi kambelibene.

2 Yombanu meleyau keya pongo ingenazikka neyau puwili Aposolowili meiwili, puwiligi yeikyeng peyeng, werebek Simong yeik nara Pita meibok, keya pigi sakpek Enduru, keya neyau Jems keya pigi sakpek Yowan Sebetigi marekyau. 3 Keya Pilip keya Patolomiyu, keya Tomasi keya Matiyu ulogo king takis weiyabek, keya Alapiyagi marekpek Jems, keya Tariyasi. 4 Keya Saimon yombu Selete Yudawili Romwiliyaga yaliya wazayiweki liwik yawe miziwiliyaga nak logo puwiligu pi Saimon Seletebek meibek, keya nak Yuras Isaliyoto, yombu kalike Yisu ulagiwiliyegi miza yanagibek.

5 Yisugu meleyau keya pongo ingenazikka neyau puwili ngago kiriwei mizagi peyeng kiling kang wezayela, Yawe nogora mizageya koyimowei ini Yuda onowiligi ngabelakpekke kang nagani, keya yongkambanu ngabelak Sameriya meibekke yoluwiliyegirau kang nagani. 6 Purik segeya yongkambanu Yudawiliyegi kunizo, purik puwili liyeng memeng ngai puwiligibek wezamiya logo piyaga koweige koyimi puwili kelikwili, legi puwiliyegi kambelizo. 7 Puwiliyegi kanda pelik kozak yeizo, Mabek wokpekke Anotogo weik pigi ngaimekki ngai yolu legi kiliyiweki koli logo Anotogo iniyegi ngaiweki kelemi, yeizo. 8 Keya inugu pura kozak yeiyageya koyimowei kemegemewili yombiyangai wazayizo, keya yombanu kemegeme Leposimek meimek kiling puwilirau yombiyangai wazayizo, keya ibengwili yangalekta wik wazayizo, keya kerewa yongkambanuwiliyegi ngai yolu puwili welagela wezayeli mizizo. Ini kozang piyeng mizagira yeik weiya legi mabilik peyeng yeik mizizo. 9 Watabi orowei kelemi kangki nayeng wari nagani, keya king ma koli ma siliba nayeng 10 kik kalokyengke wari nagani. Ma kagorik yeke ngalege wakiyagi nariktau kikkikke wawela logo wari nagani, ma ingegangyau ma lukunglei wari nagani, yeik inugu wakiyagi mabiyeng kiling kambelizo. Purik yombu yawe mizibek yawe pugu miziragi wiyeke ngeragi keya pulangaiyeng mani purik pangka.

11 Ini yereng yemane narage ma songono narage kiliya la logowekke yombanu pangkawiligu koli keleya logo ini iza orowei i puwiligiyengke yolu puwekke purik mabura i mabumakke koyi kanda kangki puwekke yereng pura wiya logo kang mizizo. 12 Keya ini i namakke yeke ige kang puwekke purik mabura were yongkambanu i pumakke yoluwiliyegi pelik yeizo, Wilek kang inuwagiyeng ngezege sara koyimiweki, yeiya logo Anotogi ngago wazonora yanizo. 13 Tamizeige yombu wilek kang ngezege saragi kelibek i pumakke wizilege purik wilek kang pugubek ngezege sara weiyagi. Kapura tamizeige pilik naktau ono purik mabura ngago ngezege saragi pura ngereke ni makngezeyegi yogi.

14 Tamizeige ini yereng narage lewa logo pulogowili iniyegi koli keleyi ono keya ngago wazono puragi kerewiya logo wilek kang puwiligiyengko wei ono puwekke purik mabura yereng pura wiya wazamizo logo puwiliyaga mele inuguyeng kaigesizo logo puwili Anotogo puwiliyegi wilik ono keya inugu ngereke yereng purage puwiliyegi ngago wazonora kozak yeiweki yogi ono purikki puwili iwaka si nangai kani. 15 Kerewiyi, nogo iniyegi ngizi panu kozak yei, Wok kalike Anotogo ngagozak mizagibekke purik yongkambanu yereng Sorong meiraga keya Komola meiraga koka walaka kaile unatuba miza puwili ngangang weiyagi kapura yongkambanu yereng puraga iniyegi koli keleya ono puwili keya ngago inuguragi kerewiya logo wei ono puwili wokpokko ngangang yemane panu weiyagi.

16 Togo ini nogo wezayeliwili mena kambelizo. Keya kerewiyi. Nogo ini koloyakamandik songonowili kelik yombanu kaile iniyegi ngangang keleyi keya kuneng yanagiwiliyegi wezayeli purik nogo iwaka wizinda, legi ini kazing kemalewiligu mizi pilikmekke mizizo, purik pilik watabi inugu mizagiyengki waberek panu kumulizo. Keya kazing winak Kuwemimiwiligi pilikmekke mizizo, purik pilik yongomo mizi kunimowei nak kilindau ngai keli nagani, mabuwili kiling kuzige sara koyizo. 17 Ini ngai waberek panu, purik ini yawe nogora mizirikki wiyeke yombanuwili iniyegi kumbak mizagi logo ini kebangkela logo puwili ini ngagozakyengki kerewiyiwiliyegi iza orowei kunagi, keya nawiligu ini i walek songono puwiligiyengke yeke ige wizale yelagi kani. 18 Keya ini kapmanwiligi ngai yemanewili keya Yuda ono King Ngaiwiligi wiregerau neyegi kiriwei mizirikki weraga luwe wazayagi. Puwekke ini puwiliyegi neyegi langai kozak yei keya ngago nogo iniyegi waligeleyaragi langai kozak yeiyagi. 19 Kapura puwiligu ini kebangkela logo iza orowei ngagozak miziweki kangwekke were pobilik wilek ngelek kumuli nagani, Teni ngago talikyeng kisagi, pilik kumuli nagani. 20 Purik puwekke Anotogi Kung Walekpokko iniyegi ngago inugu kisagi pura wazono kisiweki kangka wazonobek yanagi legi.

21 Keya yombanuwiligi si keya sakwiligu ngezewiligi si keya sakwili yombanu puwili yelagiwiliyegi iza yanagi. Keya yombanuwiligu puwiligi yango keya marekngangwiliyegi mabilik keleyagi, keya koloyakongwiligu puwiligi panu keya mangowiliyegi mabilik keleyagi. 22 Keya ini yeik nogoraga yawe mizirikki wiyeke yongkambanu mabuwiligu iniyegi kumbak mizagi kani, kapura yombanu kunengyeng keya ngangang wagelageya wizimowei neyegi ngizi kumuli pura kozang kebangkeli kanda wila wiyi ngizige mologabok Anotogo wik wizagomagiragi yaliya wazayagimelegabek. 23 Keya tamizeige puwiligu ini yereng narage ngangang keleyi ma kuneng yani mabura yereng narage kazi kambelizo. Nogo inuwayegi ngago wameik pera kozak yeiweki mizi, ini Isileiliwiligi ngabelakpekke yereng piyengke yawe nogo yana pura ngoluk mizi yagoneiga ne yombanu paka ngalega kayimabek ngereke yogi kani.

24 Keya puwiligu ini ngangang yanagirikki nogo ngago saweliwei nara pelik kozak yei, Mandik kapiya mizi nak waligeleyi pugubekyaga ngalege ono, ma yombanu yawe mizi nak ngai pugubekyaga ngalege ono. 25 Kapura mandik kapiya mizi nak waligeleyi pugubek kelik pilikweki mizi purik pangka. Keya yombanu yawe mizi nak ngai pugubek kelik pilikweki mizi purik pangka. Tamizeige yombanu neyegi kumbak miziwiligu ne, imakki mangobekyegi pelik kisi, Ni kerewawiligi ngaibek, kisi purik mabura puwiligu mabilik ini, yombanu i nogomakka yolu puwili mabuwiliyegi ngago kaile panu yeiyagi.

26 Pilikta miziweki mizagi legi ini yongkambanuwiligu iniyegi mizagirikki kulili mizi nagani, purik puwiligu kazing kaile mizi piyeng Anotoyaga liwik wiyagi langai ono. Purik kazing kaile puwiligu ngokmorokta wiya piyeng kalike kimeike walimizagiyeng keya kazing kaile puwiligu mizi wizigeya liwik yolu piyeng wangki kalike kimeike kawela wiyagiyeng kani. 27 Ngago nogo iniyegi tonuwa ngezera kekewekke kozak yei pura inugu yongkambanuwiliyegi kimeike kozak yeizo, keya ngago nogo iniyegi yeke ige ngezege kozak yei pura kalike inugu yongkambanu mamokki kelengke ngalizi kozak kisizo.

28 Keya nogo miziweki yeiya piyeng mizagirikkirik yombanu korik yeikwek ula logo ibengki kapura wilek kambek keya kumbekki nayendau kaile kelemiyagi langai ono puwiliyegi ini kulili mizi nagani, purik segeya Anotoyegi purik pi korikwek weiya logo wilek kambek keya kumbek pongo yereng yezi kusagi onozik ngoriraga yomizora wezamelagibokyegi kele ini kulili mizizo.

29 Yongkambanuwili winak songono winak Kemengiwili kelikwili neyau king korok nalikki ngane wei logo Anotoyegi wata kolak kelibene miziweki purik ini iwaka. Winakwili yeik songonowili kapura tamizeige Anoto inigi Mangobekki kelira ono purik mabura winak songono pilikmek pongo ngabelakke kawiye walagi ono. 30 Kapura ini yombanuwiliyegirik, kebi inuguyengka kebi nganelek piyeng mabiyeng pugu sangkela. 31 Purikku walimizi purik yombanu wamenak winak kolokngagono puwiliyaga ngalege mizi yagenda. Tegi Anotogo iniyegi ngai wizinda legi kazi mizi nagani.

32 Yongkambanu mamokki wirege yeik nogora kawela wiyimologabok kalike ne Anoto negi Mangobek paka ngalege yolubekki wirege pilik kawela wiyabokki yeikta nogo kawela wiyagi. 33 Kapura tamizeige yombanu nak yongkambanuwiligi wirege neyegi kezanga nani purik mabura kalike ne Anoto negi Mangobek paka ngalege yolubekki wirege piyegirau kezanga managi.

34 Inuwago kumularik ne ngabelakpekke kazing yombiyangai yongomo mizagimek keremiziweki kayima nobiyeng? A’a’. Ne pelege yawe yongkambanuwili ngai neyauge sanga mizagi pura miziweki kayima, purik nawili ngago nogoragi ngizi panu kumulagi keya nawili ngago nogoragi ngizi panu kumulagi ono legi. 35 Yombanu nak ibuwili pelik sanga mizagi, koyambek mangoyegi ngai mizagi, keya kolomele panuyegi ngai mizagi, keya koyambekki yongokpumele pigi palikmeleyegi ngai mizagi kani. 36 Logo yombanu nakko neyegi kelirikki wiyeke pigi ingembuwiligu piyegi ngai mizagi.

37 Tamizeige nak neyegi keli logo neyegi kiriwei mizagi kai purik mabura pigi keli pura neyegi yemane panu keya panu keya mangoyegi keli pura songonoweki kapura tamizeige pi pilik mizi ono purik mabura pok yombanu neyegi pangka kiriwei mizagi onobek. Keya tamizeige nak neyegi keli logo neyegi kiriwei mizagi kai purik mabura neyegi keli pura pigi yango keya marekwiliyegi keli puraga yemaneweki, kapura tamizeige pi pilik mizi ono purik mabura pok yombanu neyegi pangka kiriwei mizagi onobek. 38 Keya tamizeige nak neyegi keli logo neyegi kiriwei mizagi kai mabura ngago nogora kerewiyi keya negi wiyeke ibengkirikki kulili ono keya ne kiling kazing nogo kangmokko kuniweki, kapura tamizeige pi pilik mizi ono purik mabura pok yombanu neyegi pangka kiriwei mizagi onobek. 39 Kapura yombanu neyegi wiyeke ibengkirikki kazi mizi logo ngezebekki kelira keya ngezebekki wik yolugira kozang kebangkeli mizibok pi Anotogi wiregerik ibeng logo wik wizagomagira weiyagi ono, kapura yombanu neyegi ngizi panu kumula logo pulaga wilek kang pugubek keya wik yolugi pugura neyegi tiya mani mizibok ibeng wizagomagi ono, pi paka ngalege wik wizagomagira weiyagi.

40 Weik nogo ini wezayeli logo yombanu ini nogo wezayeliwiliyegi koli keleyi puwili iniyegi koli keleyi purik neyegirau keleni yagenda, keya yombanu neyegi koli keleni puwili ne wezanelabokyegirau koli kelemi yagenda. 41 Nogo yombanu nak wezamela kopong pi ngagora kozak kai logo pok ngagora kozak kairikki wiyeke koli kelemiya puwili, pokko kanga weiyagi mabilikta puwilirau weiyagi. Keya yombanu pangkabek yarolege pakela logo pi ne pangkabekyegi sawela kopong piyegi wazono kelemiyabok purik pok pangkabokko kanga weiyagi mabilikta weiyagi. 42 Keya nakko yombanu neyegi kiriweiwiliyaga nak yarolege pakela logo pi neyegi yawe mizirikki wiyeke pi yeik kai wik songono nangezi nibene mani puriktau pugu wazono miza puragi wiyeke Anotogo pi kanga managiyeng wei penanging, yeiya.