15
Wangkoti pura Yudawiligi yemanewili kiling yombu Anotoyegi wata kolak kelibene miziwiligi ngaiwili keya yombu Mosegi loyengki waligeleyiwili keya yombu ngezewiliyaga ngagozakyengki kerewiyi puwili mabuwili ngago kozak kela. Pulaga puwili Yisu wigira logo pi miza oroweirik yombu ngabelak Yudaya meibekki Rom Kapman ngaibek Pailet meibekyegi miza mana.
Togo Pailetgu Yisuyegi pelik nguk meiya, Ni Yudawiligi King Ngaibek ma yeik, meiya. Tegi Yisugu pelik meiya to mela, Ni makngezogo kai mabura, meiya.
Togo yombu Anotoyegi kolak miziwiligi ngaiwiligu ngago kolokngagonoyeng piyegi yowa. Keya Pailetgu mazenda piyegi pelik nguk meiya, Ni ngago nara kaiya yo meli onora nangki? Puwiligu niyegi ngago kolokngagonoyeng yowirikki kerewiye, meiya. Kapura Yisu mawinda ngago kaiyagirikki kiyebuk legi Pailet piyegi lelengkira.
 
Togo kirisimasi mabiyeng wok Pasoba meibek puwili pakeli puwekke Pailetgu yombanu wigirawiliyaga puwiligu keli nak wila wazami mizi. Logo wokpokko yombanu ulogo Romwiligi Kapman ngaiwiliyegi ngai miza logo yombanu nak ula logo ibendikki wiyeke wigira wazayawiliyaga nak Parabas mei.
Togo yongkambanuwili wawere ula logo Pailetyegi nguk meiya pugu kazing puwiligu mizimekke kiriwei mizibene logo yombu wigira nak wila wazamibene. 9-10 Logo Pailetgu pelik kumula, Yombu Anotoyegi kolak miziwiligi ngai puwili yongkambanuwili mabuwili Yisuyegi kiriwei mizi purikki yagolok kopong puwiligu neyegi Yisu miza orowei wiriya wizinda miza.
Togo Pailetgu puwiliyegi pelik nguk yeiya, Inugu kelirik talik? Ne ini Yudawiligi King Ngaibek iniyegi wila wazamiyagi keli ma, yeiya. 11 Kapura yombu Anotoyegi kolak miziwiligi ngaiwiligu yongkambanuwiligi wilek kangyeng kowita wazaya logo puwiligu pelik kisa, Pi wila wazami nagani, segeya yombu Parabas meibok kele wila wazame, kisa.
12 Pulaga Pailetgu yongkambanuwiliyegi mazenda pelik nguk yeiya, Tamizeige keli inugura pilik purik mabura yombu inugu teni Yudawiligi King Ngaibek meibokyegi nogo talik mizagi, yeiya. 13 Togo yongkambanuwiligu ngereke pelik kek kisa, Pi yengeleileige nili ule, kisa. 14 Tegi Pailetgu puwiliyegi pelik yeiya, Pi nangki uliweki, pugu korowali talikyeng miza, yeiya. Kapura yongkambanuwiligu ngoluk mazeng keya ngalizi panu pelik kek kisa, Pi yengeleileige nili ule, kisa.
15 Togo yongkambanuwili wilik mizibene Pailetgu Parabas wila wazamiya logo Yisu ulagi purik pangka kelemiya. Togo pugu ami nawiliyegi Yisu were pikang yemane ngai kozang piyengko wizale ula logo puwiligu pi yengeleileige nili ulibene kozak yeiya.
 
16 Keya pulaga weik Rom Ami nawiligu Yisu miza orowei Rom Kapmanwiligi ngai yemanebekki imakke kiliya kuna logo puwiligu ami mabuwiliyegi ngago yeiya. 17 Puwili kanda pulogo puwiligu Yisu melewangka King Ngaiwiligu wakiyi langai wago yokolong narik wakiya wazamiya keya puwiligu mabung ingakmerek kilulung wezabek keremiza logo Yisugi kebiraga ngalege wiya logo ngaigu pi King Ngaibek miziweki.
18 Pulaga puwiligu piyegi pelik meiya, Aiya, ni wik yokolong yoluweki, ni Yudawiligi King Ngai Yemizibek. 19 Pilik kisa logo puwiligu Yisu kebirage wirembokko ula keya piyegi sibilak ngiza mani keya puwiligu ingegereyeng laliya logo ngaigu yeik pugura yongolok meiweki. 20 Logo puwiligu piyegi yang meiya logo pulaga melewangka wagorik pugusa mowiya logo ngezebekkiyeng ngereke wakiya wazamiya.
 
Pulaga weik puwiligu Yisu yengeleileige nili uliweki miza orowei kuna. 21 Puwili tagoneige pura kazingmekke yombu Saimon yereng Sairini meiragabek logo Yirusalem yerengke yolubek logo Alesenda keya Lupa meiyaugi mangobek paka yawega lewa logo paka Yirusalem yerengki kuniweki wizilege. Amiwiligu pi kebangkela logo Yisugi yengeleilei wagela wazamiya.
22 Togo puwiligu Yisu miza orowei kuna, weik kanda ngabelak wale yeikta Kologata meirikke logo yeiktago kai purik kebi kozarik kai yagenda. 23 Keya pulogo kandawekke puwili kai waing keya marasing ngelaming miza logo pi ngangang yemane panu kela nelegi nibene mana kapura Yisu na ono.
24 Togo Rom Amiwiligu Kologata pulogo Yisu yengeleileigi ngalege nili ula logo yengeleilei luwe lewamiya. Pilik miza logo amiwili takko Yisugi kagorikyeng weiyagi miza legi puwili yengelei lek uli. 25 Yokmek melenazik keya nazikka mangobektau onowekke wangane puwiligu Yisu yengeleileige nili ula. 26 Keya ngago lang pugu watabi kokowa miza piyengkiyeng paka pigi ngalege pelang korokwekke pelik lende miza,
Pek Yudawiligi King Ngaibek, miza.
27 Togo Rom Amiwiligu yombanu kazing kaile watabiyeng ngoweimekke miza logo wigira wazayayaurau yengeleiyauge nili ula logo nak Yisugi mele ngaigezuwagezikke wazami keya nak pigi mele koranengkezikke wazami miza. 28 Pilik miza pura Isayago Anotogi Kapiya Walektikke pobilik kaiya puragi kiriwei,
Puwiligu pi yombanu kaile miziwiliyaga nak mena miza, Isaya 53:12
29 Togo yongkambanu mereke kang yongomo miziwiligu piyegi yang meiya logo Yisuyegi kebi puwiligiyeng ngulang kelemi mizageya koyimowei pelik meiya, Aiya, ni Anotogi i walek yemanemak topela logo wok neyauganak piyengke ngereke i pumak ngizagi kaiyabek purik, 30 mabura purikku kozandago ni makngezogo ni makngeze yaliya wazame keya yengeleileiga yo kule, meiya. 31 Kazing mabilikmekke yombu Anotoyegi kolak miziwiligi ngaiwili kiling Mosegi loyengki waligeleyiwiligurau ngezewili nakko nakyegi pelik mei yongomo mizi, Pi nawili ibendaga pangka yaliya wazaya kapura pi ngezebek pangka yaliya wazamiyagi ono. 32 Pugu pelik kai, Ne Kilisibek, Isileiliwiligi King Ngaibek, kai legi tamizeige pi yengeleileiga yo kula purik mabura teni pakelagi logo teni pugu kai pura wameik purikki ngizi panu kumulagi, mei. Keya yombu yaka Yisu kiling yengeleiyauge nili ula piyaugurau Yisuyegi mabilik ngago kaile meiya.
 
33 Yokmek weik paka ngilumbekke libuge 12 kilok si ngizige yokmek kusa logo ngabelakpek mabok weik kusa logo wiziya yokmek panga luwege neyauganakwekke yokmek ngereke ngaiwila. 34 Togo yokmek panga luwege neyauganakwekke Yisu ngezebekki ngago yeiktage ngalizi pelik kek kaiya, Eli, Eli, lama sabatani. Ngago lang purik pelik kai yagenda, Anoto nogobek, Anoto nogobek, ni ne wezanira nangki, kai yagenda. 35 Yombanu mereke koya nawiligu pugu pilik kairagi kerewiya logo pelik kisa, Kerewiyi, pi Ilayayegi ngago mei kani, kisa.
36 Togo puwili wiyalowei miza logo puwiliyaga nak nginda kambela logo kapuk wezarik narik ngo nakke mela logo purik kai waing walekpekke yungke mela logo Yisu nibene manageya wizimowei pugu pelik yeiya, Yek yuke, Ilaya kanda Yisu yengeleileiga pugusiyaga ma yeik miza purikki pakelagine, yeiya.
37 Togo Yisu ngalizi kek kaiya logo weik ibeng.
38 Togo pulaga kagorik Anotogi i walek yemanemakke ngalege wiramiyarik paka ngalega pongo ngabelakke libuga koliyara narik narik miza. 39 Togo yombu amiwiliyegi ngaibek Yisuyegi mereke pulogo luwe wiziyabokko Yisu ibendikki pakela logo pelik kaiya, Wameik panu yombu pobok Anotogi Marek panubek, kaiya.
40 Yongok nawilirau pulogo tek nangezi koweiga pakela koya. Puwiliyaga namele Maliya Matalena keya namele Maliya, Yosisi keya pigi sakpek Jemsgi panumele, keya namele Salomo keya yongok kolokngagono nawilirau. 41 Puwili koka Yisu kiling pongo Kalili koyawili logo Yisuyegi paka Yirusalem kiriwei saweli keya kelemi kayimawili.
 
42-43 Pilik mizarik wok melenazikpekke logo wokpok Yudawili watabi puwiligi wok yawe mizi onobek meibekkiyeng ngayek mizibek. Logo yokmek kiliyagi merekewekke yombanu Yosep mei yereng Arimatiya meiragabek Pailetyegi kuna. Yosep, pi yeik wazonora kilimbek keya pi yombu ngagozakyengki kerewiyiwiliyaga nak, pi teng Anotogo pigi ngaimekki ngaigi puragi yuke yolubek. Pugu kumularik wok Sabatpek yawe mizi onobek weik mereke legi pi Yisugi yasurik wawiya logo waliyiweki miza.
Togo pi kozang sa logo panga Pailetyegi kanda luweza wizimowei Yisugi yasurik wawiyiweki meiya. 44 Pailet Yisu weik ibendikki kerewiyawekke pi kumula mela logo pugu pigi amiwiligi ngaibekyegi ngago meiya logo pelik meiya, Yisu yaka ibeng ma ngoluk, meiya. 45 Ngaibokko yaka ibendikki kozak meiya to mela logo Pailetgu Yosepyegi pelik meiya, Yisugi yasurik wawiyi purik pangka, meiya.
46 Togo Yosep kagorik wilangka wazono narik weiya logo pi Yisugi yasurik orowei yerageya logo kagoriktikku sape miza logo mosindaga king ururu yombanu waliyiweki keremiza namekke wiya. Togo Yosep kilingwiligu king yemane panu nara ulumowei kanda Yisugi londagi kandikke waliya wazamiya. 47 Maliya Matalena keya Maliya, Yosisigi panumele Yosepgu Yisugi yasurik pulogo wiya wazamirikki piyaugu pakela.