A Sisila ne
Ginigeet te Pol urungan köbo
TESALONIKA
Pol ixo sulo a lotu ringan Tesalonika xö xönö mee Masedonia. Pol ixo mamaa xöba ulamun abo Tesalonika ma ixo muu a tatalien deek kalik mon nang ixo to kaluluonin idi (pere 1 Tesalonika 2:1-12). Ma lamun a sasaban taxin ixo ot kö lotu ringan, ma abo Kristien toxo ugut e Pol bara irabo ulo wes, xalik irabo iuo (Aposol 17:1-10). Io, Pol ixo wan uruo Beria, ma melamu im ixo wan uruo Aten. Ma ixo tile öbaling e Timoti meringan Aten urungan Tesalonika (1 Tesalonika 3:1-5), möxösa, ixo dödöm köba ulamun abo Kristien tiso Tesalonika kölöme xöbo tiip (2:13-3:10). Melamu im, Pol ixo wan uruo Korin. Ma bere Timoti ixo tawuxus ma ixo töngösen e Pol ma nunu ma inemarse xöbo Tesalonika (3:6), Pol ixo tile önga ginigeet urungan te idi rua öxaxat idi ma rua usu idi ulamun abo tatalien deek (4:1-12; 5:12-22). Pol ixo usu idi bölök ulamun a tinawuxus se Krais ma ulamun a tinaru kaa xalik a minet köbo Kristien, möxösa, Pol ixoro kis aulik me idi mesila ma ixoro wan kalik idi, me idi kaim kö marmaras esexere xö ina laa na (1:9; 4:13-5:11). Inabo lalaa möxöbo axana bung möxö xakawöm a laa raxin kö ina nine ginigeet te Pol urungan köbo Tesalonika (pere bölök 2 Tesalonika 2:1-12).
1
1 E, e Pol, arixe me Sailas me Timoti, meet me tile ina tinenge na urungan tö mum a marakörö ne lotu niang Tesalonika, ewe mum mere God, a Tamana ire, me Jisas Krais, a Orong ke ire.
A abalamu ma malum irabo kis arixe me mum.
Pol ixo tengen deek ulamun a nunu xöbo Tesalonika
2 Meet mobo rengrengen deek kö God ulamun e mum kirip, nang e meet mobo rengrengen e mum kölöme xöbo sineseng ke meet. 3 Me meet mobo döxömen lo xö wawara xö God, a Tamana ire, abo tinörön deek ke mum nang i wanot möxö nunu re mum, mabo tinörön lölös se mum nang i wanot meringan kölöme xöbo abalamu re mum. Me meet mobo döxömen lo bölök bara mum moxobo tuu lölös sik iat tua xixiset ma balawapat ulamun e Jisas Krais, a Orong ke ire.
4 Io, mum abo töke kölöme re Krais, ewe God ibo mamaa xöba rö mum, meet me ösöxö bere God ixo pere kos lo e mum. 5 Me meet me ösöxö bira, möxösa, abo palas tinenge re meet arixe ma atöngösen deek i koxobo wan urungan te mum ma tinenge mon. Kaim. Ixo wan pösöt e mum ma lölös arixe ma Töxödös ne Tanono. Me mum moxo pere bere meet moxo nunu bara ina tinenge na i turunon. Me mum mo ösöxö e meet, bara a mangana nangadi bule e meet nang meet moxo kis kaluluonin e mum pua gene mum. 6 Me mum moxo muu ödeek abo to re meet arixe ma Orong bölök bira. Kaluluon köbo kinadik tataxin mum moxo öga lo ina atöngösen arixe ma axanan nang a Töxödös ne Tanono ixo isik. 7 Ma lamun ina na, mum mo xarnang a önga malalar deek nang abo tene nunu xirip kölöme Masedonia me Akaia, idi tabo muu. 8 A atöngösen maras ulamun a Orong i koxobo wanot meringan kalik e mum urungan Masedonia me Akaia xalik mon. Kaim. A atöngösen ulamun abo nunu re mum kö God, i wan kö boxönö xirip. Möxö ina na, meet koxobo mamaa ra rengrengen öbaling ke lalaa ulamunon. 9 Möxö idi iat toxobo rengrengen bere mum moxo ömaraxen lo e meet bule xö axana bung nang meet moxo wan urungan te mum. Me idi te rengrengen bara bule e mum moxo tawuxus urungan kö God xalik abo petpuo rua lotu wösöt a God turunon nang i to sik, 10 ma rua kinis xiset a Barok ke ine meriso xö watmaep, ewe nang God ixo öraru ine xalik a minet. Ma a Barok ke ine, e Jisas, ewe irabo ölanglanga ire xalik a laie re God nang irabo wanot melamu.