A Sese Öninöng ne
Ginigeet te Pol urungan köbo
KORIN
Kö ina ginigeet na ire ta pere a balana e Pol bara ixo marse abo Kristien tingan Korin ma bara ixo dödöm köba ulamun idi. A uleng ne nangadi toxo mamaa rua xikip a kinis ne sisila möxö lotu ringan Korin, me idi toxo bulus ösu e Pol. Idi toxo tengen bere Pol kaim bara önga aposol tunon, io nang, kaim ine mere lölös sua kure ödeek a lotu ridi ringan Korin. Io, a uleng ne Kristien idi toxo muu ina mangana dinödöm. Idi toxo bulus öraxin idi ma toxo pere ösu e Pol. Io, Pol ixo xisixis singan Esia ma ixo tapunuk ma ixo mamaa bere idi tabo dödöm puxus. Io nang, ixo tile e Taitus urungan Korin ma önga ginigeet tua ötumarang idi ulamun abo magingin saban te idi. Ma lamun e Pol ixo dödöm bang ulamun abo Korin ma ixo muu a nuan te Taitus, möxösa, ixo eka asuo me Taitus nang ixo tawuxus bara irabo ösöxö bara abo Korin idi tere dödöm puxus bara kawaim. Me Pol i koxobo pere lo ine riso Toroas, io nang, ixo wan urso Masedonia (pere 2 Korin 2:12-13). Me Pol ixo wöwörö ulamunon a tinörön te ine möxö palas tinenge ma atöngösen deek ma bara ina atöngösen deek ulamun e Jisas i deek köbo warkurai te Moses (2:14-6:21), xalik idi tabo ulo wes a tinenge nang idi tere kip lo. Ma ixo eösaxit tö idi nang toxo ii öraxin idi, ma ixo osen bara ine iat ixo kip abo tiip, inexalik inabo tiip iat nang i osen bere ine a önga tödi deek ke Krais (4:1-18; 6:1-10). Io, Pol ixo mamaa bere idi tabo dödöm puxus (5:20-7:4). Ma nang e Pol ixo esuo me Taitus siso Masedonia (7:5-6), me Taitus ixo tengen te Pol ulamun a dinödöm puxus möxöbo Korin, ina nang ixo öaxanan e Pol (7:6-16). Io, e Pol ixo tengen te idi bara tabo tagure ödeek abo arabaa re idi ulamun abo Kristien tiso Jerusalem (8:1-9:15). Ma ixo isik önga tumarang lölös se idi nang idi toxobo bulus ösu ine bara idi tabo dödöm puxus bölök, xalik irabo ömokorot idi nang irabo wan pösöt idi ruso Korin (10:1-13:10).
1
1 E, e Pol, önga aposol te Krais Jisas eöt ma a mamaa re God, me Timoti a tönö re ire kölöme re Krais, maa me tile ina tinenge na urungan te mum abo nangadi ne lotu re God tingan Korin me mum kirip abo nangadi re God kö boxönö xirip pingan Akaia. 2 A abalamu ma a malum urungan te mum meringan te God a Tamana ire, me Jisas Krais, a Orong.
God ibo isik abo aömanan.
3 Ire tabo ölet e God. Ine a God ma a Tata xö Orong ke ire, Jisas Krais. Ine a Tamana ire nang ibo isik a abalamu, me ine a God nang ibo ömanan ire xöbo lalaa xirip. 4 Me ine nang ibo ömanan ire xalik abo tiip lölös kirip, bara ire tabo eöt bara tabo ömanan idi xabise xalik abo mangana tiip sa re idi. Me ire tabo eöt tua ömanan idi, möxösa, God ibo ömanan ire. 5 I turunon bara abo kinadik kölöme re Krais i öwöwö abo to re ire, ma lamun God ibo ömanan köbanin ire bölök kölöme re Krais.
6 Ma nang bara rebo tiip i uban e mem,*Nang Pol i tengen ‘mem’ kö ina ginegeet na, i rengrengen lamun abo tene tinörön kö lotu ewe nang idi toxobo mumuu ödeek a inausu re ine. i ot bira rua ömanan e mum ma rua öro e mum. Ma nang bere God i ömanan e mem, i ot bira rua ömanan e mum. Ma ina na i isik a lölös se mum bere mum morobo eöt tua tinuu lölös kö ene inabo kinadik i eöt ma nang mem me örasen bölök. 7 Mem me nunu bara abo lalaa irabo wanot deek ke mum. Me mem me tuu lölös kölöme xö ina dinödöm, möxösa, mem me ösöxö bere God irabo ömanan e mum arixe me mem xarnang mum moxo örasen bölök abo kinadik nang e mem moxo örasen.
8 Abo töke kölöme re Krais, mem me mamaa bere mum morobo maras köbo tiip lölös nang mem moxoro örasen tuso Esia. Me mem koxobo eöt tua sösölök a tiip taxin nang ixo ot sik ke mem, inexalik mem moxo döxömen bara, “Maris, ire tekebeöt tua tino im.” 9 Mem moxo örasen inabo kinadik xarnang bara re önga tene pet warkurai ixo bulus im a öxöno warkurai bere mem marabo met. Ma lamun ixo ot bira bere mem karabo tuu xöbo lölös se mem iat, ma lamun e mem marabo mana tuu xö lölös se God nang ibo öraru abo minet. 10 Me ine ixo ölanglanga e mem nang moxo eka minet, ma irabo ölanglanga rewe e mem bölök kalik abo tiip. Me mem mere bulus sik abo dinödöm pe mem pe ine bara turunon saxit irabo ölanglanga rewe öbaling e mem melamu. 11 Me God irabo pet bira nang bere mum morobo top e mem mabo siniseng ke mum. Ma nang mum morobo seseng bira, God irabo balu abo sineseng möxöbo nangadi oleleng ma irabo top tataunin e mem. Io nang, a oleleng tabo tengen deek ke ine ulamun e mem.
Pol ixo kulas a dinödöm pe ine
12 Io, a tinenge aölolot te mem i bira, bara kölöme runon te mem iat, mem me ösöxö bere mem koxobo röxröxö a ulik me mem moxo muu abo mangana tatalien meriso re God i töxödös esexere nang mem moxo to kaluluonin a nangadi xö öxöno lagunon. Ma turunon saxit mem moxo pet bira nang mem moxo to kaluluon te mum. Mem kaim kö talien eöt mabo dinödöm mera mon kö öxöno lagunon. Kaim. God ixo top e mem ma a abalamu re ine rua mumuu abo tatalien töxödös. 13-14 Me mem me geet abo lalaa xalik mon urungan te mum nang i eöt tö mum pua xokos ma rua marmaras könan. Mum moxo maras auk lamun e mem. Ma lamun e mamaa xöba bere mum morobo maras kirip bere mum mo eöt tua ölolot e mem xarnang e mem bölök, mem marabo eöt tua ölolot e mum kö bung nang Jisas, a Orong, irabo ot baling.
15-16 E xo maras kirip sik bara a dinödöm pe mum ura re mem i bira, io, e xo pingit bara arabo arun tua uxileng e mum kö nuan te e uruso Masedonia, ma bara e rabo uxileng öbaling e mum kö binaling ke e meriso Masedonia, rue mum pua xikip a nine axana rorop. Me e xo döxömen bere mum morobo top e xö nuan te e uri Judeia. 17 Ma nang e xo pingit bara arabo wan im bira, ixo wawara bere e mabo dinödöm oleleng? Kaim. Bara bule, mum mo döxömen bara abo apingit te e i muu a tatalien te nangadi mera xö öxöno lagunon ewe nang te tengen bara, “I turunon,” ma lamun te döxömen bara “I kobo turunon”? Kaim. 18 Mum mo ösöxö runin bere God ibo wewet kirip eöt ma nang ixobo rengrengen. Io nang, mum morobo mana ösöxö bere mem moxo pet muu bira bölök nang moxo isik abo atöngösen te mem urungan te mum. Mem kebeöt tua rengrengen bara, “I turunon” ma “I kobo turunon.” 19 Ina na i maras, möxösa, Jisas Krais, a Barok kö God, i kebeöt tua wewet te laa nang i turunon ma i kobo turunon bölök. Kaim. Abo lalaa kölöme re ine i turunon kalik mon. Me ine nang meet me Timoti me Sailas meet moxo etöngösen min kaluluonin e mum. 20 Ma ina na i maras, möxösa, abo kunubus kirip pe God te ot turunon kölöme re Krais. Io nang, kö kinis se ire kölöme re Krais, ire te öturunon abo siniseng ke ire nang ire te tengen “Amen” uruso re God. Ma ina tatalien i ii öraxin a esene God. 21 Me ine ewe a öng i uxis ölölös e mem arixe me mum kö kinis se ire kölöme re Krais, ine e God. Me ine a öng ewe ixo bulus kabisenin ire 22 ma ixo osen bara ire rö ine iat, ma ixo bulus a Töxödös ne Tanono kölöme runon kö kat te ire xarnang önga kunubus sua öturunon bere ine irabo isik abo lalaa deek kö ire melamu.
23 E seng e God bara irabo öturunon a tinenge re e ma i bira: E koxobo wan baling uruso Korin, möxösa, e koxobo mamaa bara arabo ömokorot e mum. 24 Ma nang e tengen bira, mem kobo eka kure abo mangana dinödöm pe mum ulamun abo lalaa mum mo nunu xönan. Kaim, möxösa, mum mo tuu lölös köbo lalaa mum mo nunu xönan. Ma lamun mem me rörörön arixe me mum bere mum morobo kip a axanan.
*1:6 Nang Pol i tengen ‘mem’ kö ina ginegeet na, i rengrengen lamun abo tene tinörön kö lotu ewe nang idi toxobo mumuu ödeek a inausu re ine.