A Ginigeet te Pol urungan köbo
GALESIA
Pol ixo sulo a lotu möxö xönö mee Galesia (a uleng idi te döxömen bara xö sisila ne nuan te ine, ma uleng idi te döxömen bara xö sese öninöng ne nuan te ine). Me ina nangadi nang Galesia idi kaim bara abo Judeia. Idi tokoxobo muu a warkurai te Moses. Kaim. Idi toxo nunu xalik mon te Jisas, me God ixo öro idi. Inexalik melamu im, nang e Pol ixoro wan lo, a uleng ne tene ausu röxröxö idi toxo wan urungan Galesia ma toxo töngösen idi bara i kobo eöt bara re öng irabo kip a to ulorexe nang bara i nunu re Jisas kalik mon. Irabo mana muu bölök abo warkurai te Moses, ma önga warkurai taxin a tatalien möxö kuru lewene aine tödi rua osen bara ine mere God. Ma nang e Pol ixo see lo ina ausu niang, ixo laie ma ixo wuwus bölök bara abo Galesia idi toxo axanan tua ölangen inabo ausu nang i xabise xirip kö atöngösen turunon nang idi toxoro kip lo meringan te Pol (pere e Galesia 1:6-9). Me Pol ixo mamaa rua osen te idi bara ina atöngösen deek kalik mon i eöt tua öro idi. Ma ixo osen te idi bara ina atöngösen i turunon, möxösa, God iat ixo pere kos ine bara ine önga aposol ma ixo isik ina tinenge na urungan te ine (1:11-2:10). Ma unine möxö atöngösen deek ma unine ina ginigeet niang bölök i bira, bere God irabo kure bara öng i töxödös kö wawara re ine nang bara i nunu xalik mon te Jisas, ma kaim bara i muu abo tatalien deek köbo warkurai te Moses (2:16-21). E Pol ixo osen bara kaim pe öng irabo eöt tua mumuu abo warkurai te Moses. Io niang, God i mamaa bere ire tabo nunu xalik mon xarnang e Abaram ixo nunu, rua nang e God irabo kure bere ire te töxödös ma bara ire tabo langlanga rewe xalik inabo warkurai lölös (3:1-4:31). Ma inexalik i kobo deek bere ire nang tokobo kis kö ene inabo warkurai bara ire tabo pet abo sasaban (5:1-15). Kaim. Xö nunu re ire, tabo langlanga im rua mumuu abo tatalien deek xarnang a Töxödös ne Tanono irabo lamus ire rua tino bie (5:16-26).
1
1 E, e Pol, a önga aposol. Ma a nangadi mon idi kaim kö tibe e ma kaim pe öng ka tile e xarnang a aposol, lamun e re kip a kinis ne aposol meringan kalik e Jisas Krais me God a Tamana ire ewe nang ixo öraru ine xalik a minet. 2 Io, e arixe mabo töke kölöme re Krais ewe nang idi tobo xisixis arixe me e, mem me geet ina na urungan te mum abo marakörö ne lotu xö boxönö xirip Galesia.
3 E seseseng bara a abalamu ma malum irabo ot tö mum meriso re God a Tamana ire ma meriso xö Orong e Jisas Krais, 4 ewe nang ixo isik tewe a to re ine ma ixo met tua döxömen taun abo magingin saban te ire ma bara irabo öro ire xalik a magingin saban kinabo axana bung saban na. Ma ixo met bira rua wewet eörin a mamaa re Tamana ire e God. 5 Ire tabo ölet e God ulorexe. Amen.
Önga tinenge deek kalik mon angen
6 Maris! E wuwus saban bara saxit mon mum mo önan talu ewe nang ixo kuwe e mum. Ma ixo kuwe e mum bule? Ixo tabaa e mum me Krais. Saxit mon me mum mo mumuu a tinenge xabise nang idi te tengen bara a tinenge deek. 7 Lamun kaim bara a tinenge xabise, ine a tinenge deek turunon. Me e tengen mon biringan, möxösa, a dauleng idi te wewet öngangao e mum, me idi te mamaa bere idi tabo puxus ögarin a tinenge deek ke Krais. 8 Nang bere mem iat bara önga angelo iat meriso lömö xö balana kubu irabo palas tinenge urungan te mum nang i xabise xö tinenge nang mem moxo palas urungan te mum, e seng e God bara irabo perögat turunonin ine. 9 Xarnang mem moxo tengen mesila, na e tengen öbaling bira: nang bara ewe a öng i palas tinenge urungan te mum ma tinenge nang i xabise xö tinenge nang mum moxo ömaraxen lo, io, e seng e God bara irabo pet ögarin turunonin ine.
10 Mum mo döxömen bule? Nang bere e tengen bira, i wawara bara e mamaa bere a nangadi tabo ömaraxen lo e? Turunon saxit, kaim! Inexalik e mamaa bere God irabo ömaraxen lo e. Bule, i wawara bere e mamaa rua wewet öaxanan a nangadi? Kaim arixe. Nang bere e rabo könönöin bang kua wewet öaxanan a nangadi, io, i kebeöt bere e rabo önga tultul kö pu re Krais.
God iat ixo tibe e Pol
11 Abo töke kölöme re Krais, e mamaa bara mum morobo maras bara tinenge deek nang e xo palas se mum min kaim bara ixo wanot meringan kö önga tödi. 12 Kaim pe tödi ixo tengen te e, bara ixo usu e min. Inexalik, e Jisas Krais ixo öwösö rö e.
13 Io, mum moxoro ölangen a mangana to nang e xoro kis könan köbo mangana nunu re mem abo Judeia. E xobo wewet ösaban a nangadi möxö lotu re God me e xobo taxada ra ögarin ina lotu. 14 E xo nanase xöba rö idi a oleleng möxöbo töke ra mumuu ödeek abo tatalien köbo Judeia, me e xo axanan köba me e xo mamaa xöba rua rarame abo inausu möxöbo untubuno e. 15 Inexalik God ixo pere kos lo e xö ina abalamu rine mesila xö axana bung a nago ixo kip e, me God ixo kuwe lo e rö ine. 16 Ma ixo mamaa bara ra öwösö a Barok ke ine kölöme re e, bere e rabo mana palas tinenge kaluluonin idi a nangadi kaim bara abo Judeia. Ma nang e God ixo pet bira e kaim kö xikip pe tinenge maras xalik ke tödi lamun ina atöngösen na. 17 Me e kaim bölök ka nuan uruso Jerusalem rua werwere idi nang idi toxo kip a kinis ne aposol mesila re e. Lamun e xo saxit uri Arebia me e xo tawuxus baling uruso Damaskas.
18 Io, narun ne awat ixo saxit me e xo wan kaa uruso Jerusalem rue maa me Pita ra ösöxö xulen e maa. Me e xo kis arixe me ine xö sangaun ma pitnö ne bung mon. 19 Inexalik bara kaim e ra werwere re öng mere idi abo aposol kabise, xalik mon e Jems a tönö a Orong. 20 E usugurno na urungan te mum kö wawara xö God bara i koxobo töxö inabo lalaa e geet urungan te mum. 21 Io, melamu e xo wan lo urungan Siria me Silisia. 22 Ma abo lotu re Krais kö xönö raxin Judeia idi kaim kö ösöxö e. Idi kaim a eöt tua werwere xulen bölök a mamaran te e. 23 Ma lamun idi tobo sesee mon lamun a tinenge nang i tengen bira: “Ine ewe nang ixo wewet ösaban bang ire, na i palas tinenge lamun a tinenge deek nang ire te nunu xönan. Ma mesila ixo könönöin bara irabo ögarin ina tinenge.” 24 Me idi toxo ölet im e God, möxösa, rö e.