3
Jisas i taxin te idu me Moses
Io nang, mum abo madakdak ne töke nang e God ixo kuwe lo bölök e mum, mum morobo mana dödödöm bere e Jisas ewenene. Ine ewe nang e God ixo tile ura ma tinenge xarnang önga aposol. Me ine a pris taxin. Me ire ta nunu re ine ulamun inabo lalaa na. God ixo pere kos e Jisas, ma ixo pet eörin tunon iat a mamaa xö God, xarnang e Moses bölök ixo pet nang ixo balaure a bung marapun te God. Ma nang bara re öng i kip ot önga bung marapun, a ese raxin tabo isik ke ine, i taxin kö ese tabo isik iat kö ina bung marapun iat. Io niang, a ese raxin ire te isik ke Jisas i taxin kö ese ire te isik ke Moses. Turunon bara bung marapun kirip, a öngöng ibo kip ot idi. Inexalik e God ewe nang ixoro kip ot abo lalaa xirip. Moses önga tultul kölöme xö bung marapun nang ke God. Ma ixo rörön deek eöt tunon iat ma mamaa xö God. Ma ixo töngösen a nangadi ma niang e God irabo tengen melamu. Krais bölök bie. Ixo rörön deek eöt tunon iat ma mamaa xö God. Ma lamun Krais, ine a Barok kö God kölöme xö bung marapun te God. Ma ibo balaure ina marapun. Me ire abo unsaxana xö bung marapun te ine nang bara ire te tuu lölös kö nunu re ire ma nang bere ire te xixiset ma nunu raxin köbo lalaa ire te ölolot ulamunon nang e God irabo tabaa ire min melamu.
Ire tabo mana nunu
Io niang, mum morobo mana ölangen a Töxödös ne Tanono nang i tengen bira,
“Nang bara mum mo ölangen a inöno e God nixinen,
mum bele ölölös abo bala mum
xarnang abo untubu mum idi toxo ölölös abo baladi xina axana bung idi toxo tabuno ölangen e nang idi toxo könönöin e xö xönö tataun.
Idi toxo pere abo tatalien te e urungan te idi i eöt ma nit ne sangaun ne awat,
ma lamun idi toxobo könönöin e ringan ee.
10  Io niang, e xo laie mina nangadi.
Me e xo tengen, ‘Abo baladi ibo önan tewe xalik e.
Idi takara maras ulamun a mangana ngas nang e mamaa bara idi tabo muu.’
11  Io, e xo laie me e xo ösugurno bara,
‘Idi tekebeöt tua nilaxa xö kinis ne mamas se e.’ ”
12 Abo töke kölöme re Krais, mum morobo ebalaure deek bara xalik ke öng kaluluonin e mum ibo kip pe mangana dinödöm saban ma i kobo nunu. Nang bara öng i talien bira, irabo tawes lo xalik a God nang a lak to. 13 Ma ixo tengen ina axana bung niang bara, “Nixinen.” Ma “Nixinen” niang i bönöt bölök ina axanan bung na. Io niang, na im mum morobo mana eöxaxat ebasin e mum kö bungbung kirip, bara abo magingin saban i bele lamus öröxröxö re öng kaluluonin e mum ma irabo tabuno ölöngö. 14 Xö axana bung bere ire toxo nunu arun te Krais, ire toxo tuu lölös kö nunu re ire. Ma irabo ot maras bara ire mere Krais nang bara ire tabo tuu lölös biringan ot nang ire tabo met. 15 Nang bara ire te tuu lölös sik biringan i eöt ma tinenge xö God nang i tengen bira:
“Nang bere mum mo ölangen a inöno e God nixinen,
mum bele ölölös abo bala mum
xarnang abo untubu mum idi toxo ölölös abo baladi xina axana bung idi toxo tabuno ölangen e.”
16 Io, me ewe idi nang toxo ölangen, ma lamun idi toxo tabuno ölangen e God? Turunon saxit, bara idi iat nang e Moses ixo lamus ösu idi mero Isip. 17 Me God ixo laie sik ke ewe xö nit ne sangaun ne awat? Turunon saxit, idi mon nang toxo pet a sasaban ma toxo met tingan kö xönö tataun. 18 Me God ixo ösugurno ulamun ewe, bara idi tekebeöt tua nilaxa xö kinis ne mamas se ine? Idi mon nang kaim kö rarame ine. 19 Io, ire te maras bara idi tokoxobo eöt tua nilaxa, möxösa, idi tokoxobo nunu.