A Tinenge Deek ke
MAK
A tinenge deek ke Mak i kobo tengen te oleleng ne ausu re Jisas (pere a öxöno tinenge re Matiu). Kaim. I rengrengen köba ulamun a tinörön taxin te Jisas sua osen bere Jisas i uruoxe a lölös taxin te God, io nang, i eöt bara irabo döxömen tewe abo magingin saban ma irabo kun ölanglanga ire (pere Mak 10:45). Me Mak ixo bulus ölaxa a oleleng ne tinenge re Jisas ulamun abo auban nang ixo ot pösöt abo Kristien bölök. Io nang, i wawara bara xö axana bung bara e Mak ixo geet ina tinenge na, abo eler ixo ot pösöt abo Kristien, me Mak ixo ödöxömen lo idi xöbo tinenge re Jisas (8:34-38).
1
Jon ixo tagure a nuan möxö Orong
(Matiu 3.1-12; Luk 3.1-18; Jon 1.19-28)
A urulo möxö ina na lamun a tinenge deek ke Jisas Krais, a Barok kö God. God ixo tengen kölöme xö ginigeet te propet Aisaia bira:
“E rabo tile re tene kip tinenge re e mesila re nöngön,
ewe nang irabo tagure a ngas se nöngön.”
“A inöno öng i xukup kö xönö tataun,
‘Tagure a nuan möxö Orong,
ötöxödös a ngas sö ine.’ ”
Io, Jon a tene baptais ixo wanot kö xönö tataun, ixo baptais ma ixo etöngösen bara, “Mum moro kip lo a baptais sa osen bara mum muru dödöm puxus. Me God irabo döxömen taun abo magingin saban te mum.” Ma nangadi oleleng mee Judeia arixe mabo nangadi mee Jerusalem, toxo wan lo urungan te Jon. Idi toxo tengen ösu bara idi abo duöng saban, ma ixo baptais idi xö Ari Jordan. Jon ixo sige a man nang toxo pet ma bebene kamel ma ixo kie ine ma lewene bulmakau, ma ixobo enen a kö ma musien. Ma tinenge rine bira, “Önga tödi irabo wanot melamu re e, i taxin köba re e. E kobo töxödös eöt ta tinunsu ra walwalas a kililöng kalik a nine sandel te ine. E baptais e mum ma ari, lamun ine xalik irabo baptais e mum ma Töxödös ne Tanono.”
Jon ixo baptais e Jisas me Satan ixo könönöin ine
(Matiu 3.13—4.11; Luk 3.21-22; 4.1-13)
Xina bung nang e Jisas ixo wanot meruso Nasaret kölöme Galili, ma ixo kip lo a baptais xalik e Jon kö Ari Jordan. 10 Ma nang e Jisas ixo wan kaa xalik a ari ixo pere a balana kubu ixoro tamasawang ma Tanono ixo wan su lömö rine xarnang a buno. 11 Io, a inöno öng ixo ot meruso xö balana kubu ma ixo tenge bira, “Nöngön ano Barok ke e. E mamaa lamun me e axanan köba re nöngön.”
12 Saxit mon, a Tanono ixo tile ine urungan kö xönö tataun, 13 me ine ixo kis kö xönö tataun kö nit ne sangaun ne bung. E Satan ixo könönöin ine ma ixo kis arixe mabo gineme axe, nexalik abo angelo toxo top ine.
Jisas ixo etöngösen ma tinenge deek
(Matiu 4.12-17; Luk 4.14-15)
14 Io, nang toxoro öxös lo e Jon ma toxo ölaxa ine xö gunon ne aömokorot, Jisas ixo wan laxa urso Galili ma ixo etöngösen nana ma tinenge deek ke God. 15 Me Jisas ixo tengen, “A axana bung ire kis eöt. A kingdom kö God iri lörörö. Moro dödöm puxus ma moro nunu xö tinenge deek.”
Jisas ixo kuwe abo tene kip inan
(Matiu 4.18-22; Luk 5.1-11)
16 Bara e Jisas ixo önan kö gegene tu Galili, ixo pere e Saimon, ma tönö rine, e Endru. Idu toxo retewe eben kö ari, möxösa, idu a nine tene kip inan. 17 Me Jisas ixo tengen tidu, “Mu moro miang ma moro muu e, e rabo usu e mu ma ngas möxö xikip a nangadi.” 18 Io, saxit mon, idu toxo wan lie abo eben te idu ma toxo muu ine.
19 Ma nang e Jisas ixo wan ulik mon, ixo pere e Jems a barok ke Sebedi, arixe ma tönö e Jon kö mön, idu toxo marangas bulus abo eben. 20 Ma saxit mon, ixo kuwe idu me idu toxo wan lie e tamadu xö mön arixe mabo nangadi tinörön ma toxo muu ine.
Jisas ixo irewese abo tano saban
(Luk 4.31-37)
21 Me Jisas mabo bak ne ausu toxo wan uruso Kaprenaum. A bung Sabat ixo ot, me Jisas ixo wan laxa xö gunon ne sineseng köbo Judeia ma ixo usu a nangadi. 22 Nangadi toxo wuwus kö ausu rine, möxösa, ixo usu idi xarnang a tödi iri kip lo a lölös sua inausu, kaim xarnang abo tene ausu möxöbo warkurai te Moses. 23 Io, önga tödi kölöme xö gunon ne sineseng ke idi nang a tano saban ixo kis sine, ixo gee wösö bira, 24 “Jisas mee Nasaret, u mamaa ruasa xalik e mem? U wanot ta ögarin esexerein e mem? E ösöxö sik nöngön, bere nöngön Öng Ewe Nang a lak Madakdak meriso re God!”
25 Me Jisas ixo köö ina tano saban, ma ixo tengen, “Örö ödödö, ma wan su xalik ine.” 26 A tano saban ixo ögögöng ina tödi, io, ixo wan su xalik ine ma kinup taxin.
27 A nangadi toxo wuwus saban arixe, ma toxo ose öbaling iat idi bira, “A lasa ia? A ausu maxat ma lölös! Ine bo isik tinenge lölös urungan köbo tano saban me idi tobo tame ine.” 28 Io, a atöngösen tue Jisas ixo wan pasaxit kö boxönö xirip mee Galili.
Jisas ixo ölanglanga a oleleng
(Matiu 8.14-17; Luk 4.38-41)
29 Io, Jisas mabo bak ne ausu rine toxo wan su xalik a gunon ne sineseng. Ma saxit mon, idi toxo arixe me Jems me Jon urungan kö gunon te Saimon me Endru. 30 A taön te Saimon ixo maru sik ma malao xö öra, me idi toxo töngösen e Jisas me ine. 31 Io, Jisas ixo wan urungan te ine, ixo tön lo a limine ma ixo tön öraru ine. A malao ixo kawam kalik ine ma ixo urulo ra tabaa nienin idi.
32 Xina aien, nang a xaken ixoro kis döröng, a nangadi toxo kip ot abo duöng miniset me idi nang abo tano saban toxoro tup pe idi urungan te Jisas. 33 A nangadi oleleng köba möxö ina lagunon taxin idi toxo ot etok kö marame. 34 Me Jisas ixo ölanglanga a oleleng ne nangadi ma mangana miniset. Ma ixo irewese a oleleng ne tano saban, nexalik mon kaim ine ra ömaraxen abo tano saban ta tinenge, möxösa, idi toxoro ösöxö ewe iang ine.
Jisas ixo palas tinenge
(Luk 4.42-44)
35 Xö puxu bubung, nang ixo ködö xudun, Jisas ixo laran ma ixo wan lie a gunon, ma ixo wan lo urungan kö xönö tataun, ma ixo seseseng. 36 E Saimon mabo nangadi mere ine toxo wan ta winara re Jisas. 37 Ma nang idi toxo pere wösöt ine, idi toxo tengen bira, “Nangadi xirip te wawara siwin nöngön!”
38 Jisas ixo balu, “Ire ta wan urungan köbo lagunon lörörö, io nang, e öt ta palas tinenge bölök kidi e, möxösa, e ot ulamun.” 39 Io, ixo wan kö boxönö xirip mee Galili, ixo palas tinenge xöbo gunon ne sineseng kidi ma ixo irewese abo tano saban.
Önga lepra
(Matiu 8.1-4; Luk 5.12-16)
40 A tödi ma miniset lepra ixo ot pösöt e Jisas ma ixo subun kexe mesila rine ma ixo seng ine, “Nang bara u mamaa, nöngön u eöt ta öxawam a miniset lepra xalik e bara e ra madakdak.”
41 Me Jisas ixo sasanga ma limine ma ixo tön ine möxö ixo balamu ine. Ine ixo tengen te ine, “E mamaa. Örö deek.” 42 Saxit iat mon a miniset lepra ixo wan kalik ine ma ixo langlanga.
43 Jisas ixo uguran tewe ine arixe ma tinenge lölös bira, 44 “Ganim bara u tengen osen kere öng. Inexalik örö wan ma örö osen nöngön kö pris ma örö isik abo arabaa ne söngsöngöt eöt ma warkurai te Moses bara örobo deek baling. Ma irabo xarnang a atöngösen maras sö idi bara a turunon bere u xoro langlanga.” 45 Lamun ine ixo wan ma ixo etöngösen maras nana ma tinenge. Unine möxönan, Jisas kaim a nilaxa xö lagunon taxin kö mamaran kö nangadi, ma lamun ixo xisixis kö boxönö nang kaim pe nangadi xönan. Inexalik a nangadi angen toxo orot pösöt ine möxö boxönö xirip.