A Ginigeet te Pol urungan köbo
PILIPAI
Io, nang e Pol ixo wan urungan Masedonia rua tinenge ma a atöngösen deek, ixo wan kö lagunon taxin Pilipai (pere e Aposol 16:9-40). Io, ixo sulo a lotu ringan ma ixo wan lo baling. A uleng ne awat melamu, idi toxo tödik e Pol tiso xö lagunon kabise, me idi toxo bulus ine kölöme xö gunon ne aömokorot. A uleng nebo tene nanase idi te döxömen bara ro Rom (Aposol 28:14-31). Ma ringan kölöme xö gunon ne aömokorot Pol ixo geet ina ginigeet möxö tengen deek ke idi abo Pilipai, möxösa, idi toxo isik tar abo arabaa rua rorop ine (Pilipai 1:5; 4:10-19). Ma ixo tengen osen idi ulamun ine iat nang ixo kis kö gunon ne aömokorot. Ma dauleng ne nangadi idi toxo öriip a to re Pol, ma lamun e Pol kaim kö döxömen köbanin ina na, ma i kobo laa raxin köba rö ine ina kinis se ine kölöme xö gunon ne aömokorot bölök. Kaim. Ixo axanan mon bara a atöngösen deek i wan ebasin (1:12-26). Ma tatalien möxö axanan i laa raxin kö ina ginigeet (1:4; 1:18; 2:2; 2:17-18; 2:28-29; 3:1; 4:1; 4:4). Io, e Pol ixo öxaxat abo Kristien tiso Pilipai bere idi tabo mana tuu lölös arixe ma önga baladi xö atöngösen deek ma bara tebele buburin idi nang te eka ögarin idi (1:27-30). Ina na a unine ina ginigeet kirip na. Me Pol ixo seng abo Pilipai bara idi tabo talien eöt mabo duöng ödödö xarnang e Krais. Ine e God, inexalik ixo wanot xarnang a tödi ma xarnang önga tultul tua gene ire (2:1-11). Me Pol ixo tengen te idi bölök bara irabo tile e Timoti me Epaparoditus urungan te idi, ma a nine tödi deek idu (2:19-30). Ma ixo ötumarang idi ulamun abo tene ausu röxröxö nang idi toxo tengen bara i eöt bara tabo muu a tinörön deek kö nangadi mon bara tabo töxödös kö wawara xö God. Inexalik ixo tengen bara ire tabo nunu mon te Krais sua nang ire tabo töxödös (3:1-21).
1
E, e Pol me Timoti, maa a nine tultul kö pu re Krais Jisas. Me maa me tile ina tinenge urungan te mum a nangadi runon te God, mum niang mo kis kölöme re Krais Jisas singan Pilipai. Me maa me tile bölök ina tinenge na urungan te mum abo sisila ne lotu me mum abo tene rorop möxö lotu.
A abalamu ma malum urungan te mum meriso re God a Tamana ire ma meringan te Jisas Krais, a Orong.
Pol ixo seseng lamun abo Pilipai
Me e tengen deek urungan te God köbo axana bung kirip niang e bo döxömen lo e mum. Xöbo bung kirip nang e bo seseseng kö mum, e bo seseseng ma axanan, möxösa, mum moxobo ruruu arixe me e kölöme xö tinörön möxö tinenge deek urulo xö sisila ne bung ot nixinen. Me e bo seseseng bölök bira, möxösa, e ösöxö runoin bere ewe ine niang ixo urulo a tatalien deek kölöme re mum irabo rörörön biringan ot nang irabo mana öxawam ina tinörön kölöme re mum kö bung ke Krais Jisas.
Inexalik i deek ke e bara e rabo örasen ina mangana aörasen bira lamun e mum, möxösa, mum mo kisisik kölöme xö kat te e. God ixoro tabaa tataunin mon e mum ma rorop bere mum morobo eöt tua tinuu arixe me e xöbo mangana lalaa i ot pösöt e. Niang bara e kisisik ka xö gunon ne aömokorot, bara e tuu wi abo apuk köbo tinenge deek, bara e öturunon inabo tinenge, io, mum morobo kip a tiip arixe me e. I eöt bara God irabo sixaut xarnang a balake i muu xöbanin e mum eöt ma abalamu re Krais Jisas i ot pösöt e mum.
Me e seseseng bara a abalamu re mum irabo mana rataxin ma bara a nanase re mum rua ösöxö xulen abo dedeek ma abo sasaban irabo kure ödeek inabo abalamu, 10 io nang, mum morobo perexulen abo lalaa i deek köba saxit ma xalik mum bo subu xö abo lalaa i saban, ma bara mum morobo deek köba saxit tua tagure e mum lamun ina bung ke Krais. 11 Me e seseseng bölök bara abo to re mum irabo wöwö ma inone tatalien töxödös nang i ot meriso kölöme xö kinis se mum arixe me Jisas Krais. Ma inabo inone irabo örarik a nangadi rua ölelet ma rua ii öraxin e God.
A dinödöm taxin te Pol bara a tinenge deek irabo wan esexere
12 Abo töke kölöme re Krais, e mamaa bara mum morobo maras bara abo lalaa niang ixo ot te e ixo top a tinenge deek kua nuan nana. 13 Möxö ina na, abo umri möxö sisila raxin saxit na, mabo nangadi xabise bölök, idi te ösöxö bara e kisisik ka xö gunon ne aömokorot, möxösa, e mere Krais. 14 Ina kinis se e kölöme xö gunon ne aömokorot ixoro öxaxat a oleleng arixe möxö bung marapun te ire xö kinis se idi kölöme xö Orong. Io, ina na ixo bira, idi toxo balamasa sik mon ma kaim idi ra binuut tua atöngösen ma tinenge re God.
15 I turunon bara dauleng te palas tinenge re Krais, möxösa, idi te dödöm saban lamun a kinis ne sisila re e me idi tobo bala kadik kö e. Lamun tö idi xabise, idi te etöngösen ma dinödöm deek lamun e. 16 Ma ina nangadi na, idi tobo wewet bira arixe ma abalamu, möxösa, idi te ösöxö bere God ixoro pere kos lo e bere e rabo tuu wi abo apuk möxö tinenge deek. 17 Ma lamun idi xabise ewe niang te etöngösen lamun e Krais, idi tobo eönunu mon. Idi te pere neek abo kinis taxin bere idi iat. Nang bang e kisisik kö ina gunon ne aömokorot, idi te döxömen bere idi te öt tua ötari a tiip pö e. 18 Ma lamun kaim pe laa. Niang bara te palas tinenge ma dinödöm ne aönunu bara dinödöm turunon, i kobo laa raxin köba. Lamun a laa niang i taxin, i bira, nang bara idi te muu abo ngas kirip pua palas tinenge lamun e Krais. Möxö ina na, e axanan im.
Me e rabo mana axanan iat, 19 möxösa, e ösöxö sik bara abo lalaa niang ixoro wanot sik ke e, irabo engin e bara e rabo langlanga im möxöbo sineseng ke mum ma möxö rorop taxin meringan kö Tanono e Jisas Krais. 20 Me e rabo langlanga im bira eöt ma mamaa raxin te e bere e bele pet te laa niang irabo ömenge e. Me e dödöm köba bara i turunon bara e kebeöt ta pet bira. Lamun e mamaa bara e rabo wöwö ma balamasa bere na a to xirip pe e irabo öraxin e Krais xarnang e xobo wewet bie. Niang bara e to bara e met, e mamaa mon bara e rabo ii öraxin e Krais. 21 Ma bira im, xö dinödöm pe e, niang bere e to, Krais ine a unine to re e. Ma nang bara e met, irabo deek köba rö e. 22 Ma nang bara e kisisik iat kö ina aike, e ösöxö bara nangen a inone tinörön te e. E kobo ösöxö bara e rabo pere kos lo ewenene re idu. 23 A mamaa re e i palang elixilixin idu ina nine mangana dinödöm. E mamaa bara e rabo met me e rabo wan urso re Krais, möxösa, ina niang i deek köba saxit. 24 Inexalik a sasaxan taxin bara e rabo mana kis kö ina to na rua rorop e mum. 25 Ma, möxösa, e maras kirip sik bara to re e irabo top e mum bira, e ösöxö bara e rabo to sik iat, me e rabo kis arixe me mum lamun abo nunu re mum irabo önan kaa, ma morobo kip a axanan köbo lalaa niang mum mo nunu xönan. 26 E rabo to iat nang bara morobo öt ta ölolot köbanin e Krais Jisas nang bara e ot baling urungan te mum.
Ire tabo mana tuu lölös sik ma tinenge deek.
27 Ma laa raxin ine bira, bara mum morobo mana tatalien xarnang a tinenge deek ke Krais i tengen bie. Ma bira im, nang bara e rabo wanot me e rabo pere e mum, bara e kebeöt ta nuan urungan te mum, ma lamun e ölangen mon te tinenge lamun e mum, io, e rabo ösöxö bara mum morobo tuu lölös kö önga dinödöm, ma bara mum morobo esek xarnang önga tödi xalik mon ibo esek kua werwere muu inabo lalaa niang ire te nunu xönan möxö tinenge deek. 28 Ganim a buburin te tödi niang i mamaa rua ögarin a dinödöm pe mum. Inabo mangana tatalien na irabo osen ömaras bara God irabo ögarin köbanin idi, ma lamun irabo öro e mum. 29 I eng bira, möxösa, God ixo tabaa e mum ma kinis deek lamun e Krais bara mum morobo nunu re ine. Ma lamun kaim bara na mon. Mum morobo kip bölök a tiip lamun ine, 30 möxösa, mum mo laxa sik kina kinadik iat nang mum moxo pere niang e xo örasen ma nang mum mo ölangen na bara e angen könan.