Fawu u e Leta
ke Pol usuf
Timoti
Orek Famu
Leta igii, i e fawu u e leta ke Pol usuf Timoti. I siit u aunbiing i kiis ta na kamkabet na Rom. Timoti i nenge tikiin foim ke Pol, namih, ka tapiek famfamu na lotu na Efeses.
Pol i usum le fatat in met, pesu ka siit leta igii. I ier isi farakrakai unune ke Timoti ke ka fas u sabin isi gong i mangeh na fafas ini Rokap na Fafas.
Fawu u e Leta usuf Timoti i aragii:
1:1-2 Tanwara na leta igii
1:3-18 Pol i farakrakai unune ke Timoti
2:1-26 Sinangun nenge tom foim tekentu
3:1-9 Sinangun fanu na foron farfarop na biing
3:10—4:5 Pol i farakrakai Timoti
4:6-18 Pol i use fafis u tom
4:19-22 Farfarop na orek ke Pol usuf Timoti
1
1 Ia Pol, ia nenge aposel ke Karisito Iesu na wolwol ke God isi ian fafas ini liu ae God i falimlim ta ini usuf kerer, lo Karisito Iesu. 2 Aposel 16:1Ia sisiit usuf o Timoti, rokap na keng kalalik na asa Iesu. Famais, falupes ke siaroh sing God Tama kerer ke Karisito Iesu Kumguui kirer, in kiis turam.
Pol i Farakrakai Unune ke Timoti
3 Na foron wor ke na foron siat, aunbiing ia wolpes o la na foron sising kiak, ia fotrokap lo God ae ia tel foim la kia ini tortores na wolwol, arae foron tubuktamat ri tel u la. 4 Ia wolpes aunbiing o tingis ta iau, ma ia ka lala ier tom isi ian par o sabin, isi liu kiak ik fuun ini laes. 5 Aposel 16:1Ia wolpes tekentu na unune kiam ae ifasi arae unune ke Lois, tubumfifin ke Yunis, tinam. Ma igii, ia usum le unune igii, ae sabin sing o. 6 I e wara, ia ka fas o sabin isi ok fatuntun fafis fafen ae God i ta ta u usuf o, aunbiing ia luun ta iun limang na olom. 7 Wara le God biil i ta ta tanwan sokeh usuf kerer, biil. I ta Tanwa Kalkaluu usuf kerer ae i ta rakrakai la, sinangun famais ke sinangun nagogon fakasi liu kirer.
8 Pesu, gong o matlawen isi fafas ini kirer Kumguui, le ini iau, wara ia kiis na kamkabet na asa. Isau le, on geges isi kalsakai fangungut turim turang isi Rokap na Fafas, ma God tom in ta rakrakai sing o. 9 I tom i faliu ta kerer ke ka kam pes ta kerer isi keren tapiek kalkaluu. Biil i wara na foron foim ae kere tel ta u, biil. I wara sau na wolwol kia tom ke na famais kia ae i ta ta u usuf kerer lo Karisito Iesu, aunbiing biil biitom i fakiis ta piklinbat. 10 Ma igii kere ka par ta famais ke God usuf kerer na tapiek ke Tom Fafaliu kirer Karisito Iesu, ae ka farop ta rakrakai ken minet ke na Rokap na Fafas, ka famalal sal una liu fitliu. 11 1Timoti 2:7Ma iau, God i tim pes ta iau isi ian tapiek nenge tom fafas, nenge aposel ke nenge tom fafausum ini Rokap na Fafas. 12 I e wara ia ka kalsakai foron fangungut igii. Isau le, biil ia to matlawen, wara le ia usum lo ier ae ia unune lo ma ia usum sabin le i fofonoi la na foim ae i unune ufu ta usuf iau, papang na biingen paipaifis kia. 13 On posefat na foron fafausum ae ia ka fausum ta wo ini, ma in arae rokap na tintof isi on mi lo. Ke on tifat na unune ke famais kirer, lo Karisito Iesu. 14 On fofonoi na rokap na tier ae God i unune ufu ta u usuf o. On fofonoi lo ini rakrakai ken Tanwa Kalkaluu igii lo kerer.
15 O usum le Figelus ru e Ermogenis turan foron tom unune tikii na falifu na Eisia ri ka la koseng ta iau.
16 Ia sising le God in mais fanu tikii na matanfel ke Onesiforus, wara le fafuun i falaes fafis ta iau ma biil i to matlawen kunang aunbiing ia kiis ta na kamkabet. 17 Aunbiing i la uga na Rom, i im rakrakai tom isi iau, papang na aunbiing ka tafe iau. 18 Ia sising le Kumguui in finngas famais kia usuf Onesiforus na biingen paipaifis kia. O usum rokap tom na foron falupes tikii kia usuf iau na Efeses.