8
Iesu i e Laulaumet na Pris na Puput Fuuh
1 BukSong 110:1Wara tutus e sani keme ususe u la i aragii: Imel e nenge laulaumet na pris kirer, ae i kiis na mia na nian kiiskiis ken tara King buuii na kukulii. 2 Ma i foim arae pris bae na kukulii, na falifu ae i kalkaluu kanaka, i e Felun Tunmapek tekentu ae Kumguui tom i tel ta u, ma biil e fanu.
3 Foron laulaumet na pris tikii, ri luun ta ri isi rin ta foron fafen ke rik tel tunmapek. Ma i temin tier tom le Iesu sabin in ta ti fafen. 4 Male i aga na piklinbat, ke biil in tapiek ta arae nenge pris, wara le ka mel ta e fanu ae ri ta foron fafen la namin nagogon ke Moses. 5 KisimBek 25:40Ri foim la na Felun Tunmapek, ae i arae tantanwan sani buuii na kukulii. I e wara God ka fanau ta Moses aunbiing i geges isi fiti Palpalbuang ke God. I tara aragii, “Ongen u, on tel foron tier tikii, arae tom ia finngas ta wo ini bae na pungpung.” 6 Isau le foim ae God i ta ta u usuf Iesu arae pris, i liu ufu foim ken foron pris tikii. Arae sabin na puput ae Iesu i tel ta u isi in tel turim God turan fanu, i liu ufu puput tofe, wara le puput fuuh i ti na olon falimlim, ae i rokap kanaka na neng tofe.
7 Male puput famu i rokap sau, ke biil sabin in mel e tikas pes. 8 Jeremia 31:31-34Isau le God i tafe u le fanu ri tel sinang laulau biitom, pesu ka tarah,
“Kumguui i tara aragii:
Nenge aunbiing in tapiek,
ae ian tel nenge puput fuuh
turan fan Israel
ke turan fan Iudaia.
9 Biil in arae puput
ae ia tel ta u turan foron tubutamat ri,
aunbiing ia tangne fasuu ta ri tina Isip,
wara le biil ri to misuut ta na puput kiak.
Ma ia ka tamikis koseng ri.
Ia Kumguui ia use u aragii.
10 Igii e puput ae ian tel u turan fan Israel
na foron biing namih:
Ian luun foron nagogon kiak na wolwol kiri,
ma iak siit u na balri.
Ian tapiek God kiri,
ma rik tapiek fanu kiak.
11 Biil mang tikas in fausum ier ae na fatat u,
le tualik aragii,
‘On usum lo Kumguui,’
wara le, ri tikii rin usum lo iau,
tipes u lon fanu foes ulon fanu kausi.
12 Wara le ian pa ufu foron sinangu ri ae biil i tortores,
ma biil mang ian wolpes foron sinang laulau kiri.”
13 Aunbiing God i foteng ta puput igii le, “puput fuuh,” i malal le puput famu i tofe. Sani ae i tofe ma i mutmut, biil in sawin ke ik mangmangal.