10
Karisito i ta Pununfo tom arae Tunmapek
Nagogon ke Moses i tantanwa sau e foron tier rokap ae in tapiek namih, biil i foron tier tekentu. I e wara, foron tunmapek ae ri tel mulmul u na foron bet tikii namin nagogon ke Moses, biil tom ifasi in fafuu fanse ae ri la fatat God isi lotu unaisa, biil. Male foron tunmapek ae, i fafuu ta fanu, ke biil mang rin tel tunmapek sabin. Wara le, rik fuu ta koseng foron sinang laulau kiri ke biil mang rin sir sabin kunan ti sinang laulau. Isau le biil, wara le aunbiing ri tel foron tunmapek ae na foron bet tikii, ri ka namne pes foron sinang laulau sabin kiri. Wara le, daun bulmakau ke daun meme, biil tom ifasi in pa ufu foron sinang laulau.
BukSong 40:6-8Pesu, aunbiing Karisito i tapiek aga na piklinbat, ka tarah,
“Biil o naim tunmapek turan fafen,
isau le o fageges ta nenge pununfong.
Biil o laes la isi foron tunmapek ae ri tun u la
turan foron fafen una tel ufu sinang laulau.
Ke ia ka tara aragii,
‘God, ia igii.
Ia la uga isi fasuut wolwol kiam,
arae ri siit ta u na Buk na Gogoh ulo iau.’ ”
Karisito i use famu ta u aragii, “Biil o laes ke biil o naim foron tunmapek, ke foron fafen, foron fafen ae ri tun u la, ke foron fafen una tel ufu sinang laulau.” Taftawa nagogon i use u le rin tel u. Ke nami ka tarah, “Ia igii. Ia la uga isi fasuut wolwol kiam.” Ka kiliis ufu puput famu ini fawu e puput. 10 Iesu Karisito i fasuut wolwol ke God aunbiing i ta pununfo tom fatikii sau arae tunmapek una fakalkaluu kerer.
11  KisimBek 29:38Na foron biing tikii, foron pris ri soti ma ri ka tel foim la kiri. Ri tel tunmapek mulmul la usuf God, isau le foron tunmapek ae biil tom ifasi in tel ufu foron sinang laulau. 12  BukSong 110:1Isau le, Karisito i ta ta itikii sau e tunmapek usuf God isi foron sinang laulau ma tunmapek ae i kiis fitliu. Aunbiing ka tel ta u, ka kiis mang na mia God. 13 Ma tipes u na aunbiing ae, i nene biitom isi God in luun foron tuui kia na piklin keke. 14 Wara le, na itikii sau e tunmapek, ka fatortores fitliu fanse ae i famam fakalkaluu ri.
15 Tanwa Kalkaluu sabin i famalal u usuf kerer. I use famu ta u aragii,
16  Jeremia 31:33“Kumguui i tarah:
Puput igii ian tel u tura ri,
na foron biing namih.
Ian luun foron nagogon kiak na balri
ma iak siit u na wolwol kiri.”
17  Jeremia 31:34Namih, ka use u sabin aragii,
“Foron sinang laulau
turan foron sinangun lek nagogon kiri,
ian wol ufu mang.”
18 Ma aunbiing God ka pa ufu ta foron sinang laulau, ke biil sabin in mel e tunmapek una pa ufu sinang laulau.
Minet ke Iesu i Sapeng na Sal isi Keren La Fatat God
19 Pesu, foron tuaklik, wara na dawu Iesu ke kere ka kep balamas isi kau na Falifu ae i Kalkaluu Kanaka, 20 na nenge sal ae i fuuh ma i ta liu. Sal ae i sapeng usuf kerer isi keren kau sikit na kaen ae i balo kale Falifu ae i Kalkaluu Kanaka. Kaen ae i e pununfo Iesu. 21 Ma wara le imel e tara pris kirer ae i fofonoi lon fanu ke God, 22  WokPris 8:30; Esekiel 36:25pesu, keren la fatat God ini tekentu na balrer ke ini rakrakai na unune. Wara le Iesu ka sapi ta balrer ini dawu, isi wolwol kirer ik fuu koseng foron sinang laulau kirer ma ka sufe fafuu pununfo kerer ini dan ae i kalkaluu. 23 Pesu, keren posefat na unune ae kere ka fapos ta u, wara le God i fasuut falimlim kia la tom. 24 Ke keren wolpes ti fale sal sabin una fapti faliu gesges kirer na sinangun famais ke sinangun tel foron rokap na foim. 25 Gong kere sok ufu sinangun kiis turim, arae fal ri ka sok ufu tah, gong. Isau le, keren farakrakai faliu kerer ma keren rakrakai na tel u, wara le gam usum le Biing ke Kumguui ka fatat mang.
Gong Kere Su Fis
26 Male kere tongon tel sinang laulau biitom aunbiing kere ka usum ta na tekentu, ke biil ti tunmapek sabin in pa ufu foron sinang laulau kirer, biil. 27  Aisaia 26:11Keren kiis sau ini sokeh ma kerek nene pes nagogon turan tara na yiif ae in fasok foron tuui ke God. 28  Lo 17:6; 19:15Male tikas ka lek ta nagogon ke Moses, ma iwu le ituul ri ka somangat turim le i sir kuna, ke rin siimete u ma biil rin to mais u. 29  KisimBek 24:8Male i arae, ke gam wol arafa lo ier ae i puris Kalalik ke God ma ka wol le dah na puput fuuh ae i fakalkaluu ta u i tier foes sau ma ka orek laulau ulon Tanwa Kalkaluu ae i ta famais la? Awii ngan biil in rakrakai e nagogon usuf i, beh? 30  Lo 32:35,36; BukSong 135:14Wara kere usum lo ier ae i tarah, “Iau tom ian kiliis fafis sinang laulau kiri, ian kiliis u.” Ke ka tara sabin aragii, “Kumguui in nagogon fanu kia.” 31 I tier an sokeh le keren luut una lima God ae i liu.
32 Gamen wolpes foron biing pakanini sau, aunbiing gam kep ta malal na liu kimi, ma gam tifat tom na palgan piran tatawin ke fangungut. 33 Fale aunbiing, fanu ri orek laulau la ulo gam ke ri ka ta fangungut sing gam na matan fanu. Ke na fale aunbiing sabin, gam tibel fanu ae ri kep fangungut arae. 34 Gam mais fanu ae ri kiis na kamkabet ke gam ka lupes ri. Ke gam laes sau aunbiing fanu ri dat foes foron minmara gam, wara le gam ka usum ta le imel e rokap na minmara gam ae i kiis fitliu.
35 Pesu, gong gam sok ufu rakrakai na unune kimi, wara le fasuat lo in laumet kanaka. 36 Gamen tifat isi aunbiing gam ka tel fasuut ta wolwol ke God, ke gamek kep sani ae ka falimlim ta ini. 37  Habakuk 2:3,4Wara le Buk na Gogoh i tarah,
“Biil in sawin, ke ier ae le in tapiek, ik tapiek mang,
ma biil in muduung.
38 Ma tom tortores kiak in liu, wara na unune kia.
Isau male ka su fis,
biil mang ian laes ini.”
39 Isau le kere biil kerer lon fanse ae ri su fis ma ri ka fiu, biil. Kerer lon fanu ae ri unune ma God ka faliu ta ri.

10:5: BukSong 40:6-8

10:11: KisimBek 29:38

10:12: BukSong 110:1

10:16: Jeremia 31:33

10:17: Jeremia 31:34

10:22: WokPris 8:30; Esekiel 36:25

10:27: Aisaia 26:11

10:28: Lo 17:6; 19:15

10:29: KisimBek 24:8

10:30: Lo 32:35,36; BukSong 135:14

10:37: Habakuk 2:3,4