3
Jon Tom tel Bapitaiso i Fafas
Metiu 3:1-12; Mak 1:2-8; Jon 1:19-28
1 Na fasangful ini lim e bet aunbiing Sisar Taiberias i nagogon, Pontus Pailat i nagogon na matanfuntih na Iudaia, ke Erot i famfamu na matanfuntih na Galili. Ke Filip tualik e Erot i famfamu na matanfuntih na Iturea ke na Trakonitis, ke Lisanias i famfamu na matanfuntih na Abilene. 2 Ma Anas ru e Kaiapas ru famfamu ken foron pris. Na bet ae, orek ke God ka tapiek sing Jon, kalalik ke Sakaria, na falifu foes. 3 Jon i la na foron falifu tikii fatat dan na Ioridan, ma ka famam fafas sing ri le rin sokiliis liu kiri ke rik kep bapitaiso, isi God ik pa ufu foron sinang laulau kiri. 4 Aisaia 40:3-5Arae ri siit ta u na buk ke profet Aisaia,
“Kinen tikas i tautau na sunbiil aragii:
Fageges sal sala Kumguui,
fatortores sal sala.
5 Wof foron palgan dan,
kef fapu foron pungpung turan foron tatkau.
Foron sal ae i firfirit, fatortores ri.
Foron sal ae ri tohtohnen, tumarnge ri.
6 Ma fanu tikii rik par fafaliu ke God.”
7 Metiu 12:34; 23:33Tara gur na fanu ri ka la usuf Jon isi in baptais ri, isau le ka tara sing ri aragii, “Gam foron natun sii fafangaet. Se i tara le gamen alfe ngaliaf ke God ae in tapiek? 8 Jon 8:33In mel e rokap na fua gam, isi ik finngas u le gam ka sokiliis liu tah. Ke gong gam tipes tara sing gam tom le, ‘Abaram i e tama kemem.’ Ia fas gam, God ifasi in sokiliis foron fat igii isi rik tapiek berberat ke Abaram. 9 Metiu 7:19Palnget ae mang ta na baulin foron au, ma foron au tikii ae biil ri fua rokap la, rin pok faluut ri ma rik lin ri una yiif.”
10 Gur na fanu ae ri ka diik aragii, “Sani mang kemek tel u?”
11 Jon ka kiliis ri aragii, “Se iwu e kaen kia, in ta tikas usuf ier ae biil tikas kia, ke se ae imel e inen, in tel u sabin arae.”
12 Luk 7:29Ke fale tom kep takiis sabin ri ka la usuf i isi in baptais ri, ke ri ka diik u aragii, “Tom Fafausum, sani kemen tel u?”
13 Ke ka kiliis ri aragii, “Gamen kep takiis sau namin nagogon ae ri ka luun ta u. Gong gam kep ti fal sabin na olo, gong.” 14 Ke fale tom fapaket ri ka diik u aragii, “Ke sani kemen tel u?”
Jon ka kiliis ri aragii, “Gong gam fangongos fanu isi rin ta pitkalang usuf gam, ke gong gam tiu foes fanu. Gamen laes sau isi fifiil kimi.” 15 Fanu ri nene la isi Mesaia. Aunbiing ri ongen Jon, ri ka wol le, “I mang ngan e Mesaia?” 16 Jon ka kiliis ri aragii, “Ia baptais gam ini dan. Isau le ier ae in mi pes iau, rakrakai kia i liu kulkulef na rakrakai kiak. Pesu, biil ia tortores isi ifasi ian puk ufu finaun su kia. In baptais gam ini Tanwa Kalkaluu ke ini yiif. 17 I pose na nenge saol una simke ufu foron piin na wit. Aunbiing ka simke tikii ta u, ke ik luun turim wit rokap na felu. Isau le foron piin, ik fasok u na tara yiif ae biil i to met la.” 18 Jon ka farakrakai ri ini ifuun e orek, ma ka fafas ini rokap na fafas usuf ri.
19 Metiu 14:3,4; Mak 6:17,18Isau le aunbiing ka fakiing Erot, wara le i telpes Erodias antu Filip tualik, ke isi fale sinang laulau sabin ae i tel ta u, 20 Erot ka tel nenge tier laulau sabin, aunbiing i luun Jon na felun kamkabet.
Jon i Baptais Iesu
Metiu 3:13-17; Mak 1:9-11
21 Aunbiing Jon ka baptais tikii ta fanu, ka baptais Iesu sabin. Ma aunbiing Iesu i sising, kukulii ka sapeng, 22 Stat 22:2; BukSong 2:7; Aisaia 42:1; Luk 9:35ke Tanwa Kalkaluu ka puh arae nenge bun ulo. Ma kinen tikas ka orek tinbae na kukulii aragii, “O keng Kalalik ae ia ier kanaka isi wo. Ia laes kanaka ini wo.”
Foron Tubutamat e Iesu
Metiu 1:1-17
23 Iesu i tipes tel foim kia aunbiing bet kia ifasi aragii ituul e sangful e bet. Fanu ri wol le i kalalik ke Josep.
Josep i e kalalik ke Eli,
24 Eli i e kalalik ke Matat,
Matat i e kalalik ke Liwai,
Liwai i e kalalik ke Melki,
Melki i e kalalik ke Janai,
Janai i e kalalik ke Josep,
25 Josep i e kalalik ke Matatias,
Matatias i e kalalik ke Amos
Amos i e kalalik ke Naum,
Naum i e kalalik ke Esli,
Esli i e kalalik ke Nagai,
26 Nagai i e kalalik ke Mat,
Mat i e kalalik ke Matatias,
Matatias i e kalalik ke Semein,
Semein i e kalalik ke Josek,
Josek i e kalalik ke Joda,
27 Joda i e kalalik ke Joanan,
Joanan i e kalalik ke Resa,
Resa i e kalalik ke Jerubabel,
Jerubabel i e kalalik ke Sealtiel,
Sealtiel i e kalalik ke Neri
28 Neri i e kalalik ke Melki,
Melki i e kalalik ke Adi,
Adi i e kalalik ke Kosam,
Kosam i e kalalik ke Elmadam,
Elmadam i e kalalik ke Er,
Er i e kalalik ke Josua,
29 Josua i e kalalik ke Elieser,
Elieser i e kalalik ke Jorim,
Jorim i e kalalik ke Matat,
Matat i e kalalik ke Liwai,
30 Liwai i e kalalik ke Simion,
Simion i e kalalik ke Juda,
Juda i e kalalik ke Josep,
Josep i e kalalik ke Jonam,
Jonam i e kalalik ke Eliakim,
31 Eliakim i e kalalik ke Melea,
Melea i e kalalik ke Mena,
Mena i e kalalik ke Matata,
Matata i e kalalik ke Neitan,
Neitan i e kalalik ke Dewit,
32 Dewit i e kalalik ke Jesi,
Jesi i e kalalik ke Obet,
Obet i e kalalik ke Buas,
Buas i e kalalik ke Salmon,
Salmon i e kalalik ke Nason,
33 Nason i e kalalik ke Aminadap,
Aminadap i e kalalik ke Admin,
Admin i e kalalik ke Arni,
Arni i e kalalik ke Esron,
Esron i e kalalik ke Peres,
Peres i e kalalik ke Juda,
34 Juda i e kalalik ke Jekop,
Jekop i e kalalik ke Aisak,
Aisak i e kalalik ke Abaram,
Abaram i e kalalik ke Tera,
Tera i e kalalik ke Naor,
35 Naor i e kalalik ke Seruk,
Seruk i e kalalik ke Reu,
Reu i e kalalik ke Pelek,
Pelek i e kalalik ke Eber,
Eber i e kalalik ke Sela,
36 Sela i e kalalik ke Kainan,
Kainan i e kalalik ke Arpakat,
Arpakat i e kalalik ke Sem,
Sem i e kalalik ke Noa,
Noa i e kalalik ke Lamek,
37 Lamek i e kalalik ke Metusela,
Metusela i e kalalik ke Enok,
Enok i e kalalik ke Jaret,
Jaret i e kalalik ke Mahalalel,
Mahalalel i e kalalik ke Kenan,
38 Kenan i e kalalik ke Enos,
Enos i e kalalik ke Set,
Set i e kalalik ke Adam,
Adam i e kalalik ke God.