17
Sinang Laulau
Metiu 18:6-7,21-22; Mak 9:42
Namih, Iesu ka fas berberat na fafausum kia aragii, “Foron tier ae in fatel fanu isi rik luut na sinang laulau in tapiek tom, isau le kiskam kanaka sing ier ae in fatapiek u. In rokap ulo le rin kabet ta ti tara fat na kongkongo ma rik fadom ta u na palgantes, tarama ka faluut tikas lon birbiron berberat igii na sinang laulau. Metiu 18:15Pesu, gamen tumarang!
“Male tuamlik i tel sinang laulau, ke on fakiing u. Male ka kiliis liu kia, ke on wol ufu sinangu. Male i tel sinang laulau ulo wo ifit e aunbiing na nenge biing ma fafit ka fis usuf o ma ka fot kiskam, ke on wol ufu sinangu.”
Sinangun Unune
Foron aposel ri ka tara sing Kumguui aragii, “Falaumet unune kimem!”
Ke Kumguui ka kiliis ri aragii, “Male unune kimi i fabiro arae fabiro kutun mastet, ke ifasi gamen fas au igii le, ‘Kang ini baulim ma ok ti na palgantes,’ ke in wong sing gam.
Sinangun Fafauun
“Male tikas lo gam imel e fafauun kia ae i purak, le i fofonoi la na foron sipsip, aunbiing i fis tina potormok, ke biil on fas u le, ‘La ugapiek, kep salam ma ok ien.’ Biil. On tara sing i aragii, ‘Fageges inen aiak! Kilkiliis ma ok sosok aiak ma iak ien, nami on ien ke ok yin.’ Arafah, on fot rokap sing fafauun kiam, wara le i tel fasuut sani o fas ta u le in tel u? Biil tom. 10 Pesu gam sabin, aunbiing gam ka tel fasuut ta sani ae God i fas ta gam isi tel u, ke gamen tara aragii, ‘Keme foron fafauun foes sau, keme tel fasuut foim sau kimem.’ ”
Iesu i Fafuu i Sangful e Kaltu ri Sem Lepra
11 Na ninla ke Iesu una Ierusalem, i la na fatpoton iwu e falifuh, Samaria ke Galili. 12 Aunbiing ka tapiek na nenge maleh, i sangful e kaltu ae ri sem lepra ri ka la usuf i. Ri soti tapak tom 13 ke ri ka perek aragii, “Iesu, Tara Kaltu, mais kemem!”
14  WokPris 14:1-32Aunbiing Iesu ka par ri, ka fas ri aragii, “Gam la ma gamek finngas gam sing foron pris.” Ma aunbiing ri ka la, sasem ka rop ma pununfo ri ka fuuh.
15 Neng lo ri, aunbiing i par u le sasem ka rop mang koseng u, ka fis ma ka kukuk ini ususefages usuf God. 16 Ka ilepul na keke Iesu ke ka fot rokap. Kaltu ae i nenge sikin Samaria.
17 Ke Iesu ka diik aragii, “I sangful e kaltu ae sasem i rop ta koseng ri, bikiih? Isiu fiawah? 18 Arafah, biil tikas lo ri i fis isi usefages God? Ses keskes sau igii i fis?” 19 Ke Iesu ka tara sing i aragii, “Aptih ma ok la. Unune kiam ka faliu ta wo.”
Taptapiek ken Matanfuntih ke God
Metiu 24:23-28; 24:37-41
20 Fale Farasi ri diik Iesu isi aunbiing sa matanfuntih ke God in tapiek, ke ka kiliis ri aragii, “Aunbiing matanfuntih ke God in tapiek, biil ifasi rin par u. 21 Ke biil ifasi rin tara le, ‘Igii,’ le, ‘Ae,’ wara le matanfuntih ke God ae mang ta naismi.”
22 Namih, ka tara sing berberat na fafausum kia aragii, “Nenge aunbiing in tapiek ae gamen lala ier isi par tikas e biing na foron biing ken Kalalik ken Kaltu, isau le biil gamen par u. 23 Fale fanu rin tara sing gam aragii, ‘Par u, Kalalik ken Kaltu ae,’ le ‘I igii.’ Gong gam la ke gong gam mi lo ri. 24 Wara le biing ken Kalalik ken Kaltu, in arae pil ae i maeng ma ka famalal tikii bat tina nenge baba una nenge baba. 25 Isau le famu, in kalsakai in fuun e fangungut ma fanu na ulul igii rin ire u.
26  Stat 6:5-8“Foron biing ken Kalalik ken Kaltu, in fasi sau arae na foron biing ke Noa. 27  Stat 7:6-24Fanu ri famam ien, yin ke ri ka fakekel papang na biing ae Noa ka kau na sip. Ke nor ka tapiek ma ka falaulau ri tikii.
28  Stat 18:20—19:25“Ifasi sabin arae na foron biing ke Lot. Fanu ri famam ien ke yin, ri famam fifiil ke ri ka sufii foron tier, ri ka famam soso ke ri ka famam tel fel. 29 Isau le na biing Lot ka la koseng Sodom, yiif turan salfa ka luut arae us tina kukulii ma ka falaulau ri tikii.
30 “In fasi sabin arae na aunbiing Kalalik ken Kaltu in tapiek. 31  Metiu 24:17,18; Mak 13:15,16Na biing ae, male tikas bae na olon fel kia, gong i pu isi kep fasuu ti minmara. Ke male tikas awii na mok, gong i fis una fel isi kep ti tier. 32  Stat 19:26Gam wolpes antu Lot! 33  Metiu 10:39; 16:25; Mak 8:35; Luk 9:24; Jon 12:25Se i totof isi gong kale liu kia, liu ae in mangmangal koseng u. Isau le se i sok ufu liu kia, ke in liu. 34 Ia fas gam, na wor ae, in u run borong turim na nenge luuf ke rik kep pes itikii, koseng neng. 35-36 Ke in u e fifin run gosgos wit turim la, rik kep pes itikii, koseng neng.”* Fale tom tasum na Buk na Gogoh ri wol le, fale orek biitom na rina igii, i aragii: In wu e kaltu run foim turim na mok, rin kep pes itikii, koseng neng.
37 Ke berberat na fafausum ri ka diik aragii, “Kumguui, fia in tapiek wa e foron tier igii?”
Ke Iesu ka kiliis ri aragii, “Falifu ae imel e minet lo, foron kauko rin la turim aiwa.”

17:3: Metiu 18:15

17:14: WokPris 14:1-32

17:26: Stat 6:5-8

17:27: Stat 7:6-24

17:28: Stat 18:20—19:25

17:31: Metiu 24:17,18; Mak 13:15,16

17:32: Stat 19:26

17:33: Metiu 10:39; 16:25; Mak 8:35; Luk 9:24; Jon 12:25

*17:35-36: Fale tom tasum na Buk na Gogoh ri wol le, fale orek biitom na rina igii, i aragii: In wu e kaltu run foim turim na mok, rin kep pes itikii, koseng neng.