5
Natun Sipsip ke Buk ae ri Finris u la
1 Esekiel 2:9,10; Aisaia 29:11Na mia ier ae i kiis na nian kiiskiis ken king, ia ka par nenge buk ae ri finris u la. Imel e sisiit na iun baba turim ke ri ka bulut papte u ini ifit e bulut ae imel e fakileng* Aunbiing ri luun matngan fakileng arae, biil ti kaltu foes ifasi in sapeng na buk ae lo. 2 Ke ia ka par nenge rakrakai na angelo i perek aragii, “Se i tortores isi ifasi ik tel ufu ifit e bulut ma ik sapeng na buk igii?” 3 Isau le biil tikas tina kukulii, le na piklinbat, le na piklin nanal ifasi in sapeng na buk ma ik par sisiit ae na palga. 4 Ia ka lala teng, wara le biil tikas i tortores ae ifasi in sapeng na buk ma ik par sisiit ae na palga. 5 Stat 49:9; Aisaia 11:1,10Ke neng lon foron famfamu ae, ka tara sing iau aragii, “Gong o teng. Par u, Laion tina mat ke Juda, i e bawu king Dewit,† Fan Iudaia ri unune le Mesaia in la tina mat ke king Dewit, pesu ri foteng u le, “bawu king Dewit” ka fapu ta rakrakai ken foron tuui kia. I sau ifasi in papak ufu ifit e bulut ma ik sapeng na buk ae.”
6 Aisaia 53:7; Sekaraia 4:10Namih, ia ka par nenge Natun Sipsip ae i par aragii le ri siimete ta u. I soti ta na fatpoton nian kiiskiis ken king, ma kawil u, ifet e fakfakiis ae i liu, turan iwu e sangful ini fet e famfamu ae. Natun Sipsip ae ifit e kom lo, ke ifit e kolson mata ae ri ifit e Tanwa God ae i wuun ufu ta ri una foron falifu tikii na piklinbat. 7 Natun Sipsip ae ka tapiek ma kep buk ae tina mia ier ae i kiis ta na nian kiiskiis ken king. 8 BukSong 141:2Aunbiing ka kep ta buk ae, ifet e fakfakiis ae i liu turan iwu e sangful ini fet e famfamu ae, ri ka ilepul na mata Natun Sipsip ae. Temtem tikii lo ri, i pose na gita turan dis ae ri tel u ini goul. Foron dis ae ifuun ini nenge tier ae bau lo i furung rokap, i e foron sising ken fanu kalkaluu ke God. 9 BukSong 33:3; 98:1; Aisaia 42:10Ke ri ka sek nenge seksek fuuh aragii:
“O tortores tom isi on kep buk ae
ma ok papak ufu foron bulut ae lo,
wara le ri siimete ta wo,
ke o ka fiil fafis ta fanu usuf God ini daum,
fanu tina foron mat tikii,
tina marmarsan orek,
tina foron falifu tikii
ke tina foron funmat tikii.
10 KisimBek 19:6; Parpar 1:6O ka luun ta ri isi rin nagogon turam na Matanfuntih kiam,
ke arae foron pris una foim sing God kirer
ma rin nagogon aga na piklinbat.”
11 Daniel 7:10Ia ka par sabin ke ia ka ongen kinen ifuun e angelo, ifuun kanaka e arip lo ri ma biil ifasi tikas in wes ri. Ri ti kawil nian kiiskiis ken king turan ifet e fakfakiis ae i liu ke foron famfamu 12 ke ri ka lala seksek aragii:
“I tortores kanaka tom le Natun Sipsip ae ri siimete ta u,
in kep rakrakai una nagogon, minsik, polo na wol, rakrakai,
bulat, memeh ke ususefages.”
13 Ke ia ka ongen kinen foron fakfakiis tikii buuii na kukulii, na piklinbat, na piklin nanal ke na palgantes, ri tikii ri ka seksek aragii:
“Ususefages, bulat, memeh ke rakrakai,
ae in kiis fitliu ma biil ti farfarop lo,
usuf ier ae i kiis na nian kiiskiis ken king
ke usuf Natun Sipsip.”
14 Ifet e fakfakiis ae ri liu, ri ka tarah, “Amen,” ke foron famfamu ae ri ka ilepul ma ri ka lotu unaisa.
5:1: Esekiel 2:9,10; Aisaia 29:11
*5:1: Aunbiing ri luun matngan fakileng arae, biil ti kaltu foes ifasi in sapeng na buk ae
5:5: Stat 49:9; Aisaia 11:1,10
†5:5: Fan Iudaia ri unune le Mesaia in la tina mat ke king Dewit, pesu ri foteng u le, “bawu king Dewit”
5:6: Aisaia 53:7; Sekaraia 4:10
5:8: BukSong 141:2
5:9: BukSong 33:3; 98:1; Aisaia 42:10
5:10: KisimBek 19:6; Parpar 1:6
5:11: Daniel 7:10