7
Ri Luun Fakileng lon 144,000 e Fan Israel
1 Jeremia 49:36; Daniel 7:2; Sekaraia 6:5Namih, ia ka par ifet e angelo ri ka soti na ifet e matan kif na piklinbat. Ri ka tikale ifet e matan kif isi biil rin kufkufe na nanal, na palgantes ke na olon foron au. 2 Namih, ia ka par nenge angelo sabin ka tapiek tina falifu ae pisiih i susupiek la wah, i pose na nenge fakileng ke God ae i liu. Ka tautau usuf ifet e angelo ae ri ta ta rakrakai usuf ri isi rin falaulau nanal turan palgantes. 3 Esekiel 9:4,6Ka tarah, “Gong gam falaulau nanal, palgantes le foron au, papang na biing keren luun fakileng na posong na matan foron tom foim ke God kirer.” 4 Ke ia ka ongen weswes lon fanu ae ka mel ta e fakileng ke God lo ri. Wewes lo ri ifasi aragii, nenge mar ini fet e sangful ini fet e arip e fanu tina foron mat tikii na Israel.
5 Nenge sangful ini u e arip tina mat ke Juda,
nenge sangful ini u e arip tina mat ke Ruben,
nenge sangful ini u e arip tina mat ke Gat,
6 nenge sangful ini u e arip tina mat ke Aser,
nenge sangful ini u e arip tina mat ke Naptali,
nenge sangful ini u e arip tina mat ke Manase,
7 nenge sangful ini u e arip tina mat ke Simion,
nenge sangful ini u e arip tina mat ke Liwai,
nenge sangful ini u e arip tina mat ke Isakar,
8 nenge sangful ini u e arip tina mat ke Sebulun,
nenge sangful ini u e arip tina mat ke Josep,
ke nenge sangful ini u e arip tina mat ke Beniamin.
Tara Gur na Fanu ri Lotu unaisa God
9 Nami na foron tier igii, ia ka par ke ia ka par nenge tara gur na fanu awii na famu lo iau, ae biil ifasi tikas in wes ri. Ri tina foron funmat tikii, tina foron mat tikii, tina foron falifu tikii ke tina marmarsan orek tikii. Ri kilkiliis ini foron dolon kaen pos ma ri ka pose na foron aun bebeh 10 ke ri ka perek aragii,
“Fafaliu i la sing God kirer,
ae i kiis na nian kiiskiis ken king,
ke sing Natun Sipsip.”
11 Foron angelo tikii ae ri soti ta kawil nian kiiskiis ken king ke kawil foron famfamu ae turan ifet e fakfakiis ae ri liu, ri ka luut uf ini posong na matri una pikli ma ri ka lotu unaisa God 12 ke ri ka tarah,
“Amen!
Ususefages, memeh,
polo na wol, fotrokap,
bulat, rakrakai
ke rakrakai una nagogon,
usuf God kirer,
fitliu ma biil ti farfarop lo!
Amen!”
13 Ke neng lon foron famfamu ae ka diik iau aragii, “Fanu ae ri kilkiliis ini foron dolon kaen pos, ri fanseh ma ri tingah?”
14 Daniel 12:1; Metiu 24:21; Mak 13:19Ia ka kiliis u aragii, “Ier, wo tom o usum.”
Ke ka tara sing iau aragii, “Fanu igii, ri e fanu ae ri suu ta tina tara tatawin*Tatawin ae, in laumet kanaka tom na foron tatawin tikii na piklinbat. Par Dan 12:1 ke Metiu 24:21 ke ri ka gorse fapos ta foron dolon kaen kiri ini dawu Natun Sipsip. 15 I e wara,
‘ri ka soti na famu na nian kiiskiis ke God
ma ri foim sing i na Felun Tunmapek kia
na foron siat ke na foron wor.
Ma ier ae i kiis na nian kiiskiis ken king
in famalmaluu ri ini palpalbuang kia.
16 Aisaia 49:10Biil mang rin fitol sabin,
ke biil mang rin metdan sabin.
Ke biil mang pisiih, le ti tier ae i tuntun
in yeng pununfo ri sabin.
17 BukSong 23:1,2; Aisaia 49:10; Esekiel 34:23; Aisaia 25:8Wara le Natun Sipsip ae i kiis na fatpoton nian kiiskiis ken king
in fofonoi lo ri, arae tom fofonoi na sipsip.
In lame ri una foron matan dan na liu.
Ke God in salis ufu danun matri tikii tina matri.’ ”
7:1: Jeremia 49:36; Daniel 7:2; Sekaraia 6:5
7:3: Esekiel 9:4,6
7:14: Daniel 12:1; Metiu 24:21; Mak 13:19
*7:14: Tatawin ae, in laumet kanaka tom na foron tatawin tikii na piklinbat. Par Dan 12:1 ke Metiu 24:21
7:16: Aisaia 49:10
7:17: BukSong 23:1,2; Aisaia 49:10; Esekiel 34:23; Aisaia 25:8