1 Innee Koorinti maqannaasa pasa akara rumasee oosana oosana ainaina qiniara iree mariafanoo. Maqee innee akaraki iree maria ufana qinee inniqa qimannimianaura.

Inneeqa faiqí anaasee nimundaranara qiafaqa maaqi qimannimianaura. Faiqí nariara adeedaana maridanoo andeeqarafa mariannoo. 2 Kafaa mina atiki maaqi qianaura. Faiqí anaasee narí ummuari narí ummuarirafa moomoo marinara aiqama fasiqauqa nári ninaaqa maraaqa, aiqama aanaaseeuqa nári nifaaqmaaka marasee andeeqasee mariaqa. 3 Afaaqi fannoo narí anaaqa aidimarina amiani miqikai inoo anaasee fannoo narí afaaqi aidimarina amiani. Aiqamaqara nariara nariara nidimari ainainna narí ami narí ami iaqa. 4 Anaasee fannoo sia narí afaaqa rakisirafa maridanoo narí afaaqi fannoo mina afaaqasaa rakisidanoo, miqi kai masee faiqí fannoo sia narí afaaqara rakisirafa maridanoo narí anaaqa fannoo mina afaaqasaa rakisidanoo minara qinee qidaqa nariara nariara nidimari ainainna narami narami iaqa. 5 Minara irisee sia innee nariara nariara qaoo qiaqa. Anutunara kisaaqasaa amiqimasee innaaru qiannee qimasee faiqí faqa anaasee faqa moodaaqooqara ufa qimaseenana naquma amaanee marasee akeeka masee aura masee maraanauree qimaseenana aadu aadu mambinana Anutunara kisaaqasaa innaaru qiaqa. Innaaru qimaseenana kafaa moodaanaki kiaqa kisaaqasaa aadu aadu ina mariannanara Sadannafa nimanamandee qafaina sia afeeka marina eedoo qifoora minara kafaa moodaanaki kiaqa.

6 Faiqí nári ninaaqa mararanara faqa anaasee nári nifaaqmaaka mararanara faqa qunnana sia aranaiqi afeekaikamandee qiqa kaqi qimannimidaqa marararee qimaseenana doo maraa. 7 Qiqa irirafa maaqimminoo maridanoo. Aiqamausa qini daanna ree adeedaana mariaqaana. Anutufa narí irirananai naadu naadu marirana nimifaqa maridaqa faiqí moo adeedaana marinanee, faiqí moo anaasee faqaafa marinanee Anutufa kai nimidanoo.

8 Doo maqee maanaaqa kumaaraa uruna mariasa faqa faiqí anaasee kuqufuafaqa adeedaana mariasa faqa inni qimannimidaqa innee qini daanna ree adeedaana mariqa amiqirafa marifaranoo. 9 Innee sia adeedaana amanaikiqa doo amundaaqa. Anaaseera faiqiara ani aundurai idara foora atakuqinana doo sia amanaikinoo amundarafa idara foora atakuqirana uriqararafa maridanoo.

10 Qinee nimundarausara naamuaqira ufa qimannimianaura sia qeeqaindifau karaambaiqaindi qimannimianaura. Amundara anaasee moo fannoo sia amana narí afaaqi minnisarafa maridanoo. 11 Minniseenoo adeedaana kai mariani. Adeedaana mari naisia quandaki narí afaaqi kai kaifaa maraannoo. Faiqí faqa miqikai inoo sia narí anaaqa minnisaani.

12 Doo adeedaana ufa qimaseeqa doo akaqausa qimannimianaura, sia karaambaiqa ufafau qimannimianaura qeeqa ufa qimannimianaura. Faiqí moo fannoo Yisuna ufa irimarifa mina anaaqa sia Yisuna ufa irimarifa maridanoo mi anaaseefa narí afaaqi faqa amiqimasee marinanoo sia mina afaaqi fannoo aqiqaannoo mina faqa mariannoo. 13 Anaasee moo fannoo Yisuna ufa irimarinafa marinanoo mina afaaqi sia Yisuna ufa irinafa maridanoo kaqi narí anaaqa faqa amiqimasee maridanoo mi anaaseefa sia narí afaaqi aqiqaannoo. 14 Yisuna ufa irimari anaaseefa narí afaaqindiri moodaa fara maqi mafuanara mi anaaseefa narí afaaqi mareeqeenoo Anutuna aqoondikiranaki quqaidanoo miqidanoo. Kafaa Yisuna ufa irimari fasiqafa narí aanaaqandiri moodaa fara foora mafuanara narí anaaqa sia amaana ufa irimarina maramareenoo Anutuna aqoondikiranaki quqaidanoo miqidanoo. Sia miqinoo marinanoofau miqanda faiqi namu aamina maqannaara foora mariaqini, maqee Anutufa misa faqa aqoondi kiannoo.

15 Faiqí fee anaasee fee sia Yisuna ufa irinafa narí kai minnisee finafa amana saina fuani, sanda moo fannoo sia inniara sia rakisisimma umaraaqee qidanoo. Anutufa inniara sia kaukaataqiranaki mariaqee qidanoo asooaranaki mariaqeera naarameeqee narí ququsaki quqaqaifaqa minara qimannimidaqa, saifanoo fuani marinoo mariani. 16 Yisuna ufa irimari anaaseefa ani afaaqi ani faqa maridanoo mifa faqa innaaruna asumu marirana paquriannoo fee sia fee paquriannoo. Kafaa Yisuna ufa irimari fasiqafa ani anaaqa ani faqa maridanoo mifa faqa innaaruna asumu marirana paquriannoo fee sia fee paquriannoo.

17 Qinee Pauroosa aiqama maqusa maqusa nidaqa maa ufana Yisuna ufara suqimariasa qimannimidaqa. Innee aiqamausa sia moo saika auqaaqa Karaambaiqa inniara mariaqee inna saikana kai maraaqa, Anutufa inni naaroofaqa Yisuna ufa irirara anukamuqoo maroo saikana kai maraaqa sia moo kiaqa mi saikanaki kai mariaqa, sia maqee moo kiaqa. 18 Yuda maqannaa fasiqa fannoo Anutuna ufa irisee Yisufinnai anirainafa sia mini narí Yuda maqannaasa fainanduqirana sia asauruani saina kaqi mariani. Anaamuru fasiqa moo fannoo Yuda maqannaasa fainanduqirana siaifa Anutuna ufa irisee aninafa sia quandaki fainanduquani saina kaqi mariani. 19 Fainanduqira fee sia fainanduqira fee mina fifau ainaina mariannoo. Anutuna naamuaqira ufamau eedoo qimasee finafa mifa anoona maridanoo.

20 Aiqama fasiqa Anutufa naaroofaqa eedoo qu kamuqoo maru marirafa mifa doo sai kaqi minaki mariani.

(Pauroona aukuana akaqausa faaqu fasiqausa nári ainainirana sia amanaikiqa ainaina faqaana karabusara foora ainaina maisee mariqau. Sia feefauru maree mariqau. Kadaapirumasee narana faqa maaqa faqa kai maree mariqau. Misa nuqu ainainira fasiqee qimariqau. Mi aukuanna ainaina faqaasa akaqausa faqa faaqu fasiqauqa faqa Yisuna ufa iriqau. Pauroofa minara irisee maa ufana qimanniminau.)

21 Anutufa ani aaroo kamuqoo anee moona ainainira fasiqa marunafa saina kaqi maria, sia quqasee moosaa fua kasooqaqee idukirafa kambiqainana miqoo kai idukusainana fua. 22 Faiqí moo fannoo ainainimarinafa marinanoo karaambaiqa aarainanoo mi ainainiranaki kaqi maria Karaambaiqa idukira fasiqara foora mariananoo. Miqikai masee asauku mundirafa idukira fasiqa aaraifanoo kaqi narí ainainiranaki mariani asauku mundirana ainainira fasiqara foora mina ainainiranaki mariananoo. 23 Innee Yisuna ufa irimariasa Anutufa firaa feefauru aqusee inni maroonara irisee sia moo fasiqa ainainiranakiara foora keeqafinaqa mandoosana ufa ameemaanai mariaqa kaqi idukiqa mariara maqi idaqa Anutuna ufamau fuaqanani.

24 Oo qini qikaqaafasaa innee aiqama Yisuna ufa irirara anukamuqoo marirana minaki kai maridaqa Anutuna aqoondikiranaki maqee maqee mariaqa.

25 Doo maqee anaasee siaisa faqa faiqí siaisa faqa qimamianaura. Qinee Karaambaiqa amuqusirana maree marunausa marunnanara qini ufa irisee minasaa munduaqa, sia qinee karaambaiqa ufara inni qimannimidaqa qeeqa ufa qimannimidaqa.

26 Innee Koorinti maqannaa Yisuna ufa irimariasa innee maqee aukuana Yisuna ufasaara firaa mandainaina nariranaki mariafaqa minara irisee qimannimidaqa, aiqama fasiqa maqee maria mariranaki kai mariaqa. 27 Ani anaaqa maridanoo fee sia mina minnisaa, anee adeedaana maridanee sia aanaaseera randasee maraa. 28 Anee anaasee maraseenana sia aaqaananoo. Maanaaqa moo fannoo kumaaraa mareenoo sia aaqaannoo. Maqee maria deedeepira aukuana Yisuna ufasaara faiqí anaasee faqaasa firaa ummaaraki mariafanoo minara irisee innee maqee Koorinti maqusai mari ummaarana sia maraaqee kaqi kasooiqa mariaqee qidaqa.

29 Oo qini qikaqaafasaa qinee ufa qunnana anoona maaqimminoo maridanoo. Innee Koorinti maqusai ummaaraki marianara moomoo faasaana sia kaqi marifaranoo sia moomoo kari Anutuna ainainiranaki marifaranoo. Innee minara irisee anaasee faqaasa adeedaanara foora mariaqa kaqi kai ainainamamaree fuaqa. 30 Innee iki raqee mariasa sia iki raqeera maqi iaqa kaqi kai Anutuna ainainirana ainainiqa fuaqa. Innee naanaindara qimariasa sia naanaindara qidara maqi mariaqa kaqi kai Anutuna ainainirana ainainiqa fuaqa. Innee ainaina feefauri mariasa faqa sia anindiara foora mariani. 31 Innee maqasaa ainaina feefauru nimisaida ainaina maree mariasa sia kaaqa minara afeekaikiaqa, mana mana imariasara foora mariaqa. Maa maqa maaqafa maaqoo marinafa sia kisaaqasaa mariannoo. Qusasaa taikaannoo.

32 Innee ummaara siaisa mariaqeera qimannimidaqa. Anaasee siaifa karaambaiqa ainainiranara kai irimaree fidanoo karaambaiqa eedoo qiranara kai irinoo fidanoo. 33-34 Anaasee faqaafa maa maqanasaaqaraa ainainara kai irimaree fidanoo maqee maqee narí aanaaqara aidimari iriramau fidanoo, qaara irirana faqaafa maqasaaqaraa irirana faqa Karaambaiqa irirana faqa minaki maridanoo. Adeedaana aanaaseeuqa faqa maanaaqauqa faqa karaambaiqa saikara kai irimaree fidaqa. Misa nári naundura faqa nifaaqara faqa karaambaiqaindi fee kai qimasee karaambaiqa saikara kai iridaqa. Faiqifaqaa anaasee fannoo narí afaaqi aidimari iriramau fidanoo maqasaa ainainara kai iridanoo.

35 Sia qinee sandannaifau inni rumbaidau. Maa manda deedeepa aukuannara iridaqa. Inni dadaaqiraree qidaqa maa ufana qidaqa. Qinee inniara andeeqara aatata ufamau fuaqeera kai qidaqa naakapaidaqa. Innee sia kaqikaana raina quqaaqeera muduka uqanna karaambaiqa saikaki mariaqeera qimannimidaqa. 36 Kumaaraa maanaaqa utaaqaraqanda nimundaranara qaoo qimasee mi kumaaraafa kafaa quandakinoo aanaaseera aidirafa afeekaikifanoo mi kumaaraafa doo maraanauree qimaseenoo doo amana maraannoo sia aaqaidanoofau miqidanoo. 37 Faiqí moo fannoo Yisuna ufasaara nariranara irisee miqinafa sia moo fannoo qaoo qinoo kai narí uqanna sia qini utaaqa maqimaqarana maraanauree qinafa mina irirafa kuqaa afeekaikinafa narí aundurakiqari amiqimmandee qaoo qinafa sia mi manaaqana maraannoo andeeqaidanoo miqiannoo. 38 Kumaaraa narí utaaqamamaqara manaaqana marainafa andeeqaidanoo miqiannoo. Moo kumaaraa fannoo mina narí utaaqamamaqara manaaqana sia marararee qifa mifa firaaqoomma uriqareenoo.

39 Anaaseeuqa nári nifaaqmaaka faqa kaqi marianara sia oonuree aniree iqanuaqa. Nári nifaaqmaaka kuqufuafaqa miqoo nári nidimari fasiqana amana mareefara. Moodaa ainaina kai mariannoo, Yisuna ufa irimarinna anaaseefa Yisuna ufa irinnana kai maraannoo. 40 Mi anaaseefa kaqi adeedaana maridanoo aufadaranaki mariannoo. Qinee mi ufana qunnana qeeqaindi qeeqa irirana maaqi qidaqa Anutuna maraquna fannoo dadaaqidanoo fee qidaqa.