1 Faiqí aanaaseera nimuqusirafa uriqararafa maridanoo fee qidaqa minara inni Koorinti maqannaasa qimannimidaqa, Innee minara irisee faiqí aanaaseera nimuqusirafa maraanauree qimaseeqa mina mararara kai kadaapiruaqa. Anutuna maraquna nimi mari afeeka oosana oosana faqa akoofasaikirana oosana oosana faqa, minauqa faqa innee inneeqa irirana ummarararee qimasee afeekaikiaqa. Miqidaqa faiqí anaasee Anutuna ufa qimannimira afeeka minara uriqarara fee qimasee firaaqoo randasee maraaqa. 2 Faiqí moo fannoo narí sia irinna aanaamurusa ufakiqari qimannimimarifa sia faiqifau qimannimidanoofau Anutuna faqa ufa qidanoo. Faiqí sia mina ufa iridaqa moosa ufa marifaqa. Mifa Anutuna maraquna afeekannai kukeeqara anoona ufa qidanoo. 3 Faiqí moo fannoo Anutuna maraquna fannoo dadaaqifanoo Anutuna ufa narí ufakiqari qimannimifanoo nimuqusaki mandaikisa mina ufa iriafanoo dadaaqirana faqa pooduqarana faqa amiqi amiqirana faqa maraidaqa. 4 Moosa ufakiqari narí sia iri maria ufanakiqari qimannimimari fasiqafa narí kai narí dadaaqidanoo, Anutuna ufa nári ufakiqari qimannimimarifa aiqama Yisuna ufara suqimariasa dadaaqidanoo uqeeraidanoo.

5 Qinee inniara aanaamuru ufakiqari sia irianakiqari aiqamausa minakiqari ufa qiaqee qidaqa. Mi oosanna uriqararafa maaqimminoo maridanoo Anutuna ufa nári ufakiqari qimannimirafa Anutuna maraquna nimimarifa qinee inniara minara firaaqoo qiaqee qidaqa ridaqa. Anutuna ufa nári ufakiqari qimannimimarifa uriqararafa maridanoo, aanaamuru ufakiqari sia iria ufanakiqari qimarifa ureeqarafa maridanoo, mi moo ufanakiqari qimarinnana faiqí moo fannoo aniree nári ufakiqari mi ufana qimanniminanoo andeeqasee irifanoo amana mariannoo miqimasee Yisuna ufara suqimariasa dadaaqirana mareefaranoo.

6 Oo qini qikaqaafasaa kasooqaqee innee iannai oonureeqa aanaamuru ufakiqari qimannimisee naqimandee dadaaqianauree. Sia dadaaqirafa mariannoo. Anutuna maraquna fannoo aamuaqira ufa qimannimira fee, qimannimiranee, irira ufa fee Anutuna maraquna dadaaqira ufa qimannira fee naamuaqira ufa fee nári ufakiqari qimannimianaqa aiqamausa dadaaqirana mareefaranoo. Moosa ufakiqari sia dadaaqirana mareefaranoo.

7 Fifau sia kasi mari ainainna ufireena faqa kookaanauru faqa piripunna faqa marifaqa sia minauqakiqari amiqimmandee fuaqaidaqa minakiqari idi sia amiqimmandee fuaqaifanoo idirainna fasiqa anaaseesa naqi fee mandee irifaree, sia irifara. 8 Rakira karaambaiqa fannoo sia amiqimandee kaanina uqeeraifaqa naqimandee rakirana aiqamausa uqeereefaree, sia uqeeree faranoo. 9 Innee miqikai iqa maraquna fannoo naakinaqa aanaamuru ufakiqari sia irianakiqari ufa qifaqa naqimasee ani ufa oosana irifaree sia uqanna irifaranoo. Ani ufa fannoo fifau ufaira foora uqidanoo. 10 Maa maqa maaqanakina moomoosa ufa maridanoo aiqamausakina misa ufa anoona maridanoo. 11 Anaamuru moo fannoo findifi nári ufakiqari qini qimaqimifaqa qinee siamma irianaura. Qinee mi fasiqanara aanaamuru fee qiana mifa qiniara aanaamuru fee qiannoo. 12 Innee Koorinti maqannaasa kaaqa Anutuna maraquna fannoo nimimari afeekanara kai firaaqoo rimariasa mariafanoo. Mi afeeka iriranakiqari maanara kai afeekaikiaqa. Yisuna ufara suqimariasa misara dadaaqiqa firaaqoo uqeeree maria ainainnara kai nidinaqa uqeeraaqeera qidaqa.

13 Faiqí moo fannoo maraqunannai aanaamuru ufakiqari qimannimidanoo narí faqa faiqí anaasee faqa sia irifanoo kafaa Anutunara innaaru qinanoo moo afeeka aminanoo sia irimaria ufanakiqari qimarina anoona irisee quandasee kooroommasee kafaa nári ufakiqari qimanniminaqa doo iriaqeera. 14 Maraquna fannoo dadaaqinaqa sia iria ufanakiqari innaaru qiananoo qini qimana fannoo kai kuqaa innaaru qiannoo qiqa irirafa sia innaaru qiannoo. 15 Qinee minara naqi fee qianauree qinee maaqimmianaura, qinee qeeqa qimana faqa qeeqa iriranannai faqa innaaru qianaura. Qinee Anutunara idi raidaqa qeeqa qimanannai faqa qeeqa iriranannai faqa Anutunara idi raanaura. 16 Innee Yisuna ufara suqimariasa suqimarifanoo moo fannoo Anutuna maraquna fannoo aakinanoo narí amana fannoo kai aanaamuru ufakiqari innaaru qinanoo moo kaqiqee fasiqa fannoo ani marida iridanoo naqimasee mifa iriseenoo Anutunara mifa faqa eedoo qiannoo fee. Mifa sia uqanna amana ani ufa oosanara iriannoo. 17 Ani Anutunara dufi dufi qira ufa amiqimmasee qinanoo moo fasiqa fannoo sia amiqimasee irinanoo ani ufa fannoo sia mina dadaaqiannoo.

18 Qinee Pauroosa maanara Anutunara dufi dufi qidaqa, qinee firaaqoo moomoo kari inni fiqaramasee aanaamuru ufakiqari daadumai maridaqa innaaru qidaqa. 19 Yisuna ufara suqimariasaki suqidaqa qinee sia miqidaqa. Misaki maridaqa nári ufakiqari misa naamuaqianee qidaqa moodaannai qisauku ufa kai amana kai qusa qimannimiranara dididanoo. Moosa ufakiqari misa sia iri maria ufanakiqari kisaaqasaa qimannimianaqa sia irifoora qikooqaidanoo.

20 Oo qini qikaqaafasaa sia inni irirafa faiqi aanaaqi iriranara foora mariani, faiqí firaasa iriranara foora mariani. Oosana oosana mandainainara minara kai inni irirafa faiqi aanaaqindiara foora nisakadiki qikairi siaisa mariaqa. 21 Tamummaqara fasiqauqa minara maaqi qimasee akara riqau.

Tamummaqara fasiqa ufa miqimminoo marifaqa qinee Pauroosa minara maaqi qidaqa.

22 Qinee maraqunannai aanaamuru ufa qiranara maaqi qidaqa Yisunara sia irimariasa irisee minara kuqaa fee qiaqee qimasee náriara Anutuna narira ufa ameemaanai marianara iriaqeera mi ufafa maridanoo. Yisunara doo irimariasara sia misarau maridanoo, doo misa iridaqa. Maraqunannai Anutuna ufa nári ufakiqari qimannimirafa Yisuna ufa irimariasa iriaqee ainainna maridanoo, mina ufa sia irimarinausa sia mina irifaranoo mina anoonara randee faranoo.

23 Yisuna ufara suqimariasa aiqama suqusee maridaqa aiqamausa moodaa kari aanaamuru ufakiqari dapi dapi ufa qimarifanoo kaiqee fasiqa fee aamina fasiqa fee minaki ani keeqafiqa inniara furufari mariasee qimasee sandaannoo. 24 Aiqamausa suqidaqa Anutuna ufa nári ufakiqari narí qimami narí qimami qimarifanoo kaqiqee fasiqa fee aamina fasiqa fee inniki keeqafinoo irinoo narí mandoosanara aundurai oonumafi iriannoo. Narí irinnufafa narí raquru amiannoo. 25 Narí mandirirafa aundurai kukeeqanoo marinafa aiqama kooroomambinanoo mifa anuka kummarammafinoo Anutuna amooqidanoo maaqi qiannoo kuqaa Anutufa maaqoo inni faqa maridanoo fee qiannoo.

26 Oo qini qikaqaafasaauqa, maa qinee qunna ufana anoona koorooianaura. Innee innaaru qiraree qimasee suqidaqa moo fannoo idi moo oosana araannoo moo fannoo naamuaqira ufa oosana araannoo, moo fannoo Anutunaindaraa ufa irisee qimannimiannoo moo fannoo aanaamuru ufakiqari qimannimisainanoo moo fasiqa maraquna fannoo dadaaqinanoo mi ufana anoona kooroomannimiannoo. Aiqama ainaina Yisuna ufara suqimariasa dadaaqirafa kai mariani. 27 Misa aanaamuru ufakiqari qimannimiani qimasee qaaraqanda kai fee qaaramoo kai findifinana moodaa moodaa fannoo kai qimannimiaqa, miqooqari moo fannoo misa ufa anoona nári ufakiqari kooroommasee qimannimiani. 28 Yisuna ufara suqiranaki koorooimarinna fasiqafa sia marinana sia aanaamuru ufakiqari qimannimiani. Narí kai narí aundurakiqari Anutuna faqa ufa qinafa amana narí kai qiani. 29 Qaaraqanda fee qaaramoo fee Anutufa ufa niminnana qifaqa aiqamausa suqimariasa irisee misa ufa raina rainammasee iriaqa. 30 Inni ufa suqiranaki faiqí moo fannoo ooqu marinafa Anutunaindaraa ufa marasainanoo ufa qimanniminna fasiqafa ooqu marinanoo mifa findifi qimannimiannoo.

31 Innee aiqama amana Anutuna ufa qimannimiaqa moodaa kai moodaa kai findifidaqa amana qimannimifaranoo. Miqimandaifaqa aiqamausa misa irirana iriseeqa dadaaqirana mareefaranoo.

32 Maraquna fannoo inni naakifaqa Anutuna ufa qimannimirana dadaaqirana nimifaqa sia dapi dapi furufariaqa innee inneeqa kai inneeqa nifauru naundurasaa rakisimariasa marianara amiqimasee rakisiaqa. 33 Anutufa sia maasara dapi dapi furufariranaki mariaqeera daarama quqeenoo asooaranaki andeeqasee mariaqeera daarama narí ufa iriranaki quqeenoo. Anutuna ufara suqimariasa maaqanna maaqana moodaa oosana qimannimiafanaqa maree mariafaqa inni faqa qimannimidaqa. 34 Yisuna ufara suqiranaki anaasee sia findifi ufa qimannimiaqa, kaqi ooqufaaqee mariaqa. Yuda maqannaasa sandufamau kai fiqa faiqí ufa ameemaanai kai mariaqa. 35 Anaasee moo ainainara irararee qimaseenoo sia paamma qimasee iraannoo, kasooqaqeenoo maaqaki oonureenoo narí afaaqisaa iraannoo. Yisuna ufara suqiranaki anaasee findifi ufa qinafa asaurirafa mariannoo.

(Koorinti maqannaasa akaqausa Pauroona ufara sia anoona ufa fee qimasee nári iriranamau fimarufanoo Pauroofa minara maaqi qimasee qimanniminoo qinau.)

36 Oo Koorinti maqannaasa Anutuna ufa fannoo innikiqari fee indaaru kambiqeenoo fee innee inneeqara maasa kai mareeunoo fee qidee. 37-38 Innikqari moo fasiqa fannoo nariara Anutuna tamummaqara fasiqausee qimaseenoo fee maraquna qimimari afeekana faqaasee qimaseenoo fee mi fasiqafa qinee Pauroosa akara rumannimunnufanara kuqaa Anutuna naamuaqira ufa fee qinafa anoona mariannoo. Qini maa ufanara sia iridee qinafa innee minara unna qira fasiqa maridanoo fee qimasee mina ufa faqa sia iriaqa.

39 Oo qini qikaqaafasaa Koorinti maqannaasa inneeqa Anutuna ufa faiqí anaasee qimannimiranara maraanauree qimasee afeekaikida mina mararara kai kadaapiruaqa, akaqausa sia irimaria ufanakiqari maraqunannai qimannimifaqa sia qaoo qiaqa. 40 Innee ufa suqiranaki iriranamau kai andeeqasee maqee maqee fuaqa.