(Ooqai Pauroofa maru aukuana ainaina faqaasa faqa pisinisa faqaasa faqa munnimmara ainainimariasa faqa kudiuqa faqa mariqau. Ainaina faqaasa faqa pisinisa faqaasa faqa nári ainainirana moomoo marifaqa sia amanaikifaqa akaqa fasiqauqa nifiqee nári ainainiranaki quqasee mina akiaqara munnimma nimimariqau. Moo oosana faqa misaki marinau. Kudi fasiqauqa akaqausa kaaqa kudiki mariasa naararee marifaqa marianara ainaina faqaasiannai oonuree iraifanoo ainaina faqaafa ainaina siaina karabusara foora ira saikiranaki quqaseenoo sia feefauru aminau. Kaqi narana faqa faiqarana faqa mina ainainirana akiaqara amiseenoo feefauru uqanna sia aminau. Misa minara karabusa saika imarusee qimariqau. Mi karabusa saikanaki maru fasiqana ati mina ainaina kafaa mi fasiqana idukiraree qimaseenoo munnimma firaatia aqusee idukumaree fimariqau.)

1 Mi ufanasaa ootupammasee maa ufana ainainafaqaafa faqa narí amaakuara faqa qimannimianaura. Faiqí moo fannoo kuqufinanoo mina faiqi mina aiqama ainaina maraanoo. Mina akoofa kaqi maru kamuqoo mina faiqi sia innooqanoo marufanoo kaqi narí akoona ainainira faiqiara foora maridanoo. Narí akoofa narí amaakuara narí ainainira faiqiara foora marifanoo saika ummaqirana dadaaqi marinara narana aandau amidanoo. Narí akoona aiqama ainaina maraaninafa maridanoo kaqi fifau ainainira faiqiara foora narí akoona faqa maridanoo. 2 Mina faiqi kumaaraa marifaqa mina akoona ainainira faiqiuqa mi faiqina faqa mina akoona ainaina faqa rakisiqa fifi ifaqa mina akoofa doo innooqee maqi qimasaifanoo mi faiqifa ainainasaa rakisidanoo. 3-5 Miqi kai iqa maasa sia innooqeera fooqaa ira kamuqoo maasa maa maqa maaqanasaaqaraa irira sandufa ameemaanai mariqiafana. Anutufa maa aukuanara andeeqara aukuanee qimaseenoo narí amaaku aqiqanau. Aqiqamaseenoo maasa Mooseena sandufa ameemaanai mina rumbaranaki mariusa minakiqari feefauru aquseenoo idukusoofaqa findifiqa Anutuna amaaku kamambi mariaqeera Yisufa maa maqa maaqanasaaqaraa anaasee aranandaki rumafufanoo maqasoofanoo Mooseena sandufa ameemaanai maa maqanasaa kambiqafi marinau.

6 Anutufa inniara mina amaaku fee qiaqeera qimaseenoo narí amaaku maraquna inni nimuqusaki aqiqoofanoo keeqafi maridanoo, mi maraqunafa inni dadaaqifaqa innee faiqi aanaaqiara fooqaana Anutunara qini qikoo fee qimariafanoo. 7 Miqinara innee sia maqee fifau ainainira faiqi marifaranoo, innee faiqí faqa anaasee faqa kuqaa Anutuna faiqi araamuqmaakaikammafi mariafanoo. Doo marifanoo narí amaaku amianinnana innaarunai mari saqamana mareefandinausa mariafanoo. Anutufa narí kai qifaqa innee mina amaaku araamuqmaaka mina innaarunai mareefandinausa mariafanoo.

8 Ooqai innee Karatia maqa maaqaki marusa sia Anutuna aaqa oonuree amiqimasee irimariqau afaanna ainaina sia Anutunaki maru ainaina innee mina rumbaranaki mariusa mariqau. 9 Doo maqee uqanna Anutunara irimariafanoo, Anutufa faqa doo inniara faqa iridanoo. Doo nanaree innee miqooqari kafaa quandaki kafaa manda umooqukira kuquaqaaira maqasaa irirana innai faqa inniqa nauraa manda sandufa innai faqa quandee fee. Innee Anutuna faiqikiranakiqari quandaki fifau maqasaa irirana rumbaranaki fidee miqidaqee. Saina Yisunasaa rusirafa kai mariaqaana. 10 Innee Karatia maqannaasa kaaqa Yuda maqannaasa oosana oosana sabata faasaanara rimariasa mariafanoo aaqaida miqi mariafanoo. Kaaqa inni moo quqoonara naaquqaifaqa Anutunara iri maria quqoona fee qimasaida minara kai irimariasa mariafanoo. Aukuanara faqa qambaana saqannara faqa kaaqa minara ridaqa minannai innaaruna aana maraanauree qidaqa aaqee mariasa mariafanoo. 11 Qinee Pauroosa inniki marunausa inniara rufiaidaqa. Inniki ainainiafanafa fifaunni maqasaa rairaa idanoommi maqi qidaqa.

12 Oo qini qikaqaafasaa mariasa inniara afeekaikamandee qimannimidaqa. Qinee Pauroosa Yuda maqannaasa mariaafanausa maridaqa misa oosana faqa Mooseena sandufa faqa minnisee aanaamuru naanna ramasee Yisuna saqarikammasee mina ameemaanai maridaqa. Innee faqa miqi kai iqa qini daanna reeqa Mooseena faqa Yuda maqannaasa faqa sandufa minnisee Yisuna kai saqarikiaqa. 13 Qinee aaqee indaaru amiqira fasaasa ufa inni qimannimiafanna oosannara irimariafanoo, qinee aurida mariafannanara inni maqa maaqaki kisaaqasaa maridaqa qimannimiqiafana.

14 Qinee auruafanaqa qiqafee sia qiniara nikooqoofaqa qini mandaikamaqisasee minniqisaqau. Qini aurirafa firaaqoo inni narufaqa minniqisaaneerusia sia minniqisaqau. Idaaqa kai maqisee marufaqa mariqiafana. Innee qiniara Anutuna qangiroora foora mari ifoo qimasee qini qumaraqau. Innee asauku mundirana Yisuna qumaroondeemmiqa qini qumarasee amiqi amiqimmaqisaqau. 15 Mi fasannai innee firaaqoo qiniara asasimariqau, maqee naqi fee ifaqee sia miqidee. Inni ooqai mariranara maaqi qidaqa innee firaaqoo qiniara qimudaoo qimasee qini dadaaqianee qimasee inneeqa firaa uriqarara ainaina kaqi qimuqini inneeqa nifu faqa pitaqimeeqee kaqi qini qimuqini. 16 Doo maqee Yisuna anoona ufa qimannimunnanannai fee qini namuqaa kamambi maridee. Oo sia miqifanoo andeeqaannoo.

17 Akaqa fasiqa anaasee aaqee mariasa inni faqa ani maridaqa moo unna ufa qimannimi mariasa inniara unna qimasee firaaqoo ridaqa amiqi amiqidaqa ueeqaidaqa sia amiqira iriranarau miqidaqau, misa inni mara mareeqa qini Pauroosasaa qaraana rakee iaqeera miqidaqa, misa irirafa innee iannai ubeekanoo marifaqa inni iriranara nári iannai ubeekamasee misa ufa iriaqeera miqidaqa. 18 Akaqausa inni rarisamaseeqa inneeqa irirana misasaa atooqara oosanafa qaaraikamminoo maridanoo. Moo mandoosana moo amiqira oosana maaqimminoo maridanoo. Misa inni rarisamasee misa manda oosana maraaqee qira oosanafa mandoosana maridanoo. Misa inni rarisamasee amiqira oosana maraaqee qira oosanafa amiqira oosanafa maridanoo. Ooqai qinee Pauroosa inni faqa mariafanaqa inni irirafa qinisaa atooqafi innee qiniara ridaqa mariusa mariafanoo maqee nianai marunaqa innee qiniara minnisee unna ufa qimariasara kai misara kai rimariafanoo. 19 Qini faiqi namu qini qimuqusimaria faiqi namusa mariafanoo. Anaasee moo fannoo faiqi aanaaqi maqaidanoo aupuraidanoo maqaidanoo. Qinee miqikaimmasee amiqira fasaasa ufa inni qimannimisee asauku mundirana andeeqara oosana marirana nirana inniki kambiqaanifeera inniara aupuraidaqa qimannimidaqa.

20 Oo qinee maqee nianai maridaqa inni faqa mariaqaana nianai maridaqa inniara amiqira irirana iriaqaana kaaqa inniara daunduraki umaara raidanoo.

21 Innee indaaru Mooseena sandufakiqari idukufi Yisuna ufasaa atooqafi mariaasa maqee Mooseena sandufa ummaara ameemaanai munari minari kafaa keeqararee qimariasa mariafanoo. Innee sia fee mi sandufana iridaqee minaki kaifaa keeqaidee.

22 Mifa maaqi qidanoo, Abarahaamafa qaara faiqi maqoofa maridanoo, moo indaaruqaa faiqi anoofa ainainira anaasee rumbarafa marinau, moo faiqi inaaqiannaana anoofa idukira anaasee Abarahaamana anaaqa uqanna marinau. 23 Abarahaamana amaaku Isamaeerafa rumbara anaasee faiqi marinau, faiqí anaasee imarundee inoo kai faiqi maqanau. Idukira anaasee Saraqana faiqi aadumasaa kambiqanau Anutufa qima afeekaikamasoofanoo Saraqafa qaafa anaasee asooqa maridanoo Abarahaamana faiqi maqanau.

24 Mi anaasee qanda qaara irirana kikiqammusiqa maridaqa. Moo Qakaarafa Sinai aaqanasaa kambiqara anaasee marifa marifaqa mina faiqi namu Mooseena sandufa ameemaanai rumbaranaki kambiqarausa maridaqa. 25 Qakaarafa Arabia maqa maaqaki mari aaqanna kikiqammusinoo maridanoo maqee maria Yeerusaree maqusa kikiqa faqa usinoo maridanoo mi maqusana faqa mi maqusanaki maria fasiqa anaaseesa faqa rumbaranaki Mooseena sandufa nimaarusira rumbaranaki maridaqa. 26 Abarahaamana moo anaasee Saraqafa sia rumbara ainainira anaasee, sia Mooseena sandufa rumbaranaki marifa idukira anaasee marifa maasa Yisunasaa rusimariasa ninoofa uqanna maridanoo. Mifa innaarunai fuka Yeerusaree maqusara foora Yisunasaa rusimariasa firaa maqusa misa ninoofa uqanna maridanoo.

27 Ooqeenaa akarakinaa idi fannoo Saraqanara maaqi qidanoo,

(Abarahaamafa Isamaeerana anoona mifinnai oori ukeekeenoo narí anaaqa uqanna Saraqarana mafi ameesuqusoofanoo mariufanoo mifa faqa asooqanamuki Abarahaamana faiqi uqanna Isakeena maqanau. Minara faiqí minnisainna aanaaseefa faiqi moomoo maqeenoora foora firaaqoo asasiannoo fee qinau.)

28 Qinee Pauroosa minara maaqi qidaqa. Saraqana amaaku Isakeefa Anutuna qima afeekaikira ufasaa kambiqanoo marinau, doo maqee innee qini qikaqaafasaauqa miqi kaimmasee Anutuna ufasaa mina faiqi namu kammambiqa mariafanoo. 29 Mi aukuanna Isakeena aukuana faiqí anaasee undee mandoofanoo kambiqoofa Isamaeerafa quandakinoo Anutuna maraqunannai kambiqoona Isakeena mandaikammamaqanau, doo maqee faqa mi oosanafa miqikaimminoo maridanoo. Mooseena sandufa ameemaanai mariasa inni aana ititaidaqa. 30 Ooqeenaa tamummaqara akara fannoo minara maaqi qidanoo, Rumbara anaasee faqa narí faiqi faqa aqiqamasaina moosaa fifuani. Rumbara anaasee amaaku Isamaeerafa idukira anaasee amaaku Isakeena faqa sia mina akoona ainaina moodaanaki maraani.

31 Doo minara qini qikaqaafasaauqa inniqasaimbaqa sia rumbara anaasee faiqi namu maridaqa idukira anaasee faiqi namu maridaqa, Yisuna idukiranaki maridaqa.