6
Faiqí anaasee manda ainaina mareeu ufafa.
Mi fasannai faiqí anaasee moomoo kamambufaqa maqa maaqa itita fiqa maridaqa misa maanaaqauqa moomoo maqaqau. Maqasaa fasiqauqa Anutuna faiqi namu mi manaaqausa nindafoofaqa nifu noori amiqirausauqa kai marufaqa nári nidimarusa maree mariqau. Miqi marufanoo Anutufa qinau. Qini maraquna naaru naaru sia faiqiki mariannoo. Misa fifau faiqí faiqi marianara kisaaqa aukuana ateekasee qusa aukuana nimianaura, 120 aukuana kai nimianaura.
Mikari faqa kasooqaqee faqa maqasaa fasiqauqa Anutuna faiqi namu faiqí niraamuna maraqa ninii soofaqa faiqi maqee mariqau. Mi faiqisa nimudaani faqaasa murusaqa arirausa maa maqanasaa maridaqa nuqu faqaasa mariqau.
Anutufa aiqama maqasaaqaraasa nindafoofaqa misa marirafa faqa irirafa faqa mandaika uqanna inoo marinau. Miqiqa marufanoo Anutufa firaqoo misa mi manda oosannara irinau. Mifa faiqí auqu maqasaa quqoonara irufanoo aundura mandaikufanoo akooqoofanoo qinau. Maa oosanausa qinee auquafanausa maa maqanasaa qaraana qinee aiqama ruka aqusaanaura. Faiqí faqa ufini aandau faqa aiqama ruka aqusaanaura qinee misa auquafannanara qikooqaidanoo. Anutufa Nooanara kai asasinau.
Nooafa firaa sipa auqu ufafa.
9-10 Nooana oosana maaqimminoo marinau. Nooafa kai sia aaqarana marufa marinau, narí faqa marusakiqari naríara andeeqarafa marinau. Mifa kai Anutuna aqoondikiranaki marinau. Mina amaaku qarammoo namu mariqau. Misa nuqu Seemmafa faqa Qammafa faqa Yafeetafa faqa mariqau.
11 Aiqamausa Anutuna afusaa mandainainaki mariqau. Faiqí narari nararirafa aiqama maqa maaqaki qumbiqanoo marinau. 12 Anutufa aiqama maqa maaqaki qafoofanoo mandaika uqannamminoo marinau. Faiqí anaasee aiqama mandainainaki kai mariqau. 13 Miqiqa marufanoo Anutufa Nooana qimaminoo qinau. Faiqí narari nararirafa qumbiqanoo marinara qinee aiqama fasiqa anaasee naru taikaanauree qidaqa. 14 Nooa, anee amiqira saqarinnai firaa sipa auqua. Mina aunduraki moomoo rumma auqua. Aunduraki faqa adisaa faqa koorootaqa qumaree akusainanoo ititaani. 15 Anee sipa maaqimasee auqua. Mina kisaaqa fannoo Aarinnoonna nammarikiqari Siara Doona nammariki amanasaa 130 metres mina kisaaqa mariani. Mina qusa fannoo 22 meters sia kisaaqa uqanna marinau. Mi sipana maqasaqari maaqa akiiqa amanasaa 13 metres mariani. 16 Asaana qumeeqarana ameemaanai apootaana kaqi mariani 0.5 metre mariani. Sipa qaqaasanai firaa kooqi auquseenana sipa aundurai maqasaa tida rua, mina murufi qambaanai moo tida rua, mina maariqoo moo tida rua. 17 Anutufa kaifaa Nooana qimaminoo qinau. Qinee nammari mareeqee quqasaananoo firaaqoo aufinoo aiqama kasimari ainainausa naru taikaannoo. Aiqama maqasaa maria ainainausa faqa kuqu taikeefaranoo. 18 Ani faqa kai moodaanaki kira ufa qianaura. Aneenna anaaqa faqa aneenna faiqi namu faqa misa ninaaqmaaka faqa sipaki keeqafi mariaqa. 19 Anee aandau oosana oosana mareeqee sipaki quqaa. Oosana oosana qaara kai qaara kai akoona faqa anaasee faqa apammasee sipaki quqasainaqa ani faqa asumu mariaqa. 20 Oosana oosana ufini faqa qaara kai qaara kai mara quqasainaqa ani faqa asumu mariaqa. 21 Anee oosana oosana narainaina misaindi faqa aneennaindi faqa mara sipaki quqaa.
22 Nooafa Anutuna ufa iriseenoo mifa qundee kai inau.