30
Raseera nammarifa narí anasaana faiqi namu nindafeenoo Yakooboona aqinoo qinau. Anee faiqi sia qini mara qimianaqa qinee kaqi marianabaqa kuquanauranoo.
Yakooboofa minara irufanoo arana qoofanoo qinau. Qinee Anutusau maridau. Anutufa kai ani itita amaqaidanoo.
Miqi qimasoofanoo Raseera nammarifa qinau. Maa qini ainaini mari manaaqafa Biriqaa nammarifa marinoo qinee mina ani amiqa. Anee mina faqa faiqeenana faiqi mara amia. Aminanoo faiqi maqasainanoo qinindi kammiannoo. Miqimasee qinee faqa faiqi anausa marianaura. (Mi aukuannai mi maqannaasa oosana miqi marusa mariqau.) Raseera nammarifa miqi qimasee narí ainaini maru manaaqana mina auqu Biriqaa nammarina Yakooboona amisoofanoo mina faqa sakasee faiqanau. Miqimmasoofanoo Biriqaa nammarifa amuaqu qaikinoo mariiufanoo Yakoboona faiqi akoonaiqi maqanau. Maqasoofanoo Raseera nammarifa qafamaseenoo qinau. Doo maqee Anutufa qini oosanara andeeqara oosana fee qimasee qini innaaru qirana iriseenoo doo akoonaiqi qiminoo. Miqi qimaseenoo Raseera nammarifa mi faiqina auqu Dannaa nee qinau.
Mi manaaqafa Biriqaa nammarifa marikinoo kaifaa amuaqu qaikinoo mariiufanoo akoonaiqi moo maqanau. Raseera nammarifa mina qafamaseenoo qinau. Qinee qeeqa qinasaana faqa firaaqoo rairai qimasee qinee uriaaqareeqee qimaseenoo mi faiqina auqu Napatari fee qinau.
Reeaa nammarifa faiqi maqarana taikaseenoo narí ainaini maru manaaqana auqu Siripaa nammarina narí afaaqi Yakooboona mara aminau. 10 Amufanoo minasaa faiqi akoonaiqi moo maqanau. 11 Reeaa nammarifa qafamasee qinau. Oo qini amiqimma qisainara mi faiqina auqu Kadafa nee qinau.
12 Siripaa nammarifa marikinoo kafaa akoonaiqi moo Yakooboona faiqi maqanau. 13 Reeaa nammarifa mina faqa nariara maraseenoo qinau. Doo qinee firaaqoo asasidaqa. Maqee aanaaseeuqa qiniara asasirafee qimasee duqu reefaranoo. Minara iriseenoo mi faiqina auqu Aseera fee qinau.
14 Reeaa nammarina amaaku Reeubeenafa sakumma neemaru kamuqoo andanda kinai nidanoo faiqi maqee maru andandana qaqama paqurinau. Mi aqamana auqu mandareeka marinau. Mina paqurimaseenoo mara mareenoo mini narí anoona Reeaa nammarina aminau. Raseera nammarifa mina qafamaseenoo Reeaa nammarina qimaminoo qinau. Amanee mandareeka qaqama akaqana qini faqa qiminnaree.
15 Miqi qufanoo Reeaa nammarifa narí qimaminoo qinau. Anee qini qifaaqi marasaanafa kaifaa qini qimaaku mandareeka qaqama marararee fee qidanee. Miqi qufanoo Raseera nammarifa qinau. Ani amaaku marai mandareekana qaqama qini qiminaqa doo Yakooboona ani amiananoo ani faqa faiqaannoo.
16 Eenee marufanoo Yakooboofa ainainaindari aniroofanoo Reeaa nammarifa aanai oonu afiqeenoo anidanoo qimaminau. Doo qinee mandareeka qaqama Raseera nammarina amiqa. Mifa mina akiiqara maqee eendaki aniara qini faqa faiqaannee qinoo. Miqi qufanoo Yakooboofa eedoo qimasee Reeaa nammarina faqa sakasee faiqanau.
17 Anutufa Reeaana innaaruqirana iriseenoo dadaaqufanoo Reeaa nammarifa kafaa amuaqu qaikinoo faiqi akoonaiqi maqanau. Moodaannai qisauku namu Yakooboonasaa maqanau. 18 Reeaa nammarifa maqaseenoo qinau. Qinee qeeqa ainainira maanaaqa qeeqa qifaaqi amiafannanara maa faiqina Anutufa qini qiminoo. Mifa minara iriseenoo mi faiqina auqu Isakaranee qinau.
19 Reeaa nammarifa marikinoo kafaa amuaqu qaikinoo akoonaiqi moo maqanau. Dinni ani moodaa maraseenoo Yakooboonasaa maqanau. 20 Maqaseenoo qinau. Anutufa idaaqira ainaina kaqi qiminoo. Maqee dinni qisauku taikasee dinni ani moodaa 6 maraunnanara qini qifaaqi qiniara aidiannoo. Mifa minara iriseenoo mi faiqina auqu Seeburuna fee qinau.
21 Mina aanaaqianna Reeaa nammarifa maanaaqa maqaseenoo Dinnaa nammari fee qinau.
22 Miqooqari Anutufa Raseera nammarina innaaru qirana iriseenoo dadaaqufanoo faiqi maqarana amanaikinau. 23 Mifa amuaquqaika mafufanoo faiqi akoonaiqi maqaseenoo qinau. Anutufa qini qisaurirana taikeenoo qini faiqi akoonaiqi qiminoo. 24 Raseera nammarifa minara iriseenoo qinau. Karaambaiqa qini faiqi moo akoonaiqi qimiani. Miqi qimaseenoo mi faiqina auqu Yooseefaa nee qinau.
Yakooboofa Rabannana faqa mina ainaini marunara ufaqu ufafa.
25 Raseera nammarifa Yooseefaana maqasoo kamuqoo Yakooboofa Rabanna maaqi qimasee qimaminoo qinau. Anee amanee qini quqasainaqa qeeqa maaqai fua. 26 Qinee ani ainainammasaunana qimianna anaaseesa nári faiqi namu faqa qiminaqa maree fua. Qinee amiqimmasee ani ainaina iunnanara anee minara iri mariananoo.
27 Rabannafa minara iriseenoo qinau. Qini afunee fannoo aniara qima qimifaqa iriseeqa anee qini faqa marunnaqoo Anutufa qini ainaina amiqi amiqifanoo firaa qoo kambiqafinoo maridanoo. 28 Qinee minara iridaqa anee aneenna feefauruara qinaqa qinee ani amianaura. 29 Yakooboofa mina iriseenoo kafaa qimaminau. Anee qini ainainirana oosana amiqimmasee irimariananoo. Qinee ani aandau ainasaa rakisi mariafananoo qini rakisirana ameemaanai marida moomoo kambiqee irairaa imariqau. 30 Qinee aniafanna kari ani ainaina oodaa kai marinau. Qinee maaqoo ani maridaqa ani ainaina aiqamai auqaunanoo Anutufa dadaaqifanoo firaanaikinoo maridanoo. Qinee maqee qeeqaree qianna ainainausa maraanaura.
31 Miqi qima soofanoo Rabannafa irinoo narí qimaminau. Doo anee qiananoo naqifee masee feefauru ani amianauree. Miqi qufanoo Yakooboofa qinau. Sia anee feefauru munnimma aina qini qimia. Qeeqa qiannana kai qimia. Qinee kaqi ani sipsipasaa rakisi marianana qini maa iriranara anee eedoo qinaqa ani sipsipasaa rakisianaura. 32 Qinee maqee ani sipsipauqa mariannai oonuree aiqama takoosa takoosira sipsipauqa faqa mimmi miqiranauqa faqa sipsipa aanaaqi ruduqariranauqa faqa maraanaura. Mi feerunara kai qini dididanoo. 33 Qinee andeeqasee maraanaura anee kasooaqee aneenna oonu reenana qafaa. Eekara arira sipsipa qinindiki marinana eekara fee dunduqarira mimmi fee qinindiki marinana qiniara qumuara miaanoo qia.
34 Rabannafa mina iriseenoo asasa mandee qinau. Eeoo maasa anee qianandeemmianaura. 35 Mi faasaanna qumee kai mimmi akoona takoosa takoosa iranauqa faqa mimmi anaasee miqiranauqa faqa eekarasai runduqasai irana faqa runduqarira sipsipauqa faqa moodaanaki quqaseenoo narí faiqi namuara qufaqa misasaa rakisiqau. 36 Rabannafa Yakooboonara maraandoo qimasee narí mimmi sipsipa mara mareenoo narí faiqi namusaa quqasoofaqa nianai qaaramoo afuru aanai faiqee oonuraaqaa irannai munu quqasee rakisi mariqau. Maree fifufanoo Yakooboofa akaqa sipsipauqa mafisoosasaa kai rakisi marinau.
37 Rabanna sipsipasaa maqusai rakisida maridanoo saqari amimiuqa ateekaseenoo moodaa mau apata ruata aquseenoo eekara ari marutinai quandaseenoo sipsipa nammari nee maruqoo rakiqanau. 38 Sipsipa mimmi nammari naidaqa miqoo ani raidaqa naafeeqaambaaqaa rimariqau. Yakooboofa mi saqarisa sipsipauqa difaaniki nammari neemaruqoo rakiqaqoofanoo marufaqa sipsipauqa nammari narara anireeqa mi saqarina qafaidaqa akoonauqa anaasee naafeeqaambaaqaa riaqeera rakianau. 39 Mimmiuqaindi miqoo mina qafaidaqa akoonauqa anaasee naafeeqasoofaqa akarakaurira aanaaqiuqa maqaqau. 40 Yakooboofa sipsipauqa nifiqeenoo akarakaurira mimmiuqa maruqoo munusaina sipsipa akoonauqa akarakaurirana qafaidaqa anaasee sipsipa naafeeqasaifaqa miqirana maqaaqeera nifiqee finau. Miqi marunannoo Yakooboofa akarakaurira aanaaqiuqa narindiki mareeqaida aaduma quqee marufanoo moomooki marinau. 41 Nifaaqauqa faqaa sipsipa faqa mimmi faqa naafee qaambaaqaa rirara ufanoo Yakooboofa mi saqari asaanausa mareeqee nammari neemaruqoo rakiqeesoofaqa minakiaqa nidaqa naafeeqee mariqau. 42 Nimudaani aanaaqi ummooqukiqa nusa naafeeqara rufanoo Yakooboofa sia mi saqarisa rakiqanau. Miqimmasee maru fanoo Rabananaindi amudaani aanaaqi ummooqukirafauqa kai marufanoo Yakooboonaindi nifaaqauqa faqaasa amiqirausa kai mariqau. 43 Mi oosannanannai Yakooboofa moomoo akinaina faqaafa marinau. Mina sipsipa mimmi moomoo uqanna mariqau. Mina ainainira fasiqauqa faqa aanaaseeuqa faqa kammeerauqa faqa doonkiuqa faqa moomoo qumbiqaqa mariqau.