1 Yakooboofa Isipa maqa maaqai narana moomoo marunara narí faiqi namu qimanniminoo qinau. Innee naqaa fee ifaqee narana minni ooqu maraaqaana maridee. 2 Isipa maqa maaqai narana maridanoo mifoo qiafaqa iriqa. Miqoo ooqureeqa akaqa narana feefaurumma maree murusaifaqa namasee sia kuqua.

3 Miqi qufaqa Yooseefaana afasausa mara moo anaasee faiqi namu qisauku qara taikasee marusa narana feefaurirara Isipa maqa maaqai ooqu fiqau. 4 Yakooboofa Yooseefaana akaqa uqanna Beensaminna sia aiqanau. Moo ainaina mina afaaqai kambiqaandoo qimasee rufiasee sia aiqanau. 5 Aandaroo firaafa Kannaa maqa maaqaki nári marunara Yakooboona faiqi namu faqa moomoosa faqa narana feefaurirara ooqu fiqau.

6 Yooseefaafa Isipa maqa maaqakinaasa uriqararafa maridanoo aiqama maqa maaqakinaasa feefauriaqee qimasee quqaqoofaqa feefauri mariqau. Yooseefaana afasausa mara ooquree Yooseena oorinni noorindari maqasaa kummaraqau. 7 Yooseefaafa narí afasausa mara noori nindafoofanoo Yooseefaana irirafa kambiqanau. Kambi qoofanoo sia misara iridanoora foora aranaiqi iramirinoo qinau. Innee yaindarifee anidee. Qufaqa misa qiqau. Maasa Kannaana maqusaindari narana feefau rirara qumidaqa.

8 Miqi qufanoo Yooseefaafa misara iri marufaqa mina afasausa mara minara sia iri mariqau. 9 Yooseefaana irirafa kambiqa fufanoo mifa ooqai narí faiqi saa qainunara oonu mafi irinau. Innee nipuraraa fasiqauqa mariafaqa nindafaida. Innee mai qumuree maasa aandaroo darifaqa ummooqukida mandaiki marunausa qumu qiqafararee qimasee qumuafanoo.

10 Miqi qufaqa misa maaqi qimasee narí qimamiqau. Oo uriqararafa sia maasa miqianaura. Maasa ani ainainira faiqiara foora narana feefaurirara qumidaqa. 11 Maasa moodaa fasiqa faiqi namu kai maridaqa. Maasa kuqaa ufa kai qimarunausa maridaqa. Uriqararafa maasa sia nipuraraa fasiqau maridaqau.

12 Miqi qimasoofanoo Yooseefaafa nariqa qima niminoo qinau. Innee unna qimariafanoo. Maasa maqa maaqa mandaikinoo sia afeekaikinoo marina qafarara qumuafanoo.

13 Misa mi ufana iriseeqa kafaa narí qimamiqa qiqau. Uriqararafa, maasa aiqama qisaukuqara taikasee qikunni ooqu qaara marasee 12 maridaqa. Kannaa maqa maaqaki moodaa fasiqa faiqi namu mariafannanakiqari moodaafa kuqinau. Maasa ninaaqiannaafa maasa nikoona faqa maqusai kaqi maridanoo.

14 Yooseefaafa mina iriseenoo kafaa qima niminoo qinau. Doo qinee qidaqa, innee nipuraraa fasiqauqa mariafanoo. 15 Qinee maaqimmasee inni nimanammasee qafaanaura. Qinee Faraoona auqusaa inni qima nimidaqa sia innee ooru fifaranoo maaqoo marifanoo inni nikaqa qumurainaqa oorufifaranoo. 16 Innikiqari moo fannoo ooru inneeqa nikaqa afiqee qumuaqa. Innee akaqausa sundiauqa faqa marifaqa innisaa rakisi marifaqa maasa innee qia ufana qimasee qafamasaana oorufifaranoo. Innee unna qifaqa kuqaa Faraoona auqusa qimannimidaqa innee nipuraraa fasiqa marifaranoo. 17 Miqi qimasee Yooseefaafa qufaqa misauqa rumbeeqee karabusa maqaki quqasoofaqa qaaramoo faasaana mariqau.

18 Qaaramoo faasaanasaa marisoofanoo Yooseefaafa maaqi qimasee qima niminau. Qinee Anutunara rufiee marunna fasiqausa maridaqa. Innee qini ufa mau fiqa amiqimmasee marifaranoo. 19 Inniara kuqaa qira fasiqauqee qiaqeera innikiqari moodaafa innee maria karabusanaki marinaqa innee akaqausa narana feefauru maqaana muru inneeqa faiqi anaasee nimifaqa naaqa. 20 Innee ooruree inneeqa nikaqa inaaqianaana afiqeeqa qumuaqa. Qumu raifaqa qinee inniara kuqaa ufa kai qimariasee qimasee sia kuqa naruanaura. Miqi qufaqa misa aiqamausa mina ufara eedoo qiqau.

21 Eedoo qimasee narí qimami narí qimami qiqau. Innisaimbaqa kuqaa qeeqa qikaqa mandaikamma amaqa qiafana. Mifa firaa ummaaraki maridanoo dadaaqiaqee qimarufaqa innisaimbaqa sia iriqiafana. Minara maasa maqee maa ummaaranaki maridaqa.

22 Reeubeenafa misa ufa iriseenoo maaqi qinoo qinau. Qinee qaoo qiafana innee sia iriqau. Mifa kuquna akiiqara maasa maqee ummaara maraidaqa. 23 Yooseefaafa misa qimaru ufana umee kai irimarinau, miqi marunara misa sia iriqau. Misa Yooseefaana faqa ufa qianee qimasee qimarufanoo moo fasiqa fannoo misa ufa quandee marinau. 24 Yooseefaafa misa ufa iriseenoo quqasee umeenni oonureenoo ikiraqa seenoo oonu randee aninau. Iki raqarafa taikoofanoo ufaqirana amanaikufanoo oonu randee aninau. Anireenoo misakina Simeeoonnana qumarasee misa nifusaa rumbanau.

25 Yooseefaafa narí ainainira faiqiuqa qimannimufaqa narana mina afasausamara uqa umbiqaseeqa misa munnimma kaifaa nariqa uqa adianai uqarumasee nimiaqa, aanai fida neefandinna narana faqa nimiaqa qufaqa eedoo qimasee miqimma nimiqau. 26 Mina afasausa mara feefaurummasoo naranna nariqa doonkisaa quqasee maree ooru fiqau.

27 Yooseefaana afasausa mara narana nári doonkisaa quqasee maree fifii ufaqa eendufaqa aanai uiqaana arasee faiqarara imarufanoo mina afasaafa moofannoo narí doonki narana amirara narí uqa ooraqasee qafoofanoo mina munnimma uqa adianai marufanoo qafanau. 28 Qafamasee narí ainaina naaramaseenoo qinau. Innee aniree qafaaqa qini munnimma kaifaa qiqa qimiafanoo qini uqaki maridanoo. Miqi qufaqa misa nimuqusa mandaikufaqa rufiaidaqa qiqau. Anutufa maasa naqaa feemma qimaqeenoo fee maaqinoo fee.

29 Miqi qimasee faiqaqee mariufaqa iaqoo kananaana nári nikoofa Yakooboofa marunnai Kannaa maqusai ooruree aiqama mi ainainausa kambiqoonara qimamiqau. 30 Isipa maqannaa karaambaiqa fannoo aanoo qira ufa kai maasa qima qimaqeenoo. Mifa maasara innee qini maqa maaqaki nidaqa nipuree mariafanoo fee qimasee rairai qinoo. 31 Miqi qifaqa maasa maaqi qimasee narí qimamiqa. Oo maasa sia nipuraraa fasiqau maridaqau. Maasa kuqaa ufa qimarunausa maridaqa. 32 Maasa moodaa fasiqa faiqi namu qisauku qara taikasee qikunnooqu qaara marasee 12 maridaqa. Maasa qikaqa moo fannoo narí akoona faqa Kannaana maqusai maridanoo, moo fannoo kuqinau.

33 Maasa miqi qimasee qimamiafanoo mifa mina iriseenoo qinoo, qinee maaqi masee inni nimanida qafaanauree qinoo. Innikiqari moodaafa qini faqa marinaqa innee akaqausa sakumma aina maree muru faiqi anaasee nimiaqa. 34 Nimiseeqa narana taikainaqa kafaa qumiqa inneeqa nikaqa faqa afiqee qumuaqa. Muqusaifaqa qinee mina qafamaseeqa inniara kuqaa sia nipuraraa fasiqauqee kuqaa ufakai qimariasee qimaseeqa inni faiqí iduku nimianaqa innee maqee maqee narana aina feefaurida ooruree qumuree qiqa nuaqee qinoo. Misa miqi qimasee nári nikoona qimamiqau.

35 Qimamiseeqa nári uqauqa idukusee ooraqasee qafoofanoo aiqamausa munnimma kaqi marinau. Misa qafamasee nári nikoona Yakooboona faqa rufiaqau. 36 Yakooboofa rufiaidanoo maaqi qimasee narí faiqi namu niqinau. Innee qini faiqi namu mandaika maqimaqee mariafanoo. Yooseefaafa doo taika fufaqa, Simeeoonafa faqa taika fifaqa kafaa innee Beensaminnana faqa afiqee firaree qidee. Qinee ummaaraki kai maridaqa.

37 Reeubeenafa narí akoona ufa iriseenoo maaqi qimasee narí akoona qimaminau. Oo qipoo, qinee Beensaminnasaa rakisianaura. Qinee sia mina afiqee ururaanana mina akiiqara qini qimaaku qara narua. Anee qini qisaukuki quqasainaqa qinee amiqi masee afiqaqa niniinaqa afiqee uruanaura.

38 Miqi qimasoofanoo Yakooboofa qinau. Qini qimaaku sia uqanna inni faqa fuannoo. Mina afasaafa doo kuqu fufaqa mifa naríara maridanoo. Aanai mandainaina paqurinaqa qinee maaqirausa asooqa inni mi ummaarafa darinaqa kuquanoora.