1 Yooseefaafa narí afasausa moodaannai qisauku namu nifiqeenoo Faraoo fuqoo ooru finau. Oorureenoo qimaminoo qinau. Oo Faraoo qini qikoofa faqa qini qifasausa faqa Kannaana maqusaindari nári sipsipa burimakau aiqama faqa nári ainaina faqa maree qumidaqa. Maqee misa Kooseena maqasaa qumu maridaqa. 2 Miqi qimasee narí afasausa mara Faraoona oorinni murusoofanoo niqafanau.

3 Faraoofa Yooseefaana ufa iriseenoo mina afasausa mara iramirinoo qinau. Innee nana ainaini mariasee. Miqi qufaqa misa iriseeqa qiqau. Uriqararafa, maasa sipsipasaa rakisira ainaina imarunausa maridaqa. Maasa qikeeku qikaaku auqeeu saikana kai maasa faqa maraidaqa. 4 Aandaroo firaafa uqanna Kannaana maqasaa darifanoo maasa sipsipauqa nara andanda sia marifaqa maasa maa maqa maaqanaki marirara umidaqa. Amanee eedoo qirana qiminaqa maasa Kooseena maqa maaqaki marianauree.

5 Faraoofa misa ufa iriseenoo Yooseefaana qimaminoo qinau. Doo ani akoofa faqa ani afasausa faqa ani faqa mariraree qidee. 6 Isipa maqa maaqa misaindi maridanoo. Sainaqa Kooseena maqa maaqaki mariaqa. Kooseena maqa maaqa amiqirafa maridanoo. Ani afasausa kinaana moo qafainanoo sipsipa burimakau amiqi mandee rakisi marinnana mina mareeqeenana quqasainanoo mifa qini sipsipa burimakausaa rakisiani.

7 Miqi qimasoofanoo Yooseefaafa narí akoona afiqeenoo Faraoo fuqoo minisoofanoo Yakooboofa miqoo anireenoo Faraoona afaaqooqa qimama qanau. 8 Miqi qimasoofanoo Faraoofa Yakooboona aukuanara iramirinau. Ani aukuana naqummee maridanoo fee qufanoo Yakooboofa qinau. 9 Qinee 130 aukuana kai maa maqanasaa maridaqa. Sia kisaaqasaa fau qinee moomoo ummaara paquriqa. Qini qikeeku qikaaku kisaaqasaa uqanna mariqau. Misa aukuana fannoo qini aukuana fiaaqaranoo maridanoo. 10 Yakooboofa miqi qimaseenoo kafaa Faraoona afaaqooqa qimama qaseenoo doo raudamaki finau.

11 Yooseefaafa narí afasausa mara faqa narí akoona faqa Faraoofa uqoo Isipa maqa maqaki Rameeseesa maqusa aaqa soofaqa mariqau. 12 Miqiqa miqoo marufanoo Yooseefaafa narí akoona faqa narí afasausa mara faqa narí akoona aiku asauku marusa faqa kaaqa aanaaqi faiqiuqa faqa narana nimi marinau.

13 Aandaroo firaafa uqanna imarufanoo sia uqanna aiqama tinai narana marinau. Isipa maqannaa fasiqa anaasee faqa Kannaana maqannaa fasiqa anaasee faqa naararoofaqa ummooquka iqa nimariqau. 14 Misa narana feefauri marufanoo Yooseefaafa mi munnimmana mara maree Faraoofa maruqoo munusee mina ami marinau. 15 Isipa maqannaasa faqa Kannaana maqanaasa faqa narana feefaurida aiqama nári munnimma taikaqau. Miqi maseeqa Isipa maqannaasa anireeqa Yooseefaana qimamiqa qiqau. Maasa munnimma doo taikaseeqa anee sia maasa afu kai qiqafaa kuquana faara narana niminaqa naa. Sia maasa narana qiminaqa maasa ani afusaa kuquanaura.

16 Misa miqi qufanoo Yooseefaafa maaqi qimasee nariqa qimanniminau. Inni munnimma taikainaqa inneeeqa aandau aina maree mini qimidaqa narana mina akiiqara maraaqa. 17 Miqi qufaqa misa nariqa aandau aina Yooseefaana mini amufanoo misa qoosauqa faqa sipsipauqa faqa mimmiuqa faqa burimakauqa faqa doonkiuqa faqa mina akiiqara narana nimimarinau. Doo mi aukuanna misa nári aandau aina akiiqara Yooseefaafa narana nimi marinau.

18 Mi aukuanna taikoofaqa kafaa moo aukuanaki Yooseefaa fuqoo anireeqa maaqi qimasee qimamiqau. Maasa naqi fee mandee moo ainaina ani afusaa kukeeqaanauree, sia. Doo maasa munnimma taika fifaqa maasa aandau aina faqa anindika kai mambifaqa kaqi maridaqa. Sia ani amira ainaina moo marifaqa. Maasa qiqa qifaaqa faqa maasa maqa faqa kai maasaki maridanoo. 19 Maasa ani afusaa kuquaqaa midaqa doo saina maasa qeeqa faiqi faqa maqa faqa mina kai amisaidaqa feefauru marasaidaqa narana naa. Miqimmaseeqa maasa qeeqa faqa Faraoona anainira faiqi kakai iqa maria. Maasa moodaa ainainara kai iridaqa. Narana faqa narana asumu faqa niminaqa maasa qummaqua. Narana qummaquseeqa maasa sia kuqua.

20 Yooseefaafa misa ufa iriseenoo aiqama Isipa maqa maaqa feefaurumma Faraoona aminau. Aiqama Isipa maqannaasa aandaroo firaafa uqanna narunara nariqa maqa amisee feefauru marasee minannoo narana feefaurumma neemarufanoo aiqama maqa maaqa Faraoonaindika minoo maarinau. 21 Miqi marufanoo Yooseefaafa Isipa maqa maaqa dinni atindari dinni atinni marusa mareeqee ainainira faiqika kai masanau. 22 Isipa maqannaa amaana maqasaa rakisirausa maqa kai Yooseefaafa sia feefaurinau. Faraoofa maqee maqee munnimma nimi marufaqa narana feefaurummasaida neemarufaqa sia misa maqa feefauriqau.

23 Yooseefaafa faiqí anaasee qimanniminoo qinau. Doo innee qafaidee qinee maqee inni faqa inniqa maqa faqa feefaurumma Faraoona amiqa. Maqee narana asumu nimianaqa inneeqa maqa Faraoona amu maqanaki kafaa qummaquaqa. 24 Narana anoona mambinaqa moodaaqoo unaku quqaseeqa aiqama moodaannai qisaukukinaana moodaa moodaa Faraoona amisee akaqana inneeqa faiqi aanaaseera faqa asumuara faqa quqaaqa.

25 Faiqí anaasee Yooseefaana maaqi qimasee qimamiqa qiqau. Oo Yooseefaafa anee aneenna kai maasa manda ainainasaa itita qisaananoo. Anee kai maasa amiqimma qisaananoo. Uriqararafa maasa amana Faraoona ainainira faiqi marianaura.

26 Miqoo qari Yooseefaafa afeeka sanda ufa quqanau. Mi sanda ufana oosana maaqi minoo maridanoo. Aiqama Isipa maqa maaqakinaa narana unakusee moodaannai qisauku kinaana moodaa Faraoona amiaqa. Mi ufafa maqee kaqi afeekaikinoo maridanoo. Amaana maqasaa rakisi marusa maqa kai sia Faraoonaindikinoo marinau.

27 Isaraee maqannaasa Isipa maqasaa Kooseena maqa maaqaki mariqau. Miqoo maridaqa moomoo ainaina faqaasa marufanoo misa faiqi namu faqa moomoo kambiqaqau. 28 Yakooboofa qisauku qara taikaseenoo qiku dinni taikaseenoo dinni oonu qaara maraseenoo 17 aukuana Isipa maqasaa marinau. Mina aukuana aiqama moodaanaki 147 aukuana marasee kuqinau. 29 Mina kuqirafa adeedi rama fufanoo Yakooboofa Yooseefaana aaramaseenoo qimaminau. Anee aneenna asauku qini qifundana ameemaanai quqaseenana sia Isipa maqasaa akundaanauranoofee qimasee qimafeekaikia. 30 Qini qiqa qikausa mara nikundoonaki qikundaa. Qini Isipa maqasaaqari mara maree misa nikundooqoo qikundaa. Miqi qufanoo Yooseefaafa narí qimaminoo qinau. Anee qianandee mianaura.

31 Yooseefaafa narí akoona ufa iriseenoo eedoo qufanoo mina akoofa qinau. Saa sia kaqi eedoo qia, kuqaa qima afeekai kinana eedoo qia. Miqi qimasoofanoo kuqaa Yooseefaafa eedoo qima afeekai kinau. Qima afeekai kammasoofanoo Yakooboofa narí qaarisaa ooqu marifi Anutunara dufi dufi qinau. Innaaru qimasoofanoo Yooseefaafa narí ainainai finau.