1 Yisufa moo faasaana kafaa mi amaana maqanaki keeqafi qafoofanoo faiqí moo asauku sufirafa faiqí anaasee moomoo namufaqa keeqafi marinau. 2 Akaqa fasiqa anaasee Yisunara ufa qianee qimasee amaarusidaqa asauku sufirana faqa Yisuna faqa amiqimasee ninda fee mariqau. Yisufa Saririqasaa fee faiqí asauku sufirana andeeqaannoo fee Mooseena sandufa rukiaannoo fee qidaqa qafee mariqau. 3-4 Yisufa amaana maqaki faiqí anaasee amaana ufa qimannimidanoo asauku sufirana aaramasee qinau anee mai aniree aiqamausa nifusaa kikiqia qimaseenoo quandaki faiqí anaasee irammirinoo qinau. Mooseena sandufa Saririqa faasaana sandufa fannoo maasara naqi fee qidanoo maasa minasaa faiqí anaasee dadaaqafee ianauree kuridianauree maasa faiqí marirana asumufee marannimianauree kuridi taikannimaqaanauree miqi qufaqa misa sia ufa qiqau kaqi kasoomafiqau.

5 Yisufa mina qafamasee raiqara oori maraseenoo faiqí anaasee aiqama munu ninda fee mini ninda fee maseenoo misa aaqarana afeeka irirana nindafa masoofanoo misara amuqusinau. Amuqusufanoo mi asauku sufira fasiqana qimaminoo qinau aneenna asauku ratutaa qufanoo asauku ratutasoofanoo mina asauku amiqinau. 6 Farisai amaana ufa qimarusa minaki marusa qafamaseeqa amaana maqakiqari rauda makufaqa Eeroodeena ufa irimarusa faqa suqufufaqa Yisuna arira ufa qimariqau.

7-8 Miqooqari Yisufa Kariree farumma firaa farumma tia marunnai ooqufufaqa faiqí anaasee moomoosa afaqa maree ooqu fiqau. Akaqausa Kariree maqa maaqakiqari aniqau, akaqausa Yudeea maqa maaqakiqari aniqau akaqausa Yeerusaree maqusakiqari aniqau akaqausa Idumeea maqa maaqakiqari aniqau akaqausa Yooradana nammari dinni afainni marusa aniqau, akaqausa Tiree maqusakiqari faqa Sidoonna maqusakiqari faqa misaqa marusa faqa aniqau. Doo mi fasiqa anaaseesa moomoosuqanna tatufufaqa Yisufa imaru ainainausara iriseeqa qafararee qimasee ani suqiqau. Faiqí anaasee moomoosa Yisuna auqaidaqa radamuaqaammimariqau.

9-10 Yisufa misakinaana moomoo aurimarusa andeeqannisee marunara faiqí anaasee aiqama oosana oosana aurirana maraqanusa nisaukukoo Yisuna auqaananoo maasa aurirana taikaanifee qimasaida Yisuna auqaidaqa radamuaqaa imariqau. Yisufa minara iriseenoo narí faiqinamu qimanniminau innee kanuqa rarisama daaqa nammariki quqaaqa misa qini radamifaqa kanuaki akaraanaqa sia radamuaqa qufaqa misa miqimmiqau. 11-12 Faiqí anaasee faafasaaqa naunduraki marusa Yisuna qafamasoofaqa naunduraki maru faafasaaqausa faasai misa Yisuna qafamaseeqa faaqa quqasee koorooiqa qiqau. Anee Anutuna amaaku mariana fee qufanoo Yisufa nimambaina qimasee qaoo qinoo qinau sia innee afaannauqa qiniara kooroo iaqa.

13-14 Mi fasannai Yisufa amuaqu namusa oorureenoo narí aiku asauku marianee qimarusa naara masoofaqa aniroofanoo Yisufa misakinaana qisaukuqara faqa qiku ooqu qaara marasee nuqu reenoo qini faqa mariaqee qimasee nuqu reenoo niqiqoo fasiqausee qimasee qimanniminoo qinau, qinee inniara rusandeesamumasee mareeqa qinee inni niqiqaanaqa maqusa maqusa nidaqa qimannimiaqa. 15 Faiqí anaasee faafasaaqa naunduraki marina aqiqee marunna afeekana nimianaqa aqiqeefaranoo. 16-17 Maanamusa Yisufa rusandeesamumandee maranau.

Simoona Yisufa moo auqundanau Peetooroonee qimasee rusandeesamumandee mina faqa narí faiqi namuki quqanau.

Seebeedina amaakuqara Yameesafa faqa narí akaqa Yoohaneena faqa miqanda Yisufa moo nuquranau Booaneeraqeesafa mi nuquna oosana innaarunai qimarina fooqaaqandee qimasee miqanda faqa rusadeesamumasee narí faiqi namuki quqanau.

18 Andurufa faqa

Firipifa faqa

Baratooroomeeufa faqa

Mataioofa faqa

Toomasifa faqa

moo Yameesafa Arafaiusana amaaku maruna faqa

Tadeeusafa faqa

moo Simoonafa nári kaamannaikiaqeera qimarufa.

19 Yudasifa Keerioota maqusaindaraafa Yisunara kasooqaqee uqeeqaaninafa mina faqa misauqa faqa mareeqeenoo narí faiqi namuki quqanau.

20 Miqooqari Yisufa narí maaqai Kapeeranaumma maqusai maaqaki keeqafufaqa faiqí anaasee moomoo uqanna maaqaki ani umbiqafufanoo narana naani quna minniseenoo narí faiqi namufaqa sia nanau. 21 Faiqí anaasee Yisunara doo furufara mandeeaafoo qufaqa mina atiuqa niranaqoofaqa Yisuna oonu rarisee anirara deedaqiqau.

22 Mooseena sandufa akoofasauqa akaqausa Yeerusaree maqusaindari qumusa Yisunara maaqi qimasee qimariqau. Mifa afaannauqa uriqararafa Beeraseeburafa mina aundurai marifa maridanoo fee qiqau. Akaqausa Yisunara afaanna uriqararausa afeeka amimariafanoo minannai afaannauqa niqiqaidanoo fee qimariqau. 23 Yisufa minara iriseenoo faiqí anaasee naaramma quqasoofaqa aniroofanoo moo ainaina kikiqa ususeenoo quandara ufa kai qimanniminoo qinau. Naqimasee Sadannafa quandaki Sadannana aqiqaannoo fee sia amanaikianoo. 24 Moo maqannaasa narinni narinni rakiqa rakeekaa iqa doo mi maqannaasa taikee kuridifaranoo. 25 Moodaa oosana moodaa maaqaki mariasa rakuakiqa doo misa faqa taikeefaranoo. 26 Sadannafa narí ququsakinaasa faqa miqikai inoo rakuakinanoo sia amana kisaaqasaa mariannoo moodaa moodaa inoo taikaannoo.

27 Ummuarimari fasiqafa naqimandee afeeka fasiqa maaqa rapeemaseenoo mina ainaina ummuariannoo fee sia amanaikiannoo. Mi ummuari mari fasiqafa anireenoo sanda qumareenoo mi afeeka fasiqana rumba quqaseeno miqoo mina maaqaki keeqafi mina ainaina ummuariannoo. Qinee Anutuna afeekannai Sadannana rumba quqaseeqa mina afaannauqa faiqí nauduraki mariasa niqiqaidaqa. 30 Misa Yisunara afaanna mina aundurai maridanoo mifoo qimarunara mi ufana qinau.

28 Maa ainainara kai iriaqa sia aunuaqa. Faiqí anaasee oosana oosana mandainaina faqa oosana oosana manda ufa qirana faqa moomoo kari qimariana faqa Anutufa minauqa akiaqara amana mininnisaannoo. 29 Moo fannoo Anutuna naaquqara maraqunara manda ufa qinanoo Anutufa mina akiaqara sia uqanna minnaisaannoo mi ufana qimarifa naaru naaru fimaria idanaki aaqarana marasaifanoo sia uqanna Anutufa minnaisaannoo.

31 Yisufa miqida maaqaki ufa qimannimimarufanoo mina akaqaafasaa mina anoona saimbaqa naambeeqai ani kikiqiqa maridaqa Yisuna qimamianeerufanoo sia amanaikufaqa faiqí moo aqiqee oonu Yisuna qimaminanoo aniani fee qiqau. 32-35 Maaqaki Yisuna fiqu fiquiqa ooqu mariqa marusa mi ufana irisee qimamiqau ani anoofa faqa ani akaqaafasaa faqa madaanai maridaqa ani aareeaa maqi qufanoo Yisufa iriseenoo miqoo marusa irammirinoo qinau. Yafee qini qinoo fee yafee qini qikaqaafasaa fee qimaseenoo narí faqa marusa munu ninda fee mini ninda fee maseenoo qinau. Qafaaqa, maaqoo qini qinausa qini qikaqaafasaauqa maridaqa, qini qikoona iriranamau fimariasa misa kai qini qikaqaafasaa qini dauna qikaqa qini qinausa maridaqa.