1 Doo miqooqari kanuqa fannoo Kariree farummaki fifiufanoo nammari dinnafai nianai Keerasa maqannaasa maqa maaqa munu raquru aminau. 2 Yisufa kanuqakiqari maqasaa aqufufanoo faiqí moo faafasaaqa aunduraki marufa Yisufinnai aniranau. 3-5 Mi fasiqana maqannaasa faiqí iri mara maraida ooni aamarai akundee mariqau. Mi fasiqafa mi ooni aamaranaki faiqee marufa marinau. Moomoo kari misa mina qumareeqa sainandannai mina aiku asauku rumba quqasoofanoo afeekaikamandeenoo asaukusaaqaraa sainanda rakeemma aquseenoo aiku rumbaqoo sainanda turi mandee mina rakeemma aqusoofaqa sia amana mina qumaree mariqau. Mina afeeka uriqaranoo marunara misa sia amanaikiqa minnisoofanoo faiqí madikamaqoonakiaqa faqa aaqana aaqanakiaqa faqa faaqa quqanoo nidanoo oonisamu qumaraidanoo narí afaaqa ateekanoonufa marinau.

6-7 Yisufa kanuqakiqari aniroofanoo mi fasiqafa ooni aamaraki nianaindari Yisuna qafamaseenoo sandee anireenoo Yisuna oorinni aqoori saunara finoo oorindari firaa kari faaqa quqaseenoo Yisuna aaramaseenoo qinau. Oo Yisufa anee firaaqoo uriqarara Anutuna amaaku mariananoo. Anee nanaree maasa soodaa qidanee. Qinee afeekaikamandee ani qimamidaqa. Anee Anutunara irisee sia qini darua. 8 Mi fasiqafa sia fifau miqi qinau. Yisufa mina aundurakinaa afaannara anee manda afaanna maa fasiqana aundurakiqari rafudamaki fua qunara mi fasiqafa miqi qinau. 9 Yisufa mina ufa iriseenoo irammirinau ani auqu yafee qufanoo mi fasiqana aunduraindari afaanna fannoo qinau. Maasa moomoosa qusidaqa marunnanara maasa duqu qusirausee qidaqa.

10-13 Miqi qimasoofanoo afaannauqa faqaa fasiqa fannoo narí aundurakinaa afaannauqara kafaa kafaa Yisuna qimaminau. Sia maa maqa maaqanakiqari misa niqiqaa. Miqi qimaseenoo Yisuna qimamimarufanoo. Mi nammarina afainni ameemai adeedi kuara moomoo andanda neemariqau. Mi fasiqana aundurakimari afaannauqa kuarauqara Yisunara afeekaikiqa qiqau maasa diqiqannee qimasee diqiqainaqa kuarauqa naunduraki fua qufanoo Yisufa doo fuaqee qufaqa mi afaannausa mi fasiqana aundurakiqari rafudamakufaqa kuarauqa naunduraki keeqaqau. Kuarauqa naunduraki keeqoofaqa mi ameemanaindari sandamaqaraasufaqa farummaki bururu qufaqa aiqama kuqu taikaqau. Mi kuarausa tu tauseenna (2,000) kuara mariqau ooni saqari auqiqa mariqau nukudara foora mariqau.

14-15 Mi kuarausasaa rakisi maru fasiqausa mi kuarausa nindafamasee quqasee sandamaqaraasamasee maqusai marusa faqa uiqaana maaqakiaqa marusa faqa qimannimiqau. Qimannimisoofaqa aiqama qafararee qimasee aniree qafoofanoo moomoo afaanna aundurai mariu fasiqafa andeeqasee qamunna afisusee irirana marasee miqoo ooqumari fi marufaqa ani qafoofanoo naaquqee naindiri ranau. 16-17 Faasai mariusa Yisufa afaanna niqiqoona faqa kuara nammariki aqufunara faqa qafoosa misa maqusaindari aniroosa aiqama ainainara qimannimisoofaqa misa iriseeqa Yisunara rufiaseeqa mifinnai ooquree kafaa kafaa irammiridaqa qiqau maasa maqa maaqakiqari amanee anee finnaree qiqau.

18 Yisufa eedoo qimasee kanuaki akareemarufanoo afaanna aundurai mariu fasiqafa Yisunara afeekaikamaseenoo irammirinoo qinau amanee qinee ani faqa funauree qimasee fuki faaki qinau. 19 Yisufa irisee qaoo qimasee qimaminoo qinau. Anee aneenna maaqai anirandee oonureenana aneenna anoona akoona atiuqa qinee karaambaiqa ani firaaqoo dadaaqunnanara faqa firaaqoo aniara amuqusunnara faqa qimannimia. 20 Miqi qimasoofanoo anirandee narí maqa maaqai oonuree qisaukuqara taikasee maqusanaasee qimarusa aiqama qimannimimaree fiqu fiqu qidanoo Yisufa dadaaqunara qimanniminoo nimarinau. Aiqamausa mi ufana irimarusa firaaqoo naaquqoofaqa naindiri roofaqa oo kuqaa fee miqinoo fee qiqau.

21 Yisufa miqooqari kanuqaki akaramafufanoo nammari taqamaree dindanai kafaannai finau. Miqoo oonuroofaqa faiqí anaasee moomoosa Yisuna ani mara ititasaqau. 22 Mi maqusanaki amaana maqasaa rakisimaru fasiqafa mina auqu Iairusafa anireenoo Yisuna oorini maqasaa aqufufanoo afeekaikamandee fuki faaki qinoo irammirinau. 23-24 Qini qiraamuna kaqikaa qiraamuna aurimarifaqa amanee anee anireenana aneenna asauku minasaa quqasainanoo findifuani kuquandoora qufanoo Yisufa mina faqa findifi finau. Fimarufaqa moomoosa titiqimafufaqa fidanoo misa rusadeesamumandee fimarinau.

25-26 Miqoo misaki anaasee moo marinau. Qisaukuqara taikasee qikuni ooqu qaara marasee aukuana kisaaqandaikimaru anaaseefa marinau, mifa moomoo tutaqausunnai fimarufanoo sia andeeqoofanoo firaa teeroo quqaranaki marinau. Mi anaaseefa tutaqausunnai narí munnimma maqee maqee aqii taikasoofanoo sia mina aurirafa taikanau maqee maqee firaanaikinau. 27-29 Mi anaaseefa Yisuna afeekara iriseenoo faiqí aanaaseekiaqa qumee mina aanaaqiannai oonuree maaqi qimasee irinau, qinee oonuree mina qamunna kai auqamasaananoo mina afeeka fannoo qini aurirana taikaqisaannoo.

Miqi qimasee faiqí anaasee titiqimafufanoo aanaaqianaindari misakiaqa rusandeesamu mandeenoo ani mina qamunna ati kai auqamasoofanoo narí aundurakiqari fidika reereeufa taikanau, narí aurirafa taikaranara narí irinau. 30-31 Yisufa narí faiqí andeeqara afeeka narisaaqari funara iriseenoo faiqí anaasee qambaanai quandafi irammirinau yafee qini qamunna auqeenoo fee qufaqa narí faiqi namu qimamiqa qiqau, moomoosa ani ititafuanakina nanaree anee yafee qini qamunna auqee maqi qidanee moomoosa ititafuanaki fimarinanoo. 32 Yisufa sia misa ufa irinau kaqi randee marinau. 33 Mi anaaseefa narí aurirafa taikoonara iriseenoo aindirireenoo aaquqoofanoo Yisuna aikuki oorindari ani kummaramafufanoo aiqama anoona ufa kai qimaminau. 34-35 Yisufa iriseenoo qimaminoo qinau Oo qini qiraamuna aneenna irirana qinisaa rusimarianafa mifa kai ani andeeqeenoo doo asooaranaki fua ani aurirafa doo taikeenoo.

Miqi qimarufanoo Iairusana maaqaki marusa aniree Iairusana qimamiqau sia ufasaa rakisirana kadaapi arua doo ani araamuna kuqufinoo. 36-37 Yisufa sia misa ufa irinau. Iairusana qimaminoo qinau, Sia rufiaa, qinisaa kai aneenna irirana mundua qimasoofaqa aiqama mina faqa aniusa aiqama Iairusana maaqaki keeqararufanoo Yisufa qaoo qimaseenoo narí faqa Peetooroona faqa Yameesafa faqa mina akaqa Yoohaneefa faqa doo minamusa kai Iairusana faqa nifiqamareenoo Iairusana maaqaki ooru fiqau. 38-39 Misa Iairusana maaqai oonuroofanoo Yisufa faiqí anaasee ikifaafau qirana faqa faaqa fuisee qirana faqa munari minari qirana faqa nindafamaseenoo maaqaki keeqafinoo qimanniminoo qinau. Nanaree munari minari ida fee qikiraqaidee maa faiqifa sia kuqinoo maridanoo faiqaqee idanoo.

40 Misa minara irisee Yisunara naanaidara qimasee uteeti qufanoo Yisufa aiqama niqiqamaseenoo faiqi anaukoo faqa mina aiku asauku qaaramoo faqa maanaaqa kuqiraqoo nifiqee keeqanau. 41-42 Yisufa mi kuqira manaaqana asauku qumareenoo nári ufakiqari kaqikaa manaaqa qinee ani qimamidaqa doo findi fua qimasoofanoo mifa aaqee findifinoo doo ninau. Minaki marusa mina qafamasoofanoo naaquqeenoo naindiri ranau. Mi manaaqafa qisaukuqara taikasee qikunni ooqu qaara aukuana marasoo maanaaqafa marunara naaquqanau. 43 Yisufa afeekaikamasee qimanniminau innee maa manaaqana andeeqaqaunnufana umeeraaqee qimasee quandaki maanaaqara qinau maa manaaqana narana amifanoo naani qimasoofaqa miqimmiqau.