8
Yisufa kaifaa feemu ruisee nimufa.
(Mat 15:32-39)
Yisufa Kariree nammari afainni kaqikaaqoo ooqu marikufaqa faiqí anaasee suqumaree miqoo ani Yisufa maruqoo usufufanoo ufa qimannimimarufanoo qaaramoo faasaanaikufanoo misa narana taikafufanoo Yisufa narí faiqi namu naarama qimanniminoo qinau. Qinee maa fasiqa anaaseesara qimuqusammidaqa qaaramoo faasaana qini faqa mariafanoo maqee doo narana misaindi sia maridanoo. 3-5 Qinee sia narana nimirai kaqi niqiqaanaqa fidaqa aanai kudoosaapee foora, akaqausa nianaindari ani maridaqa qufaqa mina faiqi namu irammiriqa qiqau. Maa aadana maqa maaqanaki maridaqa yai fee narana paqurimandee maa moomoo fasiqa anaaseesa nimana nimianauree qufanoo Yisufa irammirinoo qinau inni feemu naqummee maridanoo fee qufaqa misa moodaannai qisauku dinni ani qaara marasee feemu maridanoo fee qiqau.
6-7 Yisufa faiqí aanaaseera maqasaa aiqama ooqu mariaqee qufaqa aiqama ooqu marifufanoo mi feemuna dinni qisauku taikaseenoo dinni ani qaaraqanda marasee feemu (7) maraseenoo Anutunara dufi dufi qimaseenoo ruqi ruqi maseenoo narí faiqi namu nisaukuki quqasoofaqa aiqama fasiqa anaasee amana kai nimimaree fiqau. Noodaanna kaqikaanauqa akaqana marasee dufi dufi qimaseenoo mina faqa narí faiqi namu nimisoofaqa nimiqau. Aiqamausa neeneesoofanoo nimuaqumminau. Foo tauseenna (4,000) fasiqa anaasee nukudara foora miqoo mariusa nimuaqu inau. 9-10 Misa namammaree soona ataraasa Yisuna faiqi namu dinni taikasee dinni ani qaaraqanda (7) marasee uqa rumasoofanoo Yisufa faiqí anaasee niqiqoofaqa daraanimambufanoo Yisufa narí faiqi namufaqa sipaki akaramafufanoo nammari amuaqumau moo maqa maaqai Daramanuta maqa maaqai finau.
Innaarunai firaa ainaina uqaqifiqaanee qirufa.
(Mat 16:1-4)
11 Miqoo Farisai amaana ufa qimarusa Yisuna faqa raiqara ufa oosana araqau. Misa Yisuna ufaanara foora fufusee aruanifeera qimasee Yisunara faiqí sia auqaaqaa ira ainaina auqamasainaqa maasa aniara kuqaa Anutuna faiqifee qianaura. 12 Miqi qimasoofanoo Yisufa narí aundurai qimiridanoo qinau. Akasaa yairee fee inni manda oosana taikaannoo fee, qimaseenoo akooqoo qimanniminoo qinau, nanaree maqee mariasa mookira ainainara maqee maqee findifinaqa qafaanee qida fee, doo qinee qimannimidaqa sia qinee miqimandee Anutuna afeekara kooroomasee uqannifiqaanauranoo.
Ooruku anoona kikiqa usiranara rufiaaqa.
(Mat 16:5-12)
13-14 Miqi qimasee Yisufa kanuqaki akaramafinoo Kariree nammari amuaqumau dinni afainai fidaqa kaqi kaaqoo nammari qambaana oonuree mina faiqi namu aafaqara aunusoonara moodaa feemu kai marufaqa aiaaee qiqau. 15-16 Yisufa naranara aiaaee qunara iriseenoo moo ainaina kikiqa ususeenoo qimanniminau, Innee amiqimmasee aufariaqa, Farisai amaana ufa qimariasa faqa Eeroodeena faqa minauqa feemu ooruku ati qaranara rufieeqa aufariaqee qufaqa mina faiqi namu iriseeqa tautumasee narí qimami narí qimamiqa qiqau maasa aafaqa sia maree anunnanara mi ufanara Yisufa qidaqinoo fee qiqau. 17 Yisufa faasai misa ufa iriseenoo qimanniminoo qinau. Innee nanaree aafaqa sia marinara narí qimami narí qimami qidee Innee sia fee iridaqee. Inni irirafa kaqi fee ummaara raidanoo fee 18 Innee nifu faqaasa sia fee qafaidee, innee naaqoo faqaasa sia fee iridee. 19 Qinee moodaannai qisauku (5) feemu ruqi ruqimmasee faifa tauseenna (5,000) fasiqa anaasee nimiafannanara sia fee innee naaqooki oonumafi iridee, innee mikari naqumma uqee ataraasa uqariqee iqau, qufaqa misa qiqau qisaukuqara taikasee qikunni ooqu qaara marasee (12) uqa riqiafana. 20 Miqi qimasoofanoo Yisufa kafaa irammirinoo qinau kafaa qinee dinni taikasee dinni ani qaara marasee (7) feemu ruqi ruqimmasee maqi tauseena fasiqa (4,000) sia kasoo fasiqa moomoo fasiqa uqanna nimiafanaqa naqumma uqee mina ataraasa riqee iqau qufaqa misa qiqau dinni taikasee dinni ani qaara marasee (7) uqa riqiafana. 21 Miqi qimasoofanoo Yisufa qimanniminoo qinau. Innee mina qafamasee sia fee qini afeekara iridee. Moodaa feemu marifa doo mina mandee nimiana amanaikammiannoo.
Beetasaida maqannaa Yisufa afu maqaisanau.
22-25 Misa Beetasaida maqusai aniroofaqa faiqí moo afu dimbarana afiqee anireeqa Yisuna aaramaseeqa qiqau, amanee afu dimbarana auqainanoo fee afu maqaannoo fee qufanoo Yisufa mi afu dimbara fasiqana asauku qumareenoo rarisameeqeenoo maqusa aqoosai quqaseenoo aqaara afuki fidiseenoo asaukuqara minasaa rusiseenoo irammiridanoo qinau, anee akaqa ainaina qafaidanee qufanoo mi fasiqafa oori uqeeraseenoo qinau faiqí qini qifusaa saqariara foora nidaqee qufanoo Yisufa kafaa narí asaukuqara mina afusaa quqasoofanoo mi fasiqafa afu maqasoofanoo mina afu amiqufanoo aiqama ainaina amiqimasee qafanau. 26 Yisufa qimaminau doo aneenna maaqai fua sia maqusai faiqí anaasee moomoo mariaqoo fua kaqinni andandandanai fua qufanoo doo finau.
Peetooroofa Yisunara Anutuna asauku mundira fee qinau.
(Mat 16:13-20; Ruk 9:18-21)
27-28 Yisufa narí faiqi namu faqa miqooqari Seesareea Firipi maqusa, mina maqa maaqaki maru maqusanakiaqa finau. Aanai fidanoo narí faiqi namu iranau, innee iriaqa faiqí anaasee qiniara ya fasiqanee fee qidee qufaqa misa qiqau akaqausa aniara Yoohaneefa nammari nimi mari fee qidaqa akaqausa aniara ooqeenaa tamummaqara fasiqa Eeriaa fee qidaqa, akaqausa aniara ooqeenaa tamummaqarausakiqari moo fannoo kuqiranakiqari findifinoo maridanoo fee qidaqa. 29 Miqi qufanoo Yisufa náriara qinau innee qiniara nanee fee qidee qufanoo Peetooroofa qinau anee Anutuna asauku mundirafa mariananoo. 30 Miqi qufanoo Yisufa afeekaikamandee qimanniminau. Doo kuqaa uqanna qiananoo. Sia innee minara qiniara akaqausa qimannimiaqa, umeendaaqa.
Yisufa narí kuquaninnanara qimanniminau.
(Mat 16:21-28; Ruk 9:22-27)
31 Miqi quqooqari narí kuquaninnanara oosana arasee narí faiqi namu qimannimidanoo maaqi qinau. Qinee faiqí nimaaku firaa aupurarana maraanaura. Faiqí firaasa aanaiqikirausa uriqararausa faqa Mooseena sandufa akoofasauqa faqa misa qini minniqisee nikooqaannoo. Misa qini kuqa darusaifanoo qaaramoo faasaana aiqarainanoo Anutufa mara qini findifumaqisaannoo. 32-33 Yisufa akooqoo uqanna narí kuqiranara qimannimunara Peetooroofa irufanoo akooqoonara Yisuna mareeqee aaduma quqaseenoo qaoo qunara Yisufa quandaki narí faiqinamu nindafamaseenoo Peetooroona aqinoo qinau. Oo Peetooroo anee Sadannafa anee see fua, ani irirafa faiqindi maridanoo sia Anutunaindi.
34 Miqi qimaseenoo narí faiqinamu faqa naarama quqaseenoo qimanniminoo qinau, moo fannoo qini faqa fuani qinafa narí maaqoo mariranara minniseenoo qini ufa saara qini daanna ramasee eedoo qimasee kuqiranaki fuannoo. 35 Moo fannoo narí marirana amiqimasee rakisianee qinafa mifa narí marirana kakasiannoo moo fannoo qini saara qini amiqira fasaasa ufa saara kuqarinafa mifa narí marirana asumu maraannoo. 36 Moo fannoo aiqama maqa maaqa rakisiranatia kammafinanoo nariara minakinaa aiqama ainaina maraseenoo narí aunduraindaraana kuridiranaki finoo nana ureeqara fasiqa mariannoo sia uriqararafa mariannoo. 37 Faiqí anaasee kuqufifaqa nana maqasaa taikaaninna ainaina Anutuna amisee naundurakinaana kuridiranakinaana mareeqee asumu mariranakina quqaannoo fee sia amana kaifaa maraannoo. 38 Faiqí anaasee moo fannoo maa maqee maria manda aukuanasaa qiniara faqa qini ufara faqa faiqí nifusaa asaurusee nikooqainausa qinee faiqí nimaaku qeeqa qikoona areenarana namufaqa naaquqara andeeqara qangiroouqa faqa innaarunaindari qumureeqa mi fasiqa anaaseesara faqa qisaurusee qikooqaannoo.