1 Yisufa mariu maqusana minniseenoo Yudeeaa maqa maaqaki ooqu finau. Yooradanna nammari taqamareenoo dinni afainni fufaqa faiqí anaasee moomoosa mifa maruqoo aniroofanoo narí oosana maraseenoo ooqu marifinoo Anutuna fasaasa ufa qimannimimarinau.

2 Farisai amaana ufa qimarusa akaqausa Yisufa maruqoo aniree ufaanara foora fufusee Yisunara minaki aruanifeera maaqi qimasee narikai narí qimami narí qimami qiqau, Maasa faiqí narí anaaqa minnisarana irammirifanoo Yisufa minara aaqara ufa qinaqa mina ummarasee aruanaura. Miqi qimasee akooqoo Yisuna qimamiqau, Oo Yisu maasa Mooseena sandufa faiqí moo fannoo narí anaaqa minnisaranara eedoo qidanoo fee sia fee eedoo qidanoo. 3-4 Miqi qufanoo Yisufa iriseenoo irara ufa kai qimanniminoo qinau Mooseefa minara nana aaquqira ufa qimanniminoo fee qufaqa misa qiqau, Mooseefa nári ninaaqmaaka aqiqara papiqa akara rumeeqee nimiseeqa niqiqaaqee qidanoo. 5 Yisufa mina iriseenoo maaqi qimasee qimanniminau Mooseefa inni irirafa mandaikinara inni nimuqusa sia amaqi marifa ooni miqirafa amatooki marunara iriseenoo akoo akaa maseenoo inniara inneeqa ninaaqmaaka minnisaaqee qinau. 6-8 Ooqai indaaru Anutufa aiqama ainaina auqu quqaqoo aukuana sia miqinoo marinau. Miqoo akee faqaana faqa afaamu faqaana faqa auqu quqanau, miqi maqoonara kai faiqí aiqama narí anoofa akoona minniseenoo narí aanaaqasaa atooqafinanoo moodaafaikamambi marifaranoo minara sia kafaa misa qaaraikamambi marifaranoo moodaafaikamambi marifaranoo. 9 Miqinoo marinara Anutufa atooqaqoo ainaina sia uqanna faiqí rakeeiaqa.

10 Yisufa maaqaki keeqafufaqa mina faiqi namu aniree anaasee minnisaranara qunara iroofanoo mifa qimanniminoo qinau. 11 Faiqí moo fannoo narí anaaqa minnisee moo anaasee marainafa mi indaaruqaa anaaseena mandaikammamaqeenoo narí mi fasiqafa ummuariranaki mariannoo. 12 Miqi kai inoo anaasee moo fannoo narí afaaqi minnisee moo fasiqa marainafa ummuarirana mareenoo miqiannoo.

13 Faiqí anaasee akaqausa nári faiqi aanaaqiuqa nifiqee Yisufa narí asauku faiqi nikiaqasaa quqasee nifaaqooqa nimianifeera nifiqee aniroofaqa Yisuna faiqi namu misa farafara qifoo qimasee niqiqau. 14 Yisufa miquna qafamaseenoo narí faiqi namu aanoommasee qimanniminau. Saina faiqi aanaaqiuqa qinee marunannai aniaqa. Sia misara qaoo qiaqa Anutuna ququsa miqirausaindi marinara sia qaoo qiaqa. 15 Innee maa ainainnara kai irisee sia aunuaqa, faiqí anaasee moo fannoo sia kaqikaa faiqi naanna ramasee Anutuna ququsa marainafa naaru naaru mariranaki sia uqanna keeqeefaranoo. 16 Yisufa miqi qimasee narí faiqi namu qimannimiseenoo faiqi aanaaqiuqa oonumafi aripimma qumareenoo aiqamausasaa asauku quqaseenoo nifaaqooqa qinau.

17 Yisufa moosaa fidanoo aanai fimarufanoo faiqí moo fannoo afaqanoo fifiufanoo aanai oonu Yisuna paqurimandeenoo mina oorinni oonu aqoori saunara fufanoo qimaminau Oo amiqira andeeqara ufasaa rakisirafa nana kadaapi fee Anutuna rumamaqaananoo fee naaru marirana qimiannoo fee. 18 Miqi qufanoo Yisufa qinau anee nanaree qiniara amiqira fee qidanee. Sia moo andeeqarafa maridanoo Anutufa kai andeeqarafa maridanoo. 19 Anee Mooseena sandufa irimariananoo mi sandufafa maaqi qidanoo sia anee faiqí anaasee moodaa faqa kuqarua sia anaasee ummuaria sia ainaina ummuaria sia siaasinnai oonu moonara unnufa qia, sia moosa ainainara amuqusinana unnaqimasee maraa, aneenna anoofa akoonara amiqimasee ufa qimasee misa nuqu uqeeraa. 20 Miqi qimasoofanoo mi fasiqafa Yisuna qimaminoo qinau, Oo ufasaa rakisirafa qinee ooqai faiqisaa mi ufana iriisee mi mau fimarunausa maridaqa.

21-22 Mi fasiqafa miqi qufanoo Yisufa minara aidufanoo andeeqasee mi fasiqana oori qafamasee qinau. Anee moodaa ainainara kai sia auqaananoo. Anee aneenna ainaina aiqama marasee faiqí akaqausa nimisee minasaa munnimma maraseenana kudi fasiqausa nimisainanoo ani qumiasana ani afeesara innaarunai mariannoo, miqinana doo ania, doo qini faqa aniree fua qufanoo mi fasiqafa mina iriseenoo narí moomoo ainaina marunara amuqusufanoo oori runusee finau.

23 Mifa fufanoo Yisufa quandakinoo narí faiqi namu qimanniminoo qinau, ainaina moomoo faqaasa Anutuna ququsaki keeqaranara anuqifaranoo. 24 Yisuna faiqi namu ainaina faqaasa innaarunai fifaranoo fee qiqiusa mi ufana iriseeqa tautufanoo Yisufa kafaa qimanniminoo qinau. Oo qini faiqi namu Anutuna ququsaki keeqaranara kadaapiri mariafa maridanoo. 25 Kameera qoosa fooqaa aandau uka aamarai keeqarara anuquannoo, ainaina faqaasa Anutuna ququsaki keeqaranara fiqaramasee anuqaa mareefaranoo. 26 Yisuna faiqi namu mina irisee firaaqoo tautumafufaqa naaquqoofaqa narí qimami narí qimamiqau, Ainaina faqaasa sia innaarunai fifaqa yafee asumu mariranaki fuannoo fee sia moo fannoo amanaikiannoo. 27 Yisufa mina iriseenoo andeeqasee misa noori qafamaseenoo qimanniminoo qinau. Mi ainainna sia faiqí amanaikimari ainainafa maridanoo Anutufa kai amana aiqama ainaina amanaiki marifa maridanoo.

28 Peetooroofa mina iriseenoo Yisuna qimaminau. Qafa, maasa aiqama ainaina quqaseeqa kaqi samu uqanna ani faqa fidaqa qufanoo Yisufa narí qimaminoo qinau. 29-30 Kuqaa qiananoo, qinee maa ainainnara faqa qimannimidaqa moo fannoo qiniara faqa qini amiqira fasaasufara faqa narí maaqa fee narí akaqaafasaa fee narí asookinee narí anoonee narí akoonee narí faiqi namu fee narí maqa maaqa fee minauqa minnisainafa mifa maqee maria kamuqoo moomoo maraannoo. Maaqauqa faqa akaqaafasaauqa faqa asoommaaka faqa anausa faqa faiqi namu faqa maqa maaqa faqa moomoo fiqaramasee firaaqoo maraannoo, qini ufasaara arirana faqa maraannoo. Maqee kamu miqimasee maraannoo naaru anianinna kamuqoo naaru asumu marirana faqa maraannoo. 31 Maqee maria kamuqoo moomoo uriqararausa kasooqaqee innaarunai ureeqarausa marifaranoo. Maqee maria kamuqoo moomoo ureeqarausa misa kasooqaqee innaarunai uriqararausai kifaranoo.

32 Yisufa narí faiqi namu faqa Yeerusareenni ooru fidanoo indaaru fufaqa mina faiqi namu mina aanaaqiana ooru fidaqa Yeerusareenni faiqí firaasa Yisuna ariraree qimaru ufana nári iriaqeeida rufia rufiammiqa ooru fimariqau. Faiqí anaasee namufaqa ooru fusa misa faqa nimukee marufaqa ooru fiqau. Ooru fidanoo narí faiqi namu qisaukuqara taikasee qikunni ooqu qaara mararausa naaduma mara quqasee nariki kambiqaaninna oosannara narí kuquaninnanara qimanniminoo qinau. 33 Innee iriaqa maasa Yeerusaree maqusai ooru raanaqa faiqí misa faiqí nimaaku qini qumare̱eqeeqa amaana maqasaa aanaiqikirausa uriqararausa faqa Mooseena sandufa akoofasauqa faqa misauqa nisaukuki qini quqeefaranoo. Misauqa qiniara ufa qimaseeqa kuqiranaki qini mara quqaseeqa miqooqari mareeqee aanaamuru nisaukuki quqeefaranoo. 34 Anaamuru qini mara quqaseeqa ataasa ataasa qima qimaqaidaqa niqaara qini qifaaqai fidisaida qini qummairi qima qasaida, uaiaqa samu qumaree qini firaaqoo qini qifaaqa ateekeesee kuqa darifaranoo. Qaaramoo faasaana aiqarainanoo Anutufa qini mara findi fuannoo.

35-37 Seebeedina amaakuqara Yameesasa Yoohaneesa Yisufa maruqoo anireeqa qiqau. Oo ufasaa rakisirafa moodaa ainaina maasa aniara qimiannee qianauree qufanoo Yisufa nana ainainee qufaqa misa qiqau, anee aneenna areenarana innaaruna ququsaki keeqafina aneenna qaarisaa ooqumari finaqa maaqanda ani aaqa moo fannoo dinni moo fannoo dinni amanee ani aaqa uqanna ani afaaqasaa aqoondi kammafi fee maaqanda faqa uriqararausaikiqa marianauree, qufanoo Yisufa qimanniminoo qinau. 38 Innee inneeqa iraa ainainara sia irimariafanoo fifau faafaummi mariafanoo. Qinee manda nammari naannana innee faqa amanee neefaree. Qinee kuqira nammariki ruanaqa innee faqee amanee rifaree qufaqa miqanda qiqau amana maaqanda ruanauree qufanoo 39 Yisufa qinau Inneeqara kuqaa qini manda kuqira nammari neefaranoo, qini kuqira nammari rumaqimaqee fandinnana inneeqara faqa rifaranoo. 40 Qini daaqa uqanna qini qifaaqasaa qiqoondi innaaruna ququsaki dinni dinni ooqu marirafa sia qinindi, Anutufa akaqausaree qimasee deedaqamaqoosa mifa kai misa nimiannoo.

41 Yameesasa Yoohaneesa mi ufana ooru Yisunara iroonara akaqausa qisaukuqara fasiqa mina iriseeqa miqandara aanoo iqau. 42 Yisufa mina iriseenoo aiqamausa naarama narí unnai quqaseenoo qimanniminau, innee maa maqasaaqaraasa oosana irimariafanoo faiqí misara uriqararausee qimariasa nári aanoonnai faiqí anaasee kaiqeesara rakisi nimaqee mariasa. Misa uriqararausa ureeqarausara amiqimmasee misa uriaaqarama nimaqaidaqa. 43 Misa oosana miqimminoo maridanoo Inniki sia miqinoo mariannoo, Inniki moo fannoo uriqararafaikiraree qimarifa mifa aiqamausa dadaaqidanoo amiqira saika faqa nikooqeemari saikana faqa dadaaqamannimaqee marifa mariannoo. 44 Innikiqari moo fannoo narí kai indaaru nikiaqaikianee qinafa mifa narí kai eedoo qimasee aiqamausa dadaaqira karabusa saiki marifara foora aiqamausa dadaaqidanoo miqi marifa mariannoo. 45 Innee qini qiqafaaqa, qinee faiqí nimaaku sia faiqí anaasee qini ainaina maqimaqaaqeerau qumuafanausau maridaqau, qinee faiqí anaasee moomoosa ainainamma nimaqaseeqa misa Anutuna nariranakiqari feefauriraree qimasee qeeqa marirana misara kuqiranaki quqarara qumidaqa.

46 Yeerikoo maqusa Yooradanna nammari dinni afainni afaasasaa maridanoo. Yisufa Yeerusaree maqusai ooru fidanoo fiquakufanoo Yeerikoo maqusai aniranau. Miqooqari findifi narí faiqi namufaqa faiqí anaasee moomoosa faqa ooru fida maqusa atinni aanasaa ooru qafoofanoo aanai faiqí moo afu qimbarana mina auqu Baratimaeeusafa Timaeeusana amaaku fannoo nári oosana marasee miqimarusa aanasaa maridanoo faiqí anaasee fiqaree aiqaree imarusara narana maree maria munnimmara innaaru qimarufa marinau.

47-50 Mi afu imbara fasiqafa Yisunara Nasareeteendaraa fasiqa animariifoo qufanoo kafaa kafaa faaqa quqasaida nammeera maaqi qimasaida nammeera qimarinau. Oo Yisufa Dafidina ati marianafa anee qiniara irinanoo amuqusinana dadaaqia qufaqa moomoosa mina aqiqa qiqau doo ufasaa farafara qia qufanoo mi fasiqafa misa quna irinoo sia minnisanau misa aqurareeqee firaaqoo ambufuamufanoo firaaqoo faaqa quqaidanoo maaqi qinau, Oo Yisufa Dafidina ati marianafa anee qiniara irinanoo amuqusinana dadaaqia. Yisufa mina iriseenoo aanasaa kasoomambinoo qinau aaraifanoo aniani qufaqa misa qimamiqa qiqau. Doo asasia Yisufa aniara aniannee qidanoo qufanoo afu qimbarafa mina iriseenoo narí qamunna akuqoona mi saqanna afaqimma aquseenoo doo findi finoo Yisufinnai finau. 51-52 Oonuroofanoo Yisufa irammirinoo qinau. Anee qiniara naqimaqisaanifee fee q inanee qufanoo afu qimbarafa qinau. Oo ufasaa rakisirafa anee kaifaa qifu maqa qisaanneera qidaqa qufanoo Yisufa qimaminoo qinau. Doo fua ani aundura qinisaa rusirafa doo ani andeeqamaqanoo maridanoo. Miqi qufanoo doo aaqee uqanna mi fasiqana afu qimbarafa maqafufanoo doo Yisuna faqa aanai finau.