1 Oo qini faiqi namu inneeqa nikausa qini naamuaqira ufasaa irirana rusisee oonumafi irira oosana mareefaranoo.

2 Qinee qimannimianna ufafa amiqira ufa maridanoo. Minara aiqama aiqamara iria.

3 Qinee faqa ooqai kaqikaa faiqi mariaafanausa maridaqa. Qinee qeeqa qinaukoo moodaa faiqi mariaafanausa maridaqa.

4 Qini qikoofa maaqi qimasee qini qimaqiminau. Qinee qimamianna ufana sia qaunua aiqama kari iria. Qinee auqaannee qianna ainaina auqeenana sia kuqinnaranoo.

5 Anee amiqira iriranara faqa oonumafi iriranara faqa randasee maraa. Qinee qimamianna ufana sia irisee qaunua.

6 Sia amiqira irirana minnisaa minara rinanoo ani faqa maridanoo mifa anisaa rakisiannoo. Anee minara rinanoo mifa anisaa itita amaqaannoo.

7 Irirafa kuqaa firaa ainaina maridanoo mina kai randasee maraa. Anee nana oosana oosana ainainee maraseenana oonumafi irirana sia aunua mina faqa maraa.

8 Anee amiqira iriranara aidinana rakisi qumarainanoo mifa ani firaa auqu amiannoo. Anee irirana oonumafi rakisi qumarainanoo ani auquara naaquqarana faqa qeerairirana faqa nimiannoo.

9 Anee irirana marasainanoo ani aqinaaqa amiqira faini afaira foora mariannoo. Mifa uriqararausa qafeera foora ani akiiqa afisu amaqanoo mariannoo.

10 Oo qini qimaaku anee oori kandamasee qini ufa irisainanoo ani marirafa kisaaqasaa mariannoo.

11 Qinee amiqira iriramau fimaria aanna aamuaqi marunausa maridaqa.

12 Anee mimau finanoo sia moo ainaina fannoo ani aana ititaannoo. Anee mimau finana sia aiku rupaurinnaranoo.

13 Anee aamuaqira ufa rakisi qumaraa. Sia uqaa. Aneenna ufa minasaa atukarama qaina mariani ani marirafa maridanoo.

14 Aaqee mariasa fimaria aatata sia fua. Sia manda oosana maree mariasa naanna raa.

15 Anee misa aatata faqa sia fua. Minniseenana aneenna aatata kai fua.

16 Mandoosana maree mariasa akaqausa mareeqee sia nári mandoosanaki uqaseeqa sia maqasaa faiqeefaranoo. Misa akaqausa rarisameeqee minaki uqaseeqa maqasaa faiqeefaranoo.

17 Misa manda oosana faqa faiqí kuqa narirafa faqa misa narana nammariara foora maridanoo.

18 Andeeqarausa nimari aanafa kaaqa qara aana uqanna maridanoo.

19 Manda oosana maree mariasa aana asukuna miqirafa maridanoo. Misa nanasee fee niku amaki saamrida fee, sia qafaidaqa.

20 Oo qini qimaaku amiqimmasee qinee qunna ufana iria. Qini ufa amiqimmasee iria.

21 Sia amiqira irirana minnisaina fuani. Aneenna amuqusaki quqasaina mariani.

22 Amiqira irirafa faqa oonumafi irirana faqa sia kuqirana faqa nifaaqa amiqi amiqirana faqa nimidanoo.

23 Maa firaa ainainnara qimamianaura. Aneenna amuqusasaa rakisia. Aiqama marirana oosana amuqusaki qari ururaidanoo minara aneenna amuqusa amiqimmaseenana rakisia.

24 Sia unna ufa qia. Unna ufa faqa eendaandira oosanrafa faqa sia qia.

25 Aneenna firaree qinnaqoo amiqimmasee aiuqummasee kuqaa qimaseenana fua. Sia aneenna akiiqa asauriranaki quqaa.

26 Aneenna nimarianna aannana andeeqasainanoo amiqinoo marinana nua.

27 Anee aneenna aatata fidana sia dinni quandee dinni quandee ia. Andeeqasee manda oosanara qeerairammasee ani aiku fannoo ani aatata kai fuani.