8
1 Iriaqa, amiqira irirafa irirana faqaa aanaaseera foora nammeera qidanoo. Oonumafi irirafa dadaaqinoo firaaqoo naaraidanoo.
2 Amiqira irirafa aaqana namusaa fee aanasaa fee aana kindooraki fee kikiqinoo maridanoo nammeera qidanoo.
3 Maaqusa kooqiki fee maqusa atinni fee kikiqinoo maridanoo maaqi qimasee nammeera qidanoo.
4 Inni aiqamausa qimannimidaqa, inni aiqama maa maqa maaqana saaqaraasa naaraidaqa.
5 Innee irirana siaisa irirana maraaqa. Furufarirausa inneeqa furufarirana kiqari nifu maqasaa qafamasee iriaqa.
6 Qini amiqira ufa iriaqa, aiqama qinee qimannimi marunna ufafa kuqaa kai maridanoo.
7 Qinee qimarunna ufafa kuqaa anoona maridanoo. Qinee unna ufara fidiaqaa midaqa.
8 Qini aiqama ufa kuqaa kai maridanoo. Sia unna qirafa faqa eendaandirafa faqa minaki maridanoo.
9 Irirana faqaafa qini ufara aiqama iriannoo kaaqa qara ufa fee qiannoo. Irirana faqaasa qini ufara kuqaa anoonee qifaranoo.
10 Innee siruaa minnisee qini naakaparanara amiqira ainainee qimasee maraaqa. Innee koora munnimmara rimariana minnisaaqa, irirafa mifa naaru naaru marirafa maridanoo mina maraaqa.
11 Qinee amiqira irirausa maridaqa qinee nifaaqa auqi maria amiqira ainainausa faqa uriaqararausa maridaqa. Sia moo ainaina innee rimariafa qini qimana maridanoo.
12 Qinee irirausa ufa raina nimaqarana akausa maridaqa. Qinee irirausa akooqoo irirana auqi marunausa maridaqa.
13 Yaaweenara qeerairida mina ufa qaindusiraree qimasee manda oosanara fidiaqaa ia. Qinee ramoo ramaa iranara faqa nári nuqu uqeerara oosanara faqa manda oosanara faqa unnufa qiranara faqa fidiaqaamidaqa.
14 Qinee ainaina auqararee qimasee qeeqa iriranaki qima irisee auqaanaura. Qinee oonu mafi irirana faqaasa maridaqa qinee afeeka maridaqa.
15 Qinee uriqararausa faqa rakisirausa faqa dadaaqunaqa amiqira irirana qimasee maqa maaqaki rakisi nimaqaidaqa.
16 Aiqama maa maqanasaa qaraa rakisirausa qini dadaaqirananoo rakisi nimaqaidaqa. Uriqararausa miqi kai idaqa.
17 Qiniara rimariasara qinee faqa misara ridaqa. Nimudaanai qimasee qiniara randee mariasa misa qini paqurifaranoo.
18 Qinee moomoo munnimma faqa uriqarara auqu faqa uaqeeidaqa nimianaura. Aiqama ainaina auqainafa anoona kambiqarana faqa reemindeemirirana faqa nimianaura.
19 Qini ainaina maraafa koora uraaqararafa maridanoo. Mina amiqirafa kaaqa amiqira siruaa faqa uriaqararafa maridanoo.
20 Qinee andeeqara aatata kai fidaqa. Qinee ufa amana amana kai raina nimaqara aatata fidaqa.
21 Qiniara rimariasa moomoo qumiasana nimidaqa misa maaqaki qumiasana qumbiqannisaidaqa.
22 Ooqai Yaaweefa aiqama ainaina auquanee qimaseenoo qini irirana naaree auqinau.
23 Ooqai uqanna aiqama ainaina sia auquqoo qini irirausa naaree auqinau. Maa maqa maaqana sia auquaqee idanoo qini naaree auqinau.
24 Ooqai ooruku nammari sia maruqoo qinee naaree kambiqaafanausa maridaqa. Maqakiqari nammariuqa sia ururee marufaqa qinee naaree kambiqaqiafana.
25 Aaqanauqa faqa amuaqu namuqa faqa sia maruqoo qinee naaree kambiqaafanausa maridaqa.
26 Yaaweefa maqa maaqa faqa kookoomma faqa sia auqu aukuana qinee irirausa naaree mariafanausa maridaqa.
27 Qinee faqa mariafananoo Yaaweefa innaaruna auqu quqanau. Qinee faqa mariafananoo Yaaweefa ooruku nammari fiqufiqumma auqu quqanau.
28 Qinee faqa mariafananoo Yaaweefa oonnamu auqu quqanau. Qinee faqa mariafananoo Yaaweefa ooruku nammari maqakiqari ururee maruna auqu quqanau.
29 Qinee irirausa Yaaweena faqa mariafananoo Yaaweefa ooruku nammari mandiranara maa oosirana amana kai mandiannee qufanoo miqinninau. Qinee faqa mariafananoo Yaaweefa maa maqana maaqa atunara foora rakiasoofanoo maridanoo.
30 Yaaweefa mi ainainausa auqi marufaqa qinee amiqira irirausa mina aaqa faiqi aanaaqiara foora mariaafanausa maridaqa. Qinee mina afusaa maridaqa aiqama kari asasirana amimariqiafana.
31 Aiqama maqa maaqai asasiqa niniaafanausa maridaqa. Qinee faiqí faiqi faqa asasiqa niniaafanausa maridaqa.
32 Doo maqee kumaaraa fasiqa anaasee qini ufa iriaqa. Qinee qiannandee iqa innee asasifaranoo.
33 Innee qini naakapara ufa iriaqa, sia minnisaaqa. Iriseeqa irirana faqaasa mariaqa.
34 Qini ufa irimariasa asasifaranoo. Qini kooqiki aiqama kari mariasa faqa eeqá maaqai fimarunna aanna afainni maridaqa qiniara rakisi mariasa asasifaranoo.
35 Faiqí moo fannoo qini irirausa paqurinafa kaqi marirana faqa paquriannoo.
36 Faiqí qini irirausara sia randee mariasa nariqa kai nariqa mandaikamma nimaqaidaqa. Qini irirausara fidiaqaa imariasa kuqiranara nididanoo.