22
1 Andeeqara auqu amirafa moomoo ainaina faqa munnimma faqa uriqararafa maridanoo. Siruaa faqa koora faqa ureeqarafa maridanoo.
2 Ainaina faqaafa faqa kudi faqa amanaqarakai maridaqa. Yaweefa miqanda auqu quqanau.
3 Irirana faqaafa moo ummaara anifanoo qafeenoo amaanaidanoo. Irirana siaifa kaqi minaki fidanoo mi ummaarana maraidanoo.
4 Yaaweena ufa mau fidana aneenna mara maree quminana moomoo qumiasana munnimma faqa uriqarara auqu maraseenana kisaaqasaa marinnaranoo.
5 Aneenna mariranara amuqusinana anee manda oosana maree mariasa nári aatata fidaqa arimaria ufaannaki aruanoo qimasee rufia.
6 Faiqi aanaaqisaa amiqira aana aamuaqinanoo mifa faiqí firaanaikinoo mimau kai fuani.
7 Kudi fasiqa fannoo ainaina faqaana ainainira faiqi maridanoo. Dinnaa munnimma maree marifa munnimma nimi marina ainainira faiqi maridanoo.
8 Anee unnaqira oosana ummaqusainanoo mandainaina minakiqari kambiqa finoo quandaki ani aruannoo. Anee sia kaifaa faiqí mandaikamma nimaqeennaranoo.
9 Afaarinana aneenna narana kudi fasiqauqa naiad nimia. Miqinana anee amiqi amiqirana mareennaranoo.
10 Andeeqara oosanara fidiaqaa imari fasiqana mara aqusainanoo aanooqirafa faqa rairai qirafa faqa taikaannoo.
11 Anee anukara amuqusara faqa amiqira ufa qiranara faqa rinanoo maqasaa ani uriqarafa ani aqoondi mariannoo.
12 Yaaweefa amiqira iriranara faqa anoona ufa qiranara faqa rakisida nindafaida maridanoo. Unna qimariasa ufa Yaaweefa akooqoo kooroomma sainaqa aiqamausa irifaranoo.
13 Ainainirara raindaani marifa maaqaki ooqufaaqee maridanoo fifau unna qimasee kaasau faini madaanai marida ooquraana daruandoo qimasee maaqaki kai maridanoo.
14 Aatata nimari anaaseena maraqa nirafa ufaanara foora maridanoo. Yaaweefa arana qeemarisa mi ufaannanaki aridaqa.
15 Faiqi aanaaqiuqa furufarammasee nári aatata fifana unnaana samu narinanoo misa furufarirafa taikaannoo.
16 Ani ainaina moomoo kianifeera kudi fasiqauqa mandaikamma nimaqeenana kafaa ainaina moomoo faqaana munnimma aminana anee faqa kudi marinnaranoo. Moodaa fasiqa aiku asauku taikasee moo fasiqa asauku qara taikasee 30 irirana faqaa ufa.
17 Irirana faqaasa ufa qimannimiana iriaqa. Misa qimannimira ufa amiqimmasee iriaqa.
18 Mi ufafa ani iriranaki marinana afaurusaaqari moona qimamidana asasia.
19 Yaaweena saqarikiaqeera maa ufana inni qimannimidaqa.
20 Qinee moodaa fasiqa aiku asauku taikasee moo fasiqa asaukuqara oonu marasee 30 amiqira naamuaqira ufa faqa irirana faqa akara ruma nimaqeeqa.
21 Miqimmasee anee anoona ufara amiqimmasee irinnaranoo. Faiqí aniara anoona ufara randaannee qifana anee amiqimmasee paqurimmasee qimanniminaranoo.
22 Sia kudi fasiqeee qimasee mina ainaina kaqi maraa. Sia kootaki mina rafaaqafua.
23 Yaaweefa kudi fasiqa dadaaqinoo misa ufa iriannoo. Misa mandaikamma nimaqainausa nariqa faqa mandaikamma nimaqaannoo.
24 Anee sia qusufa qimasee kai kaqi aanoo qimari fasiqana aqoondikia.
25 Anee mina oosana irisee sia amana mi oosanna minniseennaranoo, arinnaranoo.
26 Moo fannoo ufaasu munnimma maraseenoo sia amana mina akiiqara feefauru iraree qinana sia anee amana aiqamasee mina akiiqara ianauree qia.
27 Anee faqa mina akiiqara sia amanaikinana sia feefauru niminaqa misa aniree ani aiqama ainaina marasee faiqara qaari faqa mareefaranoo.
28 Inni nikeeku nikaaku ooqai maqa oosummaqoona sia rapatutumma mafisaa.
29 Amiqira ainaina imarifa karaambaiqa ainainiranaki mariannoo. Miqira fasiqa fannoo sia oorudupira fasiqa auqu siaina ainainira faiqikiannoo.