1 Furufarira fasiqa mareeqee uriqararafaikinanoo sia andeeqaannoo. Suani aukuana aaku riara foora midanoo. Nandi aiqira aukuana aaku rindee midanoo.

2 Aaqarana siai fasiqafa unna qimasee aqurarainna ufafa sia mina qumaraannoo. Mi ufafa ufiniara foora kaqi aqanoo oonuree aniree inoo nidanoo, sia saqariasaa uqaidanoo.

3 Qoosa sana samu aridaqa. Qainna doonki ooki quqasee mi sanda atina qumaraafanoo nifiqee fidanoo. Miqi kai iqa furufari mari fasiqana unnaanna samu arinanoo iriannoo.

4 Sia anee furufarira fasiqa fannoo ani manda ufara irainana mina faqa ufa qia. Ani faqa mi furufarirafa aaku finana miqinafaara.

5 Furufarira fasiqa fannoo furufarira ufa ani qimaminana anee mina ufa rukiasee saa manda ufa qiaanoo qia. Anee sia miqinanoo mifa nariara irirana faqaasee qinoo narí amooqiandoora.

6 Anee furufarira fasiqa moo ufara aiqeenana aneenna aiku ateekeera foora innaranoo. Anee ummaarara randee mariananoo.

7 Furufarira fasiqa ookiqari irirausa ufa qinafa sia mi ufafa narí dadaaqiannoo, aiku mandaikirafara foora maridanoo.

8 Anee futufeetiki ooni quqasee aqusainanoo sia mariannoo fuannoo. Anee furufarira fasiqa mareeqee uriqararanaika masainanoo futufeetikiara foora aqinnaranoo.

9 Faiqí moo biaqa nammari amiqimma namasainnana amukafaqaa ainaina asaukuki quqasainanoo kaqi qumarainanoo asauku tapooqainanoo sia iriannoo. Anee irirana faqaasa ufa furufarira fasiqa qiaminanoo mifa miqi kai inoo narí afaaqa aruannoo.

10 Faiqí moo fannoo furufarira fasiqa fee kaqi nimari fasiqanee mareeqee narí ainainiranaki quqainafa aiqamausa naridanoora foora idanoo.

11 Furufarira fasiqa fannoo ooqai furufarira ainaina auqeeundee inoo kaifaa auqaidanoo. Fainiara foora fidisee quandafi kaifaa naidanoo.

12 Furufarira fasiqa kaqikaaqoo amanaikianoo. Nariara irirana faqaasee qimarifa sia amnaikiannoo. Furufarira fasiqa ooreeqarafa uqanna maridanoo.

13 Ainainirara raindaanimari fasiqana unna irirafa maaqimminoo maridanoo. Kaasau faini aanai maridanoo kaaqa ukaqee marifa marifaqa daruandooree qidanoo sia ainainai fidanoo.

14 Ainainirara raindaanimarifa narí qaarisaa faiaqeeidanoo quanda qaandida maridanoo. Mifa kooqi qainnara foora quanda qaandida maridanoo.

15 Kudoosaapee marifa narana mareeqee ooki quqarara akooqaidanoo.

16 Ainainirara raindaani marifa narí iriranara uriqarara fee qidanoo. Qisauku dinni taikasee dinni qaaa marasee (7) irirana faqaasa irirana urinnaaqaraqa maridaqee qidanoo.

17 Sia tinooriranaki aqufua. Anee miqinana faini aaqoora foora qumarainanoo ukaqa amiannoo.

18-19 Faiqí moo fannoo unna qinanoo moo fannoo kuqaamifoora mandainainaki aqufuannoo. Aqufifanoo mifa maaqi qiannoo oo qinee fifau unna qiqa uteeti qunnanara anee mandainainaki aqufuananoofee qiannoo. Miqi mari furufarira fasiqafa ida qeemari duru feefana indaamma uqirafa nidanoo narinaa nidanoo.

20 Ida ati taikaifanoo doo ida imbaidanoo. Munuqi miniqirufa miqi kai inoo taikainanoo aanoo qirafa taikaannoo.

21 Ida kudima idaunisaa quqasainanoo dauni atooqafinoo qaannoo. Ida aadana faqa idaki quqasainanoo firaaqoo qaannoo. Manda ainaina oosana areemarifa ummaara kambiqaani feera miqidanoo.

22 Munuqi miniqirufa fannoo adiaafaa ira narana miqirafa mina aranandaki maridanoo.

23 Amiqira ufa qimari fasiqafa aundurai mandaikirafa maridanoo, mi fasiqafa qafee miqirafa apatasaa anukarafa akara faqaafa aundurai kudima arirafa maridanoo.

24 Qaara irirana mau fimarina ufa fannoo amiqirafa maridanoo. Aundurakiqari nikaru qidanoo miqidanoo.

25 Mi fasiqafa amiqira ufa ani qimaminana sia mina ufa iria. Mina aunduraki manda ufa oosana oosana qumbiqanoo maridanoo.

26 Mi fasiqafa narí fidiaqaa ira mandufa amiqira ufannai dadapaani maseenoo mimau amiqi amiqi marinaqa aiqamausa mifa manda ainaina auqee marina qafeearanoo.

27 Faiqí moo fannoo madika indufuseenoo moo fannoo minaki aqufuani fee qimarifa narí aqufidanoo. Faiqí moo fannoo oonitia umbaqi aminanoo moo fasiqa aruani fee qifanoo oonu aruakinanoo narí aruannoo.

28 Unna qimari afaurufa kuqaa anoona ufara fidiaqaa midanoo. Unna qimasee amiqi amiqi marifa mifa mandaikamma nimaqaidanoo.