61
Isaraee maqannaasa Anutufa dadaaqianifeera innaaru quu ufafa.
1 Oo Anutu, qini iki raqarana iria, qini innaaru qiranara aaqoo rammatinia.
2 Qinee moo maqa maaqai nianai oonu marunanoo
qini qimuqusa mandaikimarifaqa ani aaraidaqa.
Anee qini mareeqee afeeka kukeeqara maqusaki quqaqisaina asumu maria.
3 Nnaree anee qini faandaamurara foora qini ititaqimaqee marianafa mariananoo.
Anee qini faandaamura marianaqa namuqaa sia amana qini rafaaqafifaranoo.
4 Qinee naaru naaru ani uriqarara naaquqara uiqaana maqaki marirara dididanoo.
Ani aqoosa ameemaanaira foora mandaaqaanauree qidaqa.
5 Oo Anutu, qinee qima afeekaikira ufa ani
qimamiafannanara anee irimmariananoo.
Anee iriseenana ani auquara rufiee mariasa nimiraree
qianna ainainna qini Dafidisa faqa qimiananoo.
6 Qinee Isaraee maqannaa karaambaiqa marunausa Anutu anee qini aukuana moomoo ootupamasainaqa qeeqa qinaiqimara qisaifaqausa nindafaanaura.
7 Oo Anutu anee qiniara naaruara qini qifusaa maridana Isaraee maqannaasa rakisi nimaqaannee qia.
Anee aneenna amuqusirana faqa aneenna mapukusee marira oosanannoo faqa ititaqimaqaa.
8 Miqimarinaqa qinee naaru naaru ani auquara amooqira idi raanaura.
Qinee ooqai aiqama faasaana ani amianauree qimasee qima afeekaika maqaafannamau fuanaura.