1-2 Quqaumu miqi qimasoofanoo qangiroo moo fannoo narí ufireena fuaqanau. Fuaqasoofaqa qinee Yoohaneesa qafaafananoo fasau moo innaarunaindari maqasaa aqufufa findifufanoo moo fannoo maqa ameemaanai madika mina kooqi kiqa amufanoo mi fasaufa faiqiara foora findifinoo madika kooqi atuasoofanoo idamuna moomoo firaa idamunara foora minakiqari ururanau. Urureenoo innaaruna faqa suani afu faqa aiqama ititafinau. 3 Mi idamunnanakiqari pandaaqa moomoo qumureenoo maqasaa aqufiqau. Misa farukara foora naruaqeera Anutufa quqanau.

4 Pandaaqa kaaqa andanda saqari amanee neemarusa marufanoo Anutufa minara qaoo qimaseenoo faiqí kai naruaqee qufaqa miqimiqau. Sia aiqama fasiqa anaasee naruaqee qinau. Anutuna akara niqinaaqa marinausa sia naruaqee qinau. 5 Mi pandaaqausara faiqí kuqa nariranara qaoo qinau, kaqi aupurarana kai moodaannai qisauku quqoonasaa aupurarana firaana nimiaqee qinau. Mi pandaaqausa narirafa faruka naruqoofanoora foora nidafi marinau. 6 Moodaannai qisauku quqoonasaa pandaaqa marinnakamuqoo faiqí anaasee kuqiranara randaida sia kuqifara aupuree marifanoo kuqirafa adeediramafinanoo doo miqoo taikasee fuannoo.

7 Mi pandaaqausa rakiranaki nimaru qoosausara foora mariqau. Misa nikiaqa koora auqira qafeera foora marinau, misa noori faiqí noori fooqaasa mariqau. 8-9 Misa nikiaqa asausi misisausa nikiaqara foora kisaaqandauqa marinau, misa nifai raioonara foora firaa nifai kisaaqa marinau. Misa nimuqusa rafaaqafirafa qainnara foora marinau, misa niqoosa ufa fannoo faiqí moomoosa sandaafanoo maqa ririqindee qimarinau. 10 Misa nimeesa ati fannoo farukara foora faiqí raquru nimimarinau. Doo minannai faiqí anaasee moodaannai qisauku quqoonasaa aupurarana nimifaranoo. 11 Misa saideenna uriqararafa maqa ameemaanai madika rakisirafa uriqararafa maridanoo. Yuda maqannaasa ufakiqari moo nuqu Heeburu ufakiqari mina auqu Abadoonnee qimariqau. Kirisa ufakiqari Apoorioonee qimariqau. Mi auquna oosana aiqama ainaina kuridi marinee qimariqau.

12 Doo miqinoo indaaruqaa mandainaina taikanau. Qaaraqanda kaqi maridanoo.

13-14 Pandaaqa taikafufanoo qangiroo moo fannoo narí ufireena fuaqanau. Fuaqasoofaqa qinee Yoohaneesa iriafananoo koora auqira qainda Anutuna afusaa marunakiqari ufa moo qufaqa iriqiafana. Mi ufafa koora auqira qainda aannai qaara faqa qaara faqa marunakiqari kambiqafinoo ufireena fuaqoo qangiroona qimaminoo qinau. Eeufarateesa nammariki qangiroo qaara faqa qaara faqa faiqí kuridi maria qangiroo namusa rumbaqa mariasa idukunnisaa. 15 Idukunnisoofaqa maqasaaqaraa fasiqa anaasee qaaramoosaa oosuseenoo qaaraqandaki kaqi quqasee moodaaki aiqama naru taikaqau dinni ati firaaqoo kaqi quqanau. Anutufa ooqaindari misa deedaqamma nimufaqa mi aukuanna mi quqoona suaninasaa deedaqamma nimiqoosa nári rakira faiqiuqa faqa mi qangiroo namusa faiqí anaasee moomoo uqanna naru taikaqau. 16 Mi qangiroo namu marusa rakira faiqiuqa tu handareta mirioona marufaqa nindafaqiafana (200,000,000). Fifau saqari amaneera foora moomoo uqanna qafaqiafana. 17 Qinee Yoohaneesa qifu pisipasinoo marufaqa misa qoosauqa faqa misasaa mariasa faqa nindafaqiafana. Qoosasaa mariasa nimuqusa ititarafa akaqafa taatuqee idauruara foora mariqau akaqafa dirindaasi arirafa mariqau akaqafa tumana arirausa mariqau. Misa qoosauqa nikiqa raioona akiaqa miqirausa mariqau, misa nookiqari idauru namufaqa muna namufaqa nookiqari urimarinau. 18-19 Misa qoosauqa nooki faqa nimeesaki faqa faiqí narira afeeka maridanoo. Misa nookiqari idauru namufaqa idamuna namufaqa maa maqana afaaqasasa mariasakiqari faiqí anaasee moomoo uqanna narutaikanau. Mi qoosausa nimeesa sakaniara foora faiqí ukaqannimidanoo faiqí aupurarana firaana maraidaqa.

20 Mi narimaru ainainausa maqasaaqaraa fasiqa anaasee moomoo naru taikasoofaqa kaqi mariasa mina qafamasee sia rufieeqa sia nári mandainaina minniseeqa Anutu finnai ubeekeeqa. Kaqi maqeeidaqa. Misa kaqi kai afaannauqara innaaru qimariqau. Misa koorannai siruaannai booroosannai ooninnai saqarinnai Anutunara foora sia faiqí qafeemaria ainainna sia ufa irimaria ainainna sia nimaria ainaina, nisaukukoo auqusaidaqa minara innaaru qimariqau. 21 Mi kaqimaria fasiqa anaaseesa sia narí ari narí arirana minniseeqa, sia aukainaina minniseeqa, sia faiqí anaasee qummuarirana minniseeqa, sia ainaina qumuarirana minniseeqa kaqi kai maridanoo.