1 Mi qangiroofa fuka Yeerusaree maqusa uqaqifiqaseenoo nammari miqoo maruna uqaqifiqanau. Mi nammarifa Anutuna faqa sipsipa aanaaqi Yisuna faqa maru qaarinakiqari qumuree fuka maqusa qambaana ooqu fimarinau. Mi nammarina auqu kaqi marira nammari fee qiqau. Amiqira nammari sia dumuna maqa maru nammarifa mi nammarifa mookoofa amanee kai randaida qumidanoo. 2 Mi nammarina dinni dinni afai saqari kambiqanoo maridanoo. Mi saqarisa aiqama quqoonasaa qaqamma iraidanoo kai maridanoo. Mina amanee aiqama maqannaasa aurirana teeroo taikannisee marifa mi saqari amaneefa maridanoo. 3 Moo ainainara Anutufa aqurarainna ainaina sia mi fuka maqusanaki mariannoo, doo taikafuannoo. Anutuna qaari faqa sipsipa aanaaqi qaari faqa mi fuka maqusanaki maridanoo mina aiku asauku mi maqusanaki mariasa mina amooqifaranoo. 4 Misa mina oori qafeefaranoo misa niqinaaqa mina auqu akara rinoo mariannoo. 5 Mi maqusanaki asukuna taikanoo maridanoo sia kafaa mariannoo. Misa sia qoomara suaniara iridaqa fifau maridaqa, Karaambaiqa Anutufa misa qooma marinaqa miqooqaraasa karaambaiqara foora naaru naaru rakisi nimaqeefaranoo.

6 Mi qangiroofa mi ainainausa uqaqifiqaseenoo qimaqiminoo qinau. Mi ufausa aiqama qimamunafa kuqaa minasaa mundimariafa marifaqa qimamiqa. Karaambaiqa Anutufa narí maraquna tamummaqara fasiqauqa nimimarifa narí qangiroo niqiqaifaqa mina ainainira fasiqa aanaaseesa qusasaa kambiqaaninna ainainausa uqannifiqaanifeera mi ainainausa ani uqafiqeeqa.

7 Yisufa inniara maqasaa mariasara maaqi qidanoo, qinee qusasaa kafaa ooqu fuanaura. Maa papiqanakinaa ufa irisee mi mau fimariasa misa asasifaranoo.

8 Qinee Yoohaneesa mi ainainna aiqama qafamasee iriseeqa daaquqoofaqa uqaqifiqee mari qangiroona aikuki maqasaa aqufiqa amooqianeeriafananoo mifa qaoo qimasee qinau. 9 Oo sia miqia Anutuna kai amooqia. Qinee ani faqa moodaa ainaini marunausa maridaqa ani afasausa tamummaqara fasiqauqa faqa moodaa ainaini marunausa maridaqa. Maa papiqanakinaa ufamau fimariasa misa faqa moodaa ainaini marunausa maridaqa. Sia qini qimooqia Anutuna kai amooqia. 10 Mi qangiroofa kafaa qimaqiminoo qinau. Yoohanee anee maa papiqanakinaa ufa tamummaqara ufa maridanoo sia qumeeraa, qimannimia. Aiqama maa ainainausa qusasaa kambiqaannoo sia amana quandasee kaifaa kisaaqasaa fuannoo, qusasaa doo kambiqaannoo. 11 Anaaseera fanandirana, faiqiara fanandirana, miqida nariara nariara rimariasa saina miqidaqa mariaqa, mandoosana mandoosana maree mariasa saina miqidaqa mariaqa. Amiqira oosana maree mariasa saina miqidaqa mariaqa. Maparaammasee amiqira oosana firaaqoo maree mariasa saina miqidaqa mariaqa.

12 Doo iriaqa Yisufa inniara qidanoo. Qinee qusasaa ooqufuanaura. Innee maree marianna akiaqara uqirausa doo ooqu fiqa muqu nimianauranoo. 13 Qinee oosana aroonakiqari marunausa maridaqa. Qinee taikaaninna aukuanna faqaasa maridaqa.

14 Nári qamunanda nammari uqusee anukara qamunna faqaasa misa kai amana fuka Yeerusaree maqusa kooqiki keeqafiqa kaqi naaru marira saqari qaqamma amana diqisee neefaranoo. Miqimariasa asasifaranoo. 15 Mi maqusana aqoosai kaaqa ufa rukiee mariasa faqa aukainaina maraqa nuasa faqa faiqí anaasee nariara nariara fanandi mariasa faqa faiqí anaasee kuqa narí mariasa faqa saqarinnai faiqí nimana auqusaida innaaru qimariasa faqa unna oosana auqimariasa faqa unna ufa qimariasa faqa misa aiqama aqoosai marifaranoo.

16 Qinee Yisufa maa ufausa amaana maqaki keeqee mariasa qimannimiaqee qimasee qeeqa qangiroo aqiqeeqa. Qinee Dafidina oosanakiqari minati maridaqa. Qinee kananaana duqudeeqiara maqi kaaqa qeemarunausa maridaqa.

(Yisuna saqariki mariasa aiqama mina aqoonausara foora mariafanoo misara Yoohaneefa moodaanaki sipsipa aanaaqi Yisuna anaaqa fee qidanoo maa papiqanaki qidanoo.) 17 Anutuna maraquna faqa sipsipa aanaaqi Yisuna anaaqa faqa aiqamausara mai aniaqee qidaqa. Aiqama maa ufana irimariasa innee faqa quandafi niqoonausa naaraaqa aniaqee qiaqa. Yisufa naaru marira nammari nimianee qidanoo. Aiqama nammariara nidimarisa doo aniree naaqa. Sia feefaurifaranoo, nidimarinausa kaqi naaqa.

18 Qinee Yoohaneesa aiqamausa maa papiqanakinaa tamummaqara ufa irimariasa doori kandamasee aaquqimannimaqaidaqa faiqí moo fannoo maa papiqanakinaa ufa moo narí ufa minasaa ootupamasee qinafa mina akiaqara Anutufa maa papiqanakinaa aupurarana narirana mara mi fasiqana ariranasaa ootupainanoo firaanaikiannoo. 19 Kafaa faiqí moo fannoo maa papiqanakinaa tamummaqara ufa ati rafaaqafinanoo minara mi fasiqafa naaru marira saqari qaqama neemariana Anutufa rafaaqafuannoo sia naannee qiannoo mina naaquqara fuka maqusaki keeqaranara faqa Anutufa rafaaqafusee qaoo qiannoo. Maa papiqanakinaa ufamau sia fuanara qaoo qiannoo.

20 Qinee maa papiqanakinaa ufa qima afeekaikammannimi marunausa Yisusa maaqi qimasee qimannimidaqa kuqaa uqanna qinee qusasaa innee iannai kaifaa ooqu fuanaura. Qinee Yoohaneesa minara maaqi qidaqa. Oo karaambaiqa Yisu doo qumuannee qidaqa.

21 Karaambaiqa Yisuna amiqira afaarirafa inni aiqamausaki mariani.