1 God na Iesu enembo sonembari-du rea, ninenguturieta furia-nu avona gaabee rouvia, umó seibe God da mendi o ariri ea vitie. O enembo avona God Afa neno buta rouvia, umó God Afada sasingu beago, neno buta rouvie. 2 Avore, namonde amó God neno bua, unda Gaga kotú Agho Dari kaifa rosora-mi, unda sasingu beago neno reisi-rurora-nu tanana rosore. 3 Jon 14:15Kotú namonde amó God neno buta rosora mo, umonu neno rururota, unda Gaga kotú Agho Darinu kaifa urota iririgore! Kotú, unda Agho Dari namonde anona ambo-ambo ari inono re. Jo fakara irambi re. 4 Anada bee mo, nímane God da sasingu Iesu Keriso gaabee eta rosora-mi, irari akokogo endava vitia-da anonu nímanena dedegadi jabura ata, ekami fatia jijiregari inono re. 5 Endava vitia enemboda ano avona dea ekami fatia jirari inono ra? Enembo avona God Embó eini ninengota furari-du riria, aná Iesu nu gaabee eta rousua-mi, nenuka aita rousue.

6 Iesu Keriso rera, umó tatangude uvude furie. Unda tano aná, uvu tatangughami iruguturieta, namonde amó tanana rosore, umó God da Mendi re. Umó uvumi daiyagha bafutaito uria, kotú unda tatangu daiyagha avereguturota ambubuturia, ananu gia, namonde amó tanana rosore, umó God da Mendi re. Kotú, God da Asisi beago, Iesu umó God da Mendi ananu namonde andú irugeta rouvie. Anada bee mo, God da Asisi, umó gaa beeda ruru re. 7-8 Avore, tano dano bakodemi irugeta rouvia mo, Iesu umó God da Mendi re. Aná tano bakode retora aná, God da Asisi, uvu kotú tatangu re. Atá númane bakodeda irugari dabako re. Númanda irugeta rouvia mo, Iesu umó God da Mendi re.

9 Avore, enembomi donu reta rousua-nu, namonde amó ningia gaabee eta rosore. Tago, God da reta rouvia, aná anogha re. Amindu God na Iesu unda Mendi nu iruguturota, donu uria-nu, namonde amó gaabee ea goghó egegore! 10 Atá enembo avona, God da Mendi gaabee adua mo, tofo unda neno roomi, God unda Mendi du donu reiria-nu gaabee eta rouvie. O enembo avona God da gaga jo gaabee ambi adua, umó God undufa unda Mendi dava donu riria, aná gavera gaa rirota vitie. 11 Jon 3:36God unda Mendi du gaga donu riria, aná evere. God namonde andú jebuga tumanadu irari ututuria-da emboro dabako aná unda Mendi re. 12 Amindu, enembo avona God da Mendi bua vitia, umó jebuga seibe bua, ungá danode vitie. Atá enembo avona God da Mendi jo bambi adua, umó jebuga beago, jo bambi aita rouvie.

13 Nímane God da Mendi nu gaabee eta rosora enembomi, seibe jebuga tumanadu irari tambua bubuguturera-nu, tanana egegadi rea, ená ingiso rei-gefere. 14 Namonde amó God da dibeva ano ea, tumo jará ea jireta rosore. Anada bee mo, namonde tanana eta rosore: namonde God da unonu aita nundubuturota, eini-eini dodu benunu adora, umó ningaita rouvie. 15 Kotú namonde amó fefera domi benunu ari, umó seibe nghaĩ javea ningita rouvie. Avore, namonde amó ananu gia tanana urota, itatama eta rosore. Namonde amó undava dodu benunu ari, umó ututa rouvie.

16 Namonde amó ari-bari akokogo dumeni eta rosora anami, jo jebuga tumanadu irari barida emboro gajambi aita rouvie. Avore, inda komana gaabee ari kato einimi ari-bari akuago aghago eini urota gadora mo, undú rea, God dava benunu ege-gea, unda jebuganu inda komanadava utoe. Avotago ari-bari akuago eini vitia-nu urota iririgadora mo, anami ata, namonde amó jebuga tumanadu irarida emboro kasovigaita rosore. Avore, inda komana ená ari-bari akuago aghago rera, ananu urota gadora mo, imó undú benunu adi jo rambi aita rore. 17 Ari-bari akokogo nanjogo, dano akokogo re. Tago, dumeni egegeta rosora-nu karigadora mo, God na nundubea gia doata, jebuga barida emboro jo kasovigambi aita rosore.

18 Atá namonde amó tanana rosore. God da sasingu jo ari-bari akokogo urota, irambi aita rousue. Anada bee mo, númane God da Mendimi kaifa urota, Satan jo furá númane kukuvirota, ari-bari akokogo ambi aita rousue. 19 Kotú namonde amó tanana rosore. Enembode, roo enda nanjogo vitia-de dano, Satan na kaifa ueta vitie. Avotago, namonde amó God da tofo re. 20 Kotú, namonde amó tanana rosore. Namonde amó God beenu gia tanana ari-du rea, God da Mendi furia, namonde andú beforo garinu ututurieta, namonde amó dibe fangea, God avouvi ananu tanana urota vitere. Oreki namonde amó God de dano takembea vitere, kotú unda Mendi Iesu Keriso beago namonde vitere. Umó God bee re. Kotú jebuga tumanadu irarida ruru, umó re.

21 Anda sasingu, rourogo, ingomi uubu ari god manenu tumogha baĩ egegara-degea rere. Nendufa kaifa urota, god gavera mane doa serigadi rere! Avore, anda gaga tano evere. Yata bua gigige!