2
2:1-10 Avona Iesu Da Ambova Yadua, Umó Jebuga Tambaita Rouvie. Tago Injigha Egegadua Enembo Amburaita Rousue.
1 Mania inda gavera gagami kokomana kuvirota, ari akokogo auvota! Mania komanadu jii dimbua, tauga kavavana regegata! Sei nímanda ari akokogo egegeta rosora, dodogadi rere. 2 Soká mane reka fumbarimi emi undaita nundubea sorara egegeta rousua aghagonu, nímane beago, Asisida undari undidigea, jebuga reka tumanadu irarinu bubugaita nundubuturota, inini egegadi rere. 3 Ps 34:8Aghá egegadi rera-da bee mo, nímane seibe Jojabeeda taubana daiyaghago, aná itatama egegutureravore.
4 Jojabeedava fufugadi rera mo, endava enembomi injigha urota, bee tefo gaa regeguturie. Tago, God undú singoi jebuga irari gaa rirota, aná singoimi unda kamboda roro tutumbu jirari-du nundubea gateguturie. 5 Amindu fufuge, Asisi Kakarami nímane unda kambo itari singoi jebuga irari aghago bua, aná roro tutumbu kakarada etova itota, nímane jijiregea, fristi* kakarada buro egeguturota, Asisida sonembami, God da uno eta rouvia vesa, utaita rosoravore. 6 Is 28:16God da Gagava eghá reirie,
“Gigige! Amó doriri Saion* anava andú tafaroro ari kambo itaita rea, singoi taubana,
kotú durogha gari esiko beenu gategea, kamboda roro tutumbu ari-du simbugetore.
Enembo avona umó ená singoi rera-nu gaabee egegadua mo,
númane jo meka gigigambi aita rousue.”
7-8 Ps 118:22; Is 8:14-15Avore, enembo avona Iesu gaabee egegeta rousua-dava, God na gangorode jebugade utota bubugaita rousue. Tago, gaabee ambi enembo God da Gagava kambo itari kakatodu reiria, aghago re: “Singoi eini kambo itari kakatomi injigha ea doa fugituria-nu Jojabee na bua, unda kambo roro tutumbudu itia simbuguturie.” God da Gagava singoida gaga aghago eini vitie, “Aná singoi mo, enemboda ekava dimbota juraita baĩ-baĩ rousue. Kotú ekava data jujugaita rousue.” God númane aghá egagari-du emboro simbuguturia-da bee mo, númane unda gaga ningari injigha egeguturie.
9 Ex 19:5-6; Is 43:20; Ex 19:5; Deut 4:20; 7:6; 14:2; Tai 2:14; Is 43:21; Is 9:2Avotago, nímane sei bingoiva vitirera enembonu, God na gategea bua, unda donu ririeta siroruturia-du raga radi rea, unda natofo kakara egegea, kotú Kini da fristi mane aghago egegadi rea, nímane unda tofo bua, unda unana jojabeva ititurie.
10 Hos 2:23Sei nímane jo unda natofo irambi re.
Tago, oreki nímane unda natofo ea viteravore.
Sei God jo nímandu neno mema ata, itatama ambi ureravore.
Oreki umó nímandu neno mema rouvia, aná itatama urota viteravore.
2:11-17 Namonde Endava Irirota, Aito Fugari Eghago Mane Egegore!
11 Ariee, anda neno buta rora ikoko mendi, ariri gharovu, endava irirota, aná esega enembo aghago vitera-du rere. Mania tamo firída unonu ambo-ambo egegata! Anada bee mo, firída unomi inda asisida jebugagha mene-mene eta rouvie. 12 Nímane God gaabee ambi enemboda rova irirota, yavi taubana esiko-esiko egegadi rere. Aghá egegutu-gea, gaabee ambi enembo nímanda tamova gaga raita simbugadua mo, nímanda yavi taubana gigiguturota, God da kaverea furari rifova undú raga regegaita rousue.
13-14 Namonde anda Jojabee Iesu Rom enemboda kotofu iti beevada gagadu jo besiga ambi eta uria aghago, nímane beago, aghago egegadi rere. Rom enemboda kotofuko, unda gavana nanjogo unda tuva buro egegeta rousua-mi, ari akokogo egegeta rousua enemboda darada mino utari-du rirota, ari taubana enembodu raga rari-du rea, ririeta jiria vitie. Aghá-gea, gavana nanjogo ijokovareta iya jojabeva vitia-da gaga ningia ambo-ambo egegadi rere. 15 Anada bee mo, God da uno mo, beforo dinunu enembo nundubambi gaga sembago nímanda tamova reta rousua-nu, nímanda irari taubanami data, manjea sidara ae! 16 Nímane reisi-geroravore, nímane jo enemboda rari ningari irambi re. Avotago, mania tefo neno irari gaa rirota, ari akokogo nungarimi egegata! Anada bee mo, nímane God da sabua* ea viteravore. Amindu, God da uno egeguturota iririge! 17 Enembo nanjogodu verua egeguturota, nímanda ikoko mendi, ariri gharovu mino-mino neno rururota iririge! Aghade God du oru egeguturota, Rom enemboda kotofuko kakara egege!
2:18-25 Namonde Amó, Keriso Da Daiyagha Mema Itatama Uria, Aghagonu Egegasire.
18 Sabua* kakato nímanda babarigaridu kakara egeguturota, donu ari-du regegadua, ningia aghago egege! Mania nímanda babarigari taubana mane nuenembodu kakara egegata! Tago, nímane dibe beva regegeta rousua babarigari beago, kakara egege! 19 Nímane God da uno retora-nu urota, buro taubana egeguturota, nímanda babarigarimi bee tefo neno akuago ea, nímane dedegadua, o mema utadua mo, God na nímane amindu ea simbugaita rouvie. 20 Atá, nímane dinunu egegadua-du dedegota, mema itatama egeguturadua, God jo nímandu gangoro ambi aita rouvie. Tago, nímane aito taubana fufugeguturota, nímane bee tefo dedegota, mema itatama egegadora mo, God nímane ea simbugaita rouvie. 21 God nímane aghá egegari-du aghi urie. Nímane reisi-geroravore, Keriso ari dabako aghagonu urota, nímandu irugari taubana ututurota durumuguturota, mema itatama urie. Amindu nímane beago, aghá egegasiravore. 22 Is 53:9Umó ari akuago eini jo ambi re. Kotú unda beeva gavera eini jo sirorota ningambi re. 23 Is 53:7Undú tauga kavavana riria enembodu, umó mino jo rambi re. Aghagonu, undú mema ututuria enembodu beago, umó mino utari gaa eini jo rambi re. Iesu undú ari akokogo egeguturia enembo dano, God na gaa beedu nuenembo irureta rouvia-da ingova itia dotuturie. 24 Is 53:5-6Keriso namonde anda ari akokoda bouvu unona bua aria, ifatarava ambubuturia-mi, ari akokogoda ano namonde andava sidara urie. Unda tamova beto siroruturia-mi nímane jebuga tatambugutureravore. Amindu namonde ari taubana egeguturota, iririgasire. 25 Sei nímane oka sifi emboro kasovigea kasava susumbuguturia aghago vitireravore. Avotago, oreki nímane kaverea nímanda asisida kaifa tavo katodava bubera-du, nímane bua kaifa ueta viteravore.