5
1 Avore, God na fristi* iti beeva avonu gategadua mo, umó namonde amó enemboda rovanu gategeta rouvie. Aghá ea, undava yarida emboro ifeguturota, aná fristi vesa ututurota dungari-du rea, God na aná fristi mane gategeta rouvie. 2 Aná fristi iti beeva mane rera, númane beago sembagoda emborova juta rousue. Amindu númane enembo dumeni neno nundubambi egegeta rousua, o dinunu egegeta rousua-du neno mema urota durumugari, aná inono re. 3 Lev 9:7Amindu, avona fristi iti beeva adua, umó jo enembo nenuka númandu ari-bari akokogodu vesa utambi eta rouvie. Umó unuka unda ari-bari akokogoda vesa dungea, kotú ari akokogo ari enemboda vesade dano ututurota dungeta rouvie. 4 Ex 28:1Jo embó eini undufa gategea, unda ragaro righota erari-du urota, fristi ambi aita rouvie. Tefo, fristi nanjogoda mambube ragaro Aron aghagonu*Tutuno enava Aron da gaga vitie. Umó Moses da kaka re. God na unda gagade Agho Daride Moses dava utua, Aron umó fristi* ea, fristi nanjogoda beforo righari ari-du ririe. Kotú tutuno 6 anava fristi eini, ragaro Melkisedek da gaga vitie. Abraham mene-mene urota, enembode eini-einide gitofoda ingova bua naava irurota, Melkisedek umó emborova tambua ea simbuguturie. Tago, Melkisedek seibe fristi ea, Abraham dava buburiturie. Umó avona nanjigo ririeta, fristi uria mo, namonde amó jo tanana ambi re. Ananu nundubuturota, Asisi Kakarami ririeta, ená buka gefiria embómi unda beforo isagha ari Melkisedek dava bua, Iesu daiyagha fristi iti beva ea tumanadu irita rouvia-nu isuri urie. God undufa ghogho rea gategeta rouvie.
5 Ps 2:7Keriso beago jo unda ragaro righota erari-du rea, undufa fristi iti beeva ambi re. God na umó fristi ari-du rea, eghá ririe,
“Amó nimamo re, imó anda mendi re.”
6 Ps 110:4Kotú kambesi einiva ená gaga aná gembari vitie,
“Melkisedek fristi ea vitiria aghagonu, imó fristi ea, tumanadu iraita roravore.”
7 Mat 26:36-46; Mak 14:32-42; Luk 22:39-46Iesu endava sirorea irirota, God na umó sonembota amburarivareta eraita rea, umó koko fugia benunu jiigha dano eta urie. Avota, Iesu durumugea, Afada unonu ambo-ambo ari gerurie-gea, God unda benunu niningurie. 8 Gaa bee, umó aná God da mendi re-tago, God na ririeta, umó sabua* buro kato aghago ea, gaga ningarida aito fugarinu mema tafirota, tanana urie. 9-10 Unda mema tafiria-da bee siroruturieta inono urie-gea, God na ririeta, umó fristi iti beeva Melkisedek aghagonu ea, enembo avona unda gaganu niningigea, ambo-ambo eta rousuria-du jebuga tumanadu barida emboro ifeguturie.
5:11-6:12 Mania God Nundubambi Nímanda Irari Sei Anava Kaverea Igigata!
11 Keriso namonde anda fristi* iti beeva ea vitia, anada gagada mendó oruabe rasire-tago, nímandava isuri arida emboro, aná fakara re. Anada bee mo, nímanda beforo seibe fakara egeguta-gea, jo tutumi tanana ea, ambo-ambo egegambi eta rosoravore. 12-13 1 Ko 3:2Nímane nendufako seibe ená gagada mendó mane bua, enembo dumenidava irugari inono iririgasiravore. Tago, nímane jo inono ambi viteravore. Amindu, enembo eini ya, nímane God da gaga seibe ningia tanana egegasira-nu, rekago nímandava nghaĩ ititigasue. Eto-bato sasingu mane reka fumbarimi undari fakara bee undambi eta rousua aghagonu, nímanena God da gaga rauko bua, jo tutomi tanana ambi eta rosoravore. Nímane aná sasinguda nundubarinu bua irirota, ari taubana o ari akuago doro jo gambi irirota, gaa bee niaro o gaga sembago mo niaro, jo tanana ambi urota viteravore. 14 Avotago, sasingu mane baria, undari fakara tutuno ea dirota vitia aghagonu, avona faghighi urota, enembo beeda nundubari bua vitia enembomi, ari taubana niaro, akuago niaro gia tanana egegeta rousue.
5:3 Lev 9:7
5:4 Ex 28:1
*5:4 Tutuno enava Aron da gaga vitie. Umó Moses da kaka re. God na unda gagade Agho Daride Moses dava utua, Aron umó fristi* ea, fristi nanjogoda beforo righari ari-du ririe. Kotú tutuno 6 anava fristi eini, ragaro Melkisedek da gaga vitie. Abraham mene-mene urota, enembode eini-einide gitofoda ingova bua naava irurota, Melkisedek umó emborova tambua ea simbuguturie. Tago, Melkisedek seibe fristi ea, Abraham dava buburiturie. Umó avona nanjigo ririeta, fristi uria mo, namonde amó jo tanana ambi re. Ananu nundubuturota, Asisi Kakarami ririeta, ená buka gefiria embómi unda beforo isagha ari Melkisedek dava bua, Iesu daiyagha fristi iti beva ea tumanadu irita rouvia-nu isuri urie.
5:5 Ps 2:7
5:6 Ps 110:4
5:7 Mat 26:36-46; Mak 14:32-42; Luk 22:39-46