3
Duailel egaremen agal ze.
1-2 Ag ailel du omenin ailel ag han guzenaital guzenan. Ag agal gamulagar agal piagsal dan. Gamulagar ipal ag Uwait nugau ze i sesamoranemen ag agal igul naliu mebi, uligaimai, agal oiagab kekulaimai, Uwait en oiagab petak amam. Ailel, ag ze asiu i mamamen, einen, gamulagar agen agal igul naliupet pet uligaimai, goagal oiagab Uwait en petak amam. 3 Ag agal gagaliag ulig mui enimag mui iweiu naliu arugaimai, duailel ipal agal ameagab ebu ig naliu aimai dabeleimai, i siksikan. 4 Iweiu naliupet pet go agal oiagab oug arugai mamamen. Duailel ag go oug ameag nug i uliganemen, bo, iweiu go i eg umau. Oiagab ougan iweiu go gue oiagab iau siksikai mui dabun igul. Igul go Uwait nugau amegwab naliupet pet. 5 Getalan ailel agal oiagab Uwait en petak emenin ailel, ag agal gamulagar agal piagsal daimai, goagal ze suban sesamoranemen. Igul go ebu ag dudu agal ameagab ebu naliupet pet usalemenin. 6 Sara go ailel go sul, go gonugau gamu Abraham nugau ze sesamoraimai, ‘Go izal banou’ aneun. Ulis, ag igul naliu guzenabun i uminamamen, go ag gonugau ainagul sul damamen.
7 Dudu, ag han guzenaital guzenan. Dudu, ag dabeleu naliu oiban, ag agal walagar abai suban hoboi dan. Ailel agal enimag gusig tam, guzenaimai, ag dudu ag agal walagar ebalagab igul naliu maran. Ailel han ag awau muzmuz dabun empip umam. Ag igul go guzenebi, Uwait auramamen ziwas ebu, ece tub nug agal ze auramamen abu i tapelamau.
Ig ag duailel ipal ameagab ebu igul naliu mab.
8 Iz ze oliguamoroi. Ag unum ug tutak ebuan sul ag bisomag mui daiban, agal oiagab zaiagar en noumaiban, suban isanaran. Ag agtal agal wanimag ulapagwag i macan. 9 Du tub nug igul eg ag ebalagab maramau ta, gonug ag ze biabial kuai maramau ta, agen koli igul eg du go ebu i macan. Ageban koli igul naliu go ebu macan. Einen, Uwait nug ag igul go mabun tapai mareun, gonun, aiu ses ag ece naliu umamen. 10 Uwait nugau ze nug eneu,
‘Duair in gonugau dorog naliu usalabun ziwas zuba, piabun gumei daimai, go ze biabial kuai i mamau, ze tub i polu mamau. 11 Go igul eg unum seugab hiacaraimai, igul naliu sag sesamoramau. Go duailel ipal abai oiagab tutak maimai, igul naliu sesamorabun gusig mamau. 12 Einen, Dubanou Ban go duailel igul naliu mui gumaraneu, dudu go agen auranemen gonugau dabug suban maimai, doi dacaneu. Bo, go igul eg macanemen duailel i isanaraneu.’ Buk Song 34:12-16
Ze e Uwait nug aneun.
13 Na igul naliu mabun salau banou meben, du tub nug na eg mizabun iboin ta? 14 Bo, ag igul naliu mebiag, ag igul naliu go en gaul mu marebi, ag oiagab siksikai mui dan.
‘Dudu eg ipal agen ag uminabun aimai polumarebi, ag go i uminaran. Ag agal oiagab go en i asamau.’ Aisaia 8:12
15 Bo, agal oiagab Kristus ebu sag maiban, guzenai dabilan, “Go igual Dubanou Ban”. Dudu ipal agen ag einen Uwait ag aiu ses igarabun gumei darem aimai kanabarebi, ag zebigeg go suban abe maiban, awaran. 16 Ag koli ze oiagab naliu mui eim awaran, ag umkoskos Uwait nugau amegwab tuguiai dacan. Guzenaiban, dudu ipal agenag ag ze biabial kuai awarebi, dudu go ag igul naliu go Kristus nugau igul sesamoremen uligaimai, aipag numau. 17 Uwait nugau dabeleu sesamoraimai, igul naliu eiman mu umam go naliu. Bo, igul eg eiman mu umam go eg.
Kristus go noumaimai, asaimai, ig imaigeun.
18 Ag Kristus dabilan, go igul eg mab tam. Duailel unum igul eg macanemen agal empip oimai, a gegeulanau ebu noumaimai, agal igul eg ebuan Uwait waugab igarai beteun. Go ziwas tutak sag noumeun, go koli i noumamau. Go du sul em e ebu darena, wina, noumeun. Bo, go koli asaimai, gonugau dorog muzmuz awau dareu. 19 Go noumaimai, gonugau dorog duailel getal noumemen go doropag noumemen agal gilan oug daremen ebu beteimai, Uwait nugau ze naliu awareun. 20 Duailel go getal Noa nugau ziwas ebu Uwait nugau ze i sesamoranemen. Ziwas go ebu igul eg banou pet zoun, bo, Uwait pigai eg marab tam, go goagal oiagab kekulabun aimai, gumarai dareun. Bo, Noa tebil nugau salau mazicina, duailel asiu tam, gugen sag tebil go oug siemen. Ze banou noimai, zewei nug tebil go hepatai bitena, Uwait nug go suban gumareun. 21-22 Go zewei, gagaliag patanemen dorog. Uwait nug ag ze eim imareun. Go ze gagaliag patanemen, go enimag ebuan unu i ulusamau, tam pet tam, go Uwait nugau amegwab tuguiai dabun baib muranemen. Gonug ag imarabun guzenaneu. Uwait nug Yesus Kristus ob ougan asai mina, ulis go Mesgai wag Uwait nugau ebeg naliu eiman daimai, Uwait nugau tibur mui, wes wanimag banou mui abai, ece ipal gusig mui, gonug ag unum gumarai dareu.