2 Tesalonaika
Agau e nugau zebigeg
Pol go Korin uzan dai dai, go koli ze tub guzenai doun, “Tesalonaika uzanan duailel ipal go dabeleu guzenai omen, ‘Yesus go em e ebu mazi aleun go koli i alamau’, gonun, go salau mab tam, umin mui danem.” Guzenina, Pol nug go awareun, “Amegai du tub go kasai ze i sesamoraneu alaba, Kristus aiu ses alamau. Uwait nug duailel du eg gonugau ze sesamorem, du go mui abai ereg eg maramau.” Guzenina, Pol nug mui, gonugau salau zaugul abai, salau memen sul, Kristen duailel ag agal salau suban mai dabun en awareun.
Agau e sesamorabun ze
1:1-2 Pol nug Tesalonaika duailel ‘umaseu’ awareun.
1:3-12 Pol nug duailel go igul naliu maimai, uhu oimai, oiagab iau selai danemen ze doimai, goagal wanimag wag mareun.
2:1-17 Pol nug Yesus koli alamau ziwas ebu, ein igul zumau en awareun.
3:1-15 Duailel inen ag agal oiagab Yesus en petak emen ag muzmuz awau damamen.
3:16-18 Pol go Tesalonaika duailel oiagab iau selai mui dabun en ze awaraimai, gonugau ze poeun.
1
Ig Pol, Sailas, Timoti iguan ag Kristen duailel Tesalonaika uzan daremen, sikut e wai marem. Ag igual Memenig, Uwait mui, igual Dubanou Ban, Yesus Kristus mui peza daremen.
Igual Memenig, Uwait mui, igual Dubanou Ban, Yesus Kristus mui, ag en goagal oiagab naliu mui eim ag isanaraimai, goagal oiagab selai ag abai ereg damau.
Pol nug gonugau ougab siksikai Uwait aureun.
O igual zaiger, ig ag en umkoskos igual oigeb siksikaimai, Uwait ag en ‘Ese-e’ auranem. Igul go ig guzenanem, go naliu, einen, agal oiagab Yesus en petak emen, igul go naliupet usalai darem. Ag duailel ipal en oiagab nug noumaneu, igul go han naliupet usalai darem. Ig ag en igual oigeb siksikeu, gonun, ig Kristen duailel ipal ag igul naliu go guzenemen en awaranem. Agal oiagab Yesus en petak aimai, uhu ata atai ipal wanemen, bo, ag gusig tapai daimai, uhu mu go oimai, agal oiagab petak emen i utanemen.
Uwait nug igul naliu eiman ig sisigamau.
Ag uhu asiu pet ona, Uwait nug ag go dareu a siabun tapai mareun maramau. Igul go eiman ig abiu gonugau sisiarabun igul naliu. Uwait nug igul naliu guzenaneu. Du in nug ag uhu maraneu go nug han du go uhu muramau. Duair in go uhu waneu, Uwait nug go uhu zilagai moroimai, ougab iau selai dabun muramau. Ig han guzenaital igul go ebigab mamau. Igual Dubanou Ban, Yesus go gonugau tibur gusig mui aba, go Mesgai wageiman alaimai, igul go guzenamau. Go ab banou eiman alamam. Go Mesgai wageiman ab al mui alaimai, duailel go Uwait abe mab utemen mui, igual Dubanou Ban, Yesus nugau Ze Naliupet sesamorab tam, mui, duailel go unum eg maramau. Duailel go ag muzmuz uhu banou oimai, eg wai damamen. Ag Dubanou Ban nug mui gonugau al mui gonugau gumarabun gusig mui waugab i damamen, ag atai beu damamen. 10 Go koli alamau ziwas ebu, duailel ag go en tuguiai daremen ag siksikaimai, gonugau wanib wag banou muramamen, einen, agal oiagab goen petak emen. Ag, Tesalonaika uzanan duailel, duailel go abai tulamamen, einen, ig Yesus nugau ze abai marena, ag agal oiagab petak emenin.
11 Go enegun, ig umkoskos ag en Uwait auranem. Ig Uwait auremun, gonug ag igul naliu macanemen uligaimai, ag gonugau duailel pet dabun amau. Agal oiagab petak ebi, ein igul naliu nugtal guzenabun awareun ag guzenamamen. Ig umkoskos Uwait auranem, gonugau gusig sil ag isanaraba, ag igul naliu go umkoskos guzenamamen. 12 Igual Uwait mui igual Dubanou Ban, Yesus Kristus agen goagal oiagab naliu mui eiman ag isanarebi, ag igul naliu go mebi, duailel ipal agen uligaimai, igual Dubanou Ban, Yesus nugau wanib ulagwag mamam. Gonug mui agal wanimag wag mamau.